Read Batak Karo 1 SAMUEL 2 Bible Online

1 SAMUEL 2 - Batak Karo bible

1 SAMUEL 2

¹Ertoto Hanna nina, “Ukurku ersurak ibahan TUHAN; andiko! Riahna kuakap erkiteken kai si enggo ibahanNa. Tawa ateku ngidah imbang-imbangku; andiko! Riahna kuakap sabap Dibata enggo nampati aku. [2†]

²La lit ise pe si badia bagi TUHAN; la lit ise pe bagi Ia, la lit sekawal bagi Dibatanta.

³Olanai pujiken man bandu alu sora megang; olanai luar cakap meganjang i bas babahndu nari. Sabap TUHAN Dibata kapen si meteh si kuterana pe; janah ia nge si nimbang kerina perbahanen manusia.

⁴Panah kalak si mbisa ipenggelken, tapi kalak si lemah tambah gegehna.

⁵Kalak si gelgel e sikap rusur perpanna genduari enggo terpaksa ngemo muat nakanna, tapi kalak si gelgel e kelihen genduari lanai kurang nakan. Ndehara si gelgel e la mupus, enggo ipupusna pitu anak, tapi pernanden si nterem anakna sada pe lanai lit tading i bas ia.

⁶ TUHAN kapen si munuh ras si pegeluhken; isuruhNa kalak ku bas doni kalak si enggo mate jenari ibabaNa ka ia mulihken ku das.

⁷Ia si erbahanca kalak musil ras kalak bayak; deba ipeteruhNa janah si deban ipeganjangNa.

⁸Iangkatna kalak musil i bas abu nari janah ipetedisna kalak si kekurangen i bas kubang kiniseran nari. IjadikenNa ia man teman raja janah itamakenNa ia i bas ingan si mehaga. Sabap TUHAN kap si mada palas doni; i babona ipantekiNa doni enda.

⁹IkawaliNa geluh kalak si setia man baNa tapi kalak si jahat bene i bas kegelapen; sabap labo erkite-kiteken gegehna jine maka kalak menang.

¹⁰Musuh TUHAN la banci la iperperken; erlenggur sora TUHAN ngelawan ia i langit nari. TUHAN kap hakim kerina doni enda; iberekenNa gegeh man rajaNa; iberekenNa kemenangen man raja pilihenNa.”

¹¹Kenca bage mulih Elkana ku rumahna i Rama, tapi Samuel, anak dilaki ndai tading i Silo ndahi dahin TUHAN i teruh pengawasen Imam Eli.

¹²Anak-anak Eli tuhu-tuhu si kemali. Sitik pe la diatena TUHAN.

¹³Peraturen-peraturen kerna kai si banci ipindo imam-imam i bas bangsa e nari pe labo diatena. E maka adi lit kalak nehken persembahen gelehen, minter reh suruh-suruhen imam maba garpu si telu ipenna. Asum daging e sangana denga itanggerken,

¹⁴ijukjukkenna garpu e ku bas kudin ingan nanggerken daging e, jenari kai saja pe si ikawit garpu e ndarat jadi sekerajangen imam. Bagenda me perbahanenna man kerina kalak Israel si reh nehken persembahen ku Silo.

¹⁵Tambah si e, aminna gia tabeh-tabehna langa iagui ras itutung reh minter suruh-suruhen imam jenari ikatakenna man kalak si maba persembahen e nina, “Enta deba daging ena man panggangen imam. La ia nggit ngaloken daging si enggo itanggerken i bas kam nari, daging matah ngenca.”

¹⁶Adi nina kalak erjabap, “Itutung kami lebe tabeh-tabehna, sabap bage nge arusna, kenca e kari banci ibuatndu apai atendu.” E maka nina suruh-suruhen imam e ngerana, “Lang! Genduari bereken man bangku! Adi lang, la banci la kubuat e alu paksa!”

¹⁷Dagina dosa anak-anak Eli enda tuhu-tuhu mbelin kal iakap TUHAN, sabap sitik pe la mehamat perbahanenna nandangi persembahen man TUHAN.

¹⁸Asum si e Samuel kitik denga, terus erdahin ndahiken dahin TUHAN. Pakenna baju si badia si ibahan i bas linen nari.

¹⁹Tiap tahun ibahan nandena sada baju kitik jenari ibabana man bana asum ia nemani perbulangenna nehken persembahen tahunen.

²⁰Jenari ipasu-pasu Eli me Elkana ras ndeharana, janah ikatakenna man Elkana nina, “Mbera-mbera ibereken TUHAN man bandu anak tole arah ndeharandu enda jadi gancih anak si enggo iendeskenndu man baNa.” Kenca bage mulih ia ku kutana.

²¹Payo me TUHAN masu-masu Hanna, e maka ipupusna telu nari anak dilaki ras dua anak diberu Samuel mbelin-mbelin i bas ndahiken dahin TUHAN.

²²Genduari Eli enggo seh kal tuana. La erngadi-ngadi ibegina kerna kai perbahanen anakna man kalak Israel janah terlebih-lebih sanga ia medem ras diberu-diberu si erdahin i bas dalan bengket ku bas Kemah Perjumpan ras TUHAN.

²³E maka nina Eli man bana, “Engkai maka bage perbahanenndu. Kerina kalak nuriken kejahatenndu man bangku.

²⁴Olanai bage, anakku! Seh kal mejinna si icakapken bangsa TUHAN!

²⁵Adi sekalak jelma erdosa man teman manusia banci nge ia isampati Dibata. Tapi kuga nina manusia nampati kalak si erdosa man TUHAN?” Tapi la ia nggit megiken bapana, sabap enggo itetapken TUHAN guna munuh ia.

²⁶Samuel terus erbelinna janah erngenana ate TUHAN ras manusia man bana.

²⁷Reh sekalak nabi ndahi Eli maba berita i bas TUHAN nari, nina, “Asum ninindu Harun ras keluargana jadi budak raja Mesir, Kucidahken bangKu kempak Harun.

²⁸I bas kerina suku-suku Israel Kupilih keluargana jadi imam-imamKu, guna erdahin i bas batar-batar persembahen, nutung rempah-rempah si merim, ras make baju epod guna meteh sura-surangKu. Janah Kubereken man bana hak muat sada bagin i bas persembahen si itutung i bas batar-batar e. [3†]

²⁹Engkai dage maka merangap kal kam ngidah persembahen gelehen ras persembahen si Kupindo i bas bangsangKu nari? Engkai maka ipehagandu anakndu lebih asa Aku arah mere ia peburbur bana alu daging si mejilena i bas kerina persembahen gelehen si ipersembahken bangsangKu man bangKu?

³⁰Aku, TUHAN Dibata Israel, nai enggo erpadan maka keluargandu ras terpukndu jadi imam si ndahiken dahinKu seh rasa lalap. Tapi genduari Kukataken, lanai ateKu bage! Sabap Kupehaga kalak si pehaga Aku, janah Kupeteruk kalak si la erkemalangen man bangKu.

³¹Begiken, paksana enggo seh maka Kubunuh kerina anak perana i bas keluargandu ras terpukndu, gelah ola lit sekalak dilaki pe i bas keluargandu cawir metua.

³²La banci la susah iakapndu janah morah atendu ngenehen kerina pasu-pasu si Kusehken man kalak Israel si deban, tapi ndigan pe lanai lit i bas keluargandu si nggeluh cawir metua.

³³Tapi sekalak i bas kesusurenndu nari Kupelepas nggeluh, janah ia jadi imam ndahiken dahinKu. Tapi la banci lang pentang ia jenari bene kerina ibunuh kalak.

³⁴Asum anakndu Hopni ras Pinehas mate pagi duana i bas sada wari, e jadi tanda man bandu maka kerina si enggo Kukataken e la banci la jadi.

³⁵AteKu Kupilih sekalak imam si tetap setia man bangKu dingen idahikenna kai dahin si Kusuruh man bana. Kubereken bana kesusuren, si rusur erdahin i bas adep-adepen raja pilihenKu.

³⁶Kasa kesusurenndu lit denga nggeluh, lawes pagi ndahi imam e jenari ipindona duit ras nakan man bana, janah alu nembah-nembah mindo ia gelah iberena min ia nampati imam-imam, gelah lit si man panganna.”