Read Batak Karo 1 SAMUEL 19 Bible Online

1 SAMUEL 19 - Batak Karo bible

1 SAMUEL 19

¹Ikataken Saul man anakna Jonatan ras man kerina pegawaina maka atena munuh Daud. Tapi Jonatan erteman meriah ras Daud,

²janah erkite-kiteken si e ikatakenna man Daud nina, “Bapangku ndarami dalan munuh kam. Ngarap aku maka erpagi-pagi e pagi jaga-jagalah kam; cebunilah kam i bas ingan si la ieteh kalak.

³Ateku lawes janah tedis deherken bapangku i bas mbalmbal inganndu cebuni, jenari ateku ercakap ras ia kerna kam. Kai si dat aku i bas percakapen e nari, kupebetehken man bandu.”

⁴Jonatan mujiken Daud i lebe-lebe Saul, janah nina, “O Bapa, ola min ibahanndu si lepak man Daud, suruh-suruhenndu. La pernah lit si salah ibahanna man bandu, sebalikna kai si enggo ibahanna tuhu-tuhu jadi penampat si mbelin man bandu.

⁵Iasamkenna kesahna asum mbarenda ibunuhna Goliat, janah erkiteken TUHAN Israel ndat kemenangen si mbelin. Tupung idah kam si e, meriah kal mbarenda iakapndu. Engkai dage maka genduari atendu erbahan si lepak man kalak si la ersalah, janah munuh Daud alu la lit kai pe sabapna?”

⁶Payokal iakap Saul kai si ikataken Jonatan, jenari ersumpah ia i bas gelar TUHAN maka lanai atena munuh Daud.

⁷E maka idilo Jonatan me Daud jenari kerina iturikenna man bana. Kenca bage ibabana ia ngadap Saul, janah Daud erdahin guna raja bagi si nggo-nggona.

⁸Perang ras bangsa Pilisti pecah ka mulihken. Iserang Daud ia, janah mesangat kal ketalun bangsa Pilisti ibahanna seh maka lompaten ia kerina.

⁹I bas sada wari sada kesah si jahat ibereken TUHAN ngkuasai Saul. Asum si e ia sangana kundul i bas rumahna njemak lembing, janah Daud sangana i je erkulcapi.

¹⁰Icubaken Saul mantem Daud ku dingding alu lembingna, tapi isilahken Daud, janah lembing ndai leket i bas dingding. Lompat Daud, luah ia.

¹¹I bas berngi si e isuruh Saul piga-piga kalak mperdiateken rumah Daud gelah ia ibunuh pepagina. Tapi iberitaken Mihal, ndehara Daud man bana nina, “Adi la kam lawes berngi enda, pagi la banci la kam ibunuh.” [21†]

¹²Ipesusurna Daud arah jendela, jenari lawes ia lompat, luah ia.

¹³Kenca bage ibuat Mihal gana-gana si lit i bas rumah e icibalkenna i bas ingan medem, itamakenna sada bantal si ibahan i bas mbulu kambing nari arah takalna, jenari icabinina.

¹⁴Asum reh persuruhen Saul ngelegi Daud, ikataken Mihal man bana maka ia sangana sakit.

¹⁵Tapi isuruh Saul ia mulihken gelah inehenna Daud. Iperentahkenna man bana nina, “Baba ia ku jenda tare ingan medemna maka kubunuh ia.”

¹⁶Lawes kalak ndai ku rumah Daud, idapetina gana-gana e i bas ingan medem ras bantal mbulu kambing arah takalna.

¹⁷Nungkun Saul man Mihal nina, “Engkai maka bagenda penipundu aku, janah iberendu musuhku luah?” Ngaloi Mihal nina, “Ikatakenna man bangku maka adi la kusampati mulihi ia ibunuhna atena aku.”

¹⁸Kenca Daud enggo luah lawes ia ndahi Samuel i Rama janah iturikenna man bana kai si enggo ibahan Saul man bana. Jenari Daud ras Samuel lawes ku Nayot, janah ringan ia i je.

¹⁹Ituriken kalak man Saul maka Daud sangana i Nayot i Rama.

²⁰E maka isuruh Saul piga-piga kalak nangkapsa. Idah kalak ndai sada terpuk nabi-nabi sangana landek ras ersurak-surak. Peminpinna e me Samuel. Kenca bage Kesah Dibata ngkuasai kalak si isuruh Saul ndai, janah ia pe mulai ka landek ras ersurak.

²¹Asum Saul megi si enda, isuruhna tole suruh-suruhen, tapi ia pe kerina mulai ka landek ras ersurak. Isuruhna persuruhen petelu kaliken, janah bage ka nge jadi man bana kerina.

²²Kenca bage ia jine berkat ku Rama. Kenca seh i bas sumur si galang i Seku, isungkunna i ja Samuel ras Daud, janah ikataken kalak man bana maka ia duana sangana i Nayot.

²³Asum ia lawes ku je ia ka pe ikuasai Kesah Dibata, jenari landek ras ersurak ia gedang-gedang dalan seh ku Nayot.

²⁴Itangtangina uisna jenari landek ras ersurak-surak ia i lebe-lebe Samuel, janah ampar ia sada wari sada berngi alu manjang-anjang. Em sabapna maka ikataken kalak, “Saul pe enggo ka kin jadi nabi?” [22†]