Read Batak Karo 1 SAMUEL 17 Bible Online

1 SAMUEL 17 - Batak Karo bible

1 SAMUEL 17

¹Ipepulung bangsa Pilisti tenterana i Soko, sada kuta i Juda, erperang atena; ibahanna inganna erkemah i bas sada ingan, Epes Demin gelarna, kelang-kelang Soko ras Aseka.

²Saul ras kalak Israel pe pulung janah erkemah i Baluren Ela, i je ia enggo sikap ngelawan kalak Pilisti.

³Bangsa Pilisti erbaris i datas sada uruk janah bangsa Israel i datas uruk si deban; kelang-kelang kalak enda lit baluren.

⁴Lit me sekalak puanglima i kuta Gat nari Goliat gelarna, ndarat i bas kemah bangsa Pilisti nari janah ipindona bangsa Israel ngelawan ia. Gedangna menam telu meter,

⁵janah ipakena baju tembaga si beratna kira-kira lima puluh pitu kilo ras sada topi tembaga.

⁶I bas nahena pe lit ampang-ampang tembaga, janah ipersanna sada lembing tembaga.

⁷Tangke lembingna asa binangun pertenunen belinna, babah lembingna ibahan i bas besi nari, beratna kira-kira pitu kilo. Sekalak tentera erdalan arah lebena maba ampang-ampangna.

⁸Goliat tedis janah erlebuh man kalak Israel nina, “Erkai kam i jenda? Erbaris guna erperang? Aku kap sekalak Pilisti, o budak-budak Saul! Pilih sekalak i bas kam nari ngelawan aku.

⁹Adi ia menang janah ibunuhna aku, kami jadi budak, tapi adi menang aku janah kubunuh ia kam jadi budak kami.

¹⁰I bas wari enda kulawan tentera bangsa Israel. Adi pang kam pilihlah sekalak si ngelawan aku!”

¹¹Kenca ibegi Saul ras tenterana, lanai kal lang-lang biarna kerina.

¹²Daud anak Isai sekalak Eperata i Betlehem nari i daerah Juda. Anak Isai lit waluh dilaki, janah asum Saul jadi raja, ia enggo seh kal tuana.

¹³Telu kalak anakna si mbelinna enggo lawes ras Saul ku perang e. Sintua e me Eliap, agina Abinadap, janah si peteluken Sammah.

¹⁴Daud anakna singuda, janah asum kakana si telu kalak ndai tetap tading ras Saul,

¹⁵itadingken Daud kakana janah rusur ia mulih-ulih ku Betlehem, mpermakani biri-biri bapana.

¹⁶Goliat tetap nggombangi bangsa Israel tep-tep erpagi-pagi ras karaben empat puluh wari dekahna.

¹⁷I bas sada wari nina Isai man Daud, “Buatlah sepuluh kilo buah gandum si isauk ras roti si sepuluh ngkibul enda, jenari pedas taruhken man kakandu i bas ingan erkemah.

¹⁸Janah babalah keju si sepuluh e man komendan pasukan. Pepayo kuga kecibal kakandu jenari baba sada barang kai gia i jah nari tandana kam jumpa ras ia janah maka ia mejuah-juah nge.

¹⁹Raja Saul, senina-seninandu, ras kerina kalak Israel sangana i Baluren Ela erperang ngelawan bangsa Pilisti.”

²⁰Pepagina lampas keke Daud, isuruhna kalak si deban mpermakani biri-biri, ibuatna pangan e, jenari lawes ia bagi si isuruh Isai. Ia seh i bas ingan erkemah e rembang kal asum kalak Israel muat berkat ku barisen peperangen, ersurakken surak perang.

²¹Tentera bangsa Pilisti ras tentera bangsa Israel ngatur barisen perangna, petala-tala dua mbelahna.

²²Ibereken Daud pangan e man kalak si ngurus perbekalen tentera e, e maka kiam ia ku bas barisen peperangen e, ijumpaina seninana, guna ngataken mejuah-juah man bana.

²³Tupung ia ercakap-cakap denga ras seninana reh Goliat ku lebe ilawanna bangsa Israel bagi si enggo ibahanna ope si e, janah ibegi Daud ia.

²⁴Kenca bangsa Israel ngidah Goliat, kiam ia kerina alu mbiar mesangat.

²⁵“Nehenlah ia!” nina sapih-sapih ia. “Begikenlah kuga gombangna ia man bangsa Israel! Raja Saul enggo erpadan mereken pemere si mbelin man kalak si munuhsa. Anakna iserehkenna man bana janah kade-kade bapana lanai perlu nggalar pajak.”

²⁶Isungkun Daud kalak si lit isekelewetna nina, “Kai ibereken man kalak si munuh kalak Pilisti ah ras mulahi Israel i bas penggombangi kalak enda nari? Lang gia, ise ka kin kalak Pilisti si perbegu ah maka megombang ia man bala tentera Dibata si nggeluh?”

²⁷Ituriken kalak ndai man bana kuga perbahan man kalak si munuh Goliat.

²⁸Eliap kaka tua Daud, megi Daud ngerana ras kalak ndai. E maka merawa ia man Daud nina, “Erkai kam ku jenda? Ise si permakani biri-biri e i bas taneh si mesawang? Kam danak-danak si petua-tuaken! Ngenen-ngenen perang enda saja ngenca atendu ku jenda!”

²⁹“Kai kin salahku?” nina Daud nungkun. “La kin banci aku nungkun pe?”

³⁰Erkusur ia man kalak si deban janah isungkunna, janah bagi si ndai ka nge ningkalak bana.

³¹Lit piga-piga kalak si megi kai si ikataken Daud e maka iturikenna man Saul, janah minter isuruh Saul kalak ndilosa.

³²Nina Daud man Saul, “O Raja, ise pe la aturenna mbiar man kalak Pilisti ah! Nta aku lawes gelah kulawan ia!”

³³“Lang,” nina Saul ngaloi. “Ja nge terlawanndu ia? Kam medanak denga, tapi ia enggo jadi tentera kitik-kitikna nari!”

³⁴“O Raja,” nina Daud, “aku kap si mpermakani biri-biri orangtuangku. Adi lit singa ntah beruang njerngem anak biri-biri,

³⁵minter kuayaki, kupalu, janah kuselamatken anak biri-biri e. Janah adi singa ntah beruang e erkusur ngelawan aku, kutangkap minter kerahungna, kupalu seh mate.

³⁶Singa ras beruang enggo kubunuh, janah bage ka me kari perbahanku man bangsa Pilisti si perbegu ah, si enggo nggombangi bala tentera Dibata si nggeluh.

³⁷Enggo iselamatken TUHAN aku i bas singa ras beruang nari; tentu iselamatkenNa ka kari aku i bas bangsa Pilisti ah nari.” “Adi bage kin merandal,” nina Saul ngaloi. “To dage, TUHAN ras kam.”

³⁸Ipakeken Saul paken perangna jine man Daud, sada topi tembaga itamakenna i bas takalna, ras sada baju perang ipakekenna man bana.

³⁹Igenditken Daud pedang Saul i bas baju perang e jenari icubakenna erdalan, tapi la banci perban la ia biasa make si e kerina. “La aku banci erperang make si enda kerina,” nina man Saul. “La kupake enda kerina.” E maka itangtangina kerina.

⁴⁰Jenari ibuatna cikenna si biasa ipakena sanga ermakan janah kenca e ipilihna lima ngkibul batu si melinang i bas lau nari, itamakenna i bas tasna. Alu kalimbawang si sikap, luar ia ndahi Goliat.

⁴¹E maka reh bangsa Pilisti e erdalan ndahi Daud, janah kalak si maba ampang-ampangna erdalan arah lebena. Erdekahna erdeherna,

⁴²janah kenca enggo tangkas idahna Daud, minter ia mekarus man bana sabap ia sekalak anak perana denga si mejile rupana.

⁴³Nina man Daud, “Man kadendu ciken ena? Biang kin akapndu aku?” Kenca bage isumpahina Daud alu gelar dibatana.

⁴⁴Erlebuh ia man Daud nina, “Mari maka kubereken dagingndu ipangani perik-perik ras rubia-rubia si meliar.”

⁴⁵Ngaloi Daud nina, “Kam reh ngelawan aku alu pedang, tumbak, ras lembing, tapi aku reh ngelawan i bas gelar TUHAN Si Mada Kuasa, Dibata bala tentera Israel, si enggo igombangindu.

⁴⁶Sendah ibereken TUHAN kam ku bas tanku; kutaluken kam jenari kutampul kerahungndu. Janah daging tentera kalak Pilisti kubereken ipangani perik-perik ras rubia-rubia si meliar. Kenca e doni enda kerina meteh maka lit kepe Dibata i bas Israel,

⁴⁷janah kerina si ijenda ngidah maka TUHAN la perlu pedang ntah tumbak guna ngkelini bangsaNa. Ia si permenang i bas perang, janah iberekenNa kam kerina ku bas kuasa kami.”

⁴⁸Erdalan ka mulihken Goliat kempak Daud, janah pedas-pedas Daud kiam kempak barisen perang kalak Pilisti ngelawan ia.

⁴⁹Icekuhna tasna jenari ibuatna sada batu, ikalimbawangina Goliat. Kena perdempakenna e maka pecah takalna, jenari guling ia langkem i babo taneh.

⁵⁰Dage alu la make pedang, Daud naluken ras munuh Goliat alu kalimbawang ras sada batu!

⁵¹Kiam Daud ndahi ia, iperjatna, isintakna pedang Goliat i bas sembungna nari, jenari itampulna kerahungna, mate minter. Kenca idah bangsa Pilisti maka enggo mate puanglimana kiam ia kerina.

⁵²Bangsa Israel ras Juda ersurak janah iayakina bangsa Pilisti; ielis-elisna seh Gat ras ku pintu gerbang Ekron. Bangsa Pilisti si luka-luka amparen i gedang-gedang dalan ku Saarim, seh ku Gat ras Ekron.

⁵³Enggo kenca bangsa Israel mulih i bas ngayaki bangsa Pilisti nari, irampasina kemahna.

⁵⁴Ibuat Daud takal Goliat jenari ibabana ku Jerusalem, tapi isimpanna senjata Goliat i bas kemahna.

⁵⁵Asum Saul ngidah Daud lawes ngelawan Goliat, isungkunna Abner puanglima tenterana nina, “Abner, anak ise nge anak perana e?” “La kueteh o Raja,” nina Abner njabapsa.

⁵⁶“Adi bage to pepayo cuba,” nina Saul mereken perentah.

⁵⁷E maka asum Daud mulih ku ingan erkemah kenca munuh Goliat, ibaba Abner ia ngadap Saul. Takal Goliat sangana denga ikanting Daud.

⁵⁸Isungkun Saul nina, “Anak ise kam, o anak perana?” “Aku anak kawanndu Isai i Betlehem nari,” nina Daud ngaloi.