Read Batak Karo 1 SAMUEL 20 Bible Online

1 SAMUEL 20 - Batak Karo bible

1 SAMUEL 20

¹Kenca bage lompat Daud i Nayot i Rama nari lawes ndahi Jonatan. “Kai kin si enggo kubahan?” nina Daud nungkun. “Kejahaten kai kin si enggo kulakoken? Kai kin kesalahen si enggo kubahan man bapandu maka ibunuhna atena aku?”

²Erjabap Jonatan nina, “Labo tuhu e! Labo kam mate. Kerina si ilakoken bapangku, penting ntah lang, iturikenna gelgel man bangku e maka si enda pe labo ia nggit munikenca man bangku. Labo tuhu e!”

³Tapi ngaloi Daud, “Iteh bapandu maka meriah kal iakapndu ras aku janah enggo itetapkenna ukurna maka la ipebetehkenna man bandu kai si enggo itetapkenna, sabap mbiar ia ceda atendu. Ersumpah aku i bas gelar TUHAN si nggeluh maka senjingkang nari ngenca aku sirang i bas kematen nari.”

⁴Nina Jonatan, “Kai pe atendu kulakoken me.”

⁵“Pagi e me Kerja Bulan Mbaru,” nina Daud ngaloi. “Janah arusna la banci lang aku man ras raja. Tapi adi mehuli akapndu, ateku lawes cebuni i bas mbalmbal seh kedun berngi. [23†]

⁶Kune idah bapandu maka aku la ikut ras man, nindulah man bana, ‘Meseksek pemindon Daud man bangku gelah kubere ia mulih ku kutana i Betlehem. Pedas-pedas atena ku jah sabap enggo seh paksana ia sada keluarga nehken persembahen tahunen.’

⁷Adi ikatakenna, ‘Mehuli,’ aku enggo terkelin, tapi adi merawa ia, i je tentu enggo ietehndu maka enggo bulat ukurna nehken si jahat man bangku.

⁸Mekuah min atendu man bangku gelah isehkenndu pemindon enda, janah ola min kam lupa perpadanen si enggo ibahanndu man bangku. Tapi adi ersalah kin aku, kam jinelah munuh aku! Engkai maka aku iendesken man bapandu gelah aku ibunuh?”

⁹“Ola min turah ukur si bage i bas kam,” nina Jonatan ngaloi. “Adi payo kin kueteh maka enggo tetap ukur bapangku nehken si jahat man bandu banci kin la kukataken man bandu?”

¹⁰Kenca bage nungkun Daud nina, “Ise dage kari pebetehkenca man bangku adi merawa-rawa kari pengaloi bapandu man bandu?”

¹¹“Ota kita lawes ndarat ku mbalmbal,” nina Jonatan erjabap. E maka lawes ia duana.

¹²E maka ikataken Jonatan man Daud nina, “TUHAN, Dibata nu Israellah jadi saksinta! Pagi ntah kedun bagi paksa si genduari e ka kusungkuni ateku bapangku. Adi mehuli ukurna man bandu, kuberitaken pagi man bandu.

¹³Adi isurana pagi mahan si jahat man bandu, TUHANlah si munuh aku adi la kupebetehken kerna si e man bandu janah kupelepas kam lawes alu mejuah-juah. TUHANlah ras kam, bagi nai Ia ras bapangku!

¹⁴Janah adi nggeluh denga pagi aku ngarap aku gelah ingetndu padanndu si badia e man bangku janah tetaplah kam setia man bangku. Tapi adi mate aku,

¹⁵cidahkenlah kekelengendu si bage nandangi keluargangku seh rasa lalap. Janah kenca kerina musuh-musuhndu keri ikernepken TUHAN, [24†]

¹⁶ngarap aku maka perpadanen si enggo si ibahan pekepar tetap nteguh. Adi perpadanen enda ilanggar, TUHAN pagi si ngukum kam.”

¹⁷Sekali nari ipindona gelah Daud erpadan ngkelengi ia, sabap Jonatan ngkelengi Daud bagi dirina jine.

¹⁸Kenca bage nina Jonatan man bana, “Erkite-kiteken pagi Kerja Bulan Mbaru, tentu minter teridah maka lanai kam i jenda adi la kam ikut man.

¹⁹Kedun tentu reh tangkasna ka maka lanai kam i jenda. E maka laweslah kam ku inganndu cebuni mbarenda, janah cebunilah kam ku pudi-pudi gun-gunen si i je.

²⁰Kupanahken pagi ku je telu anak panah tempa-tempa lit si man panahen i je.

²¹Kenca bage kusuruh suruh-suruhenku lawes ndaramisa. Janah adi erlebuh aku man bana, ‘Nehenlah, anak panah e kempak enda, buatlah!’ e ertina maka kam terkelin janah banci ndarat. Ersumpah aku i bas gelar TUHAN si nggeluh maka kam la kena bahaya.

²²Tapi adi ningku man bana, ‘Anak panah e kempak ah adah!’ E maka laweslah kam, sabap TUHAN nuruh kam lawes.

²³Kerna padan si enggo ibahan kita pekepar TUHAN kap jadi saksinta.”

²⁴E maka cebuni Daud i bas mbalmbal. Tupung Kerja Bulan Mbaru e, reh Raja Saul ku man-man e,

²⁵janah kundul ia i bas ingan si biasa arah dingding. Abner kundul arah duruna, janah Jonatan kundul petala-tala ras ia. Ingan Daud lume,

²⁶tapi la lit kai pe nina Saul i bas wari e, sabap nina i bas ukurna, “Lit nge kai gia si jadi man bana, janah la ia bersih rikutken aturen agama.”

²⁷Pepagina, sada wari kenca Kerja Bulan Mbaru e, ingan Daud lume denga kang, e maka nungkun Saul man Jonatan, “Engkai maka Daud la reh ku man-man e nderbih ras sendah?”

²⁸Ngaloi Jonatan nina, “Mindo kal ia man bangku gelah kubere ia lawes ku Betlehem.

²⁹‘Berelah aku lawes,’ nina, ‘sabap keluarga kami sangana ngerayaken pesta persembahen i kuta janah isuruh seninangku aku reh ku jah. E maka, adi payokin kam temanku, berelah aku lawes ndahi keluargangku.’ Em sabapna maka la ia ikut man-man ras kam.”

³⁰Merawa kal Saul man Jonatan janah nina man bana, “Anak si kemali! Genduari enggo kueteh maka ikapitindu Daud, jenari ipermelakendu ka gelarndu ras gelar nandendu!

³¹La kin itehndu maka kidekah Daud nggeluh denga ndigan pe la kam banci jadi raja negeri enda? Genduari suruh kalak ndaramisa dingen mabasa ku jenda sebab ia la banci la mate!”

³²“Engkai maka ia arus mate?” nina Jonatan ngaloi. “Kai kin enggo ibahanna?”

³³Ijem ipantemken Saul lembingna kempak Jonatan, munuhsa atena. Arah e enggo iangka Jonatan maka tuhu-tuhu enggo bulat ukur bapana munuh Daud.

³⁴Alu ate si gara keke Jonatan i bas meja e nari janah kai pe la ipanna i bas wari e, wari si peduaken Kerja Bulan Mbaru e. Ceda kal atena ngenehen Daud sabap enggo igombangi Saul ia.

³⁵Pepagina lawes Jonatan ku mbalmbal njumpai Daud, sue ras si enggo ipadankenna. Ibabana sekalak danak-danak ras ia.

³⁶Janah nina man bana, “To kiamken darami anak panah si kupanahken enda.” Kiam danak-danak ndai, janah sanga e ipanahkenna sada anak panah ndauh ngelewati ia.

³⁷Kenca danak-danak ndai seh i bas ingan ndabuh anak panah ndai, erlebuh Jonatan, “Anak panah ndai tole terjadahen!

³⁸Ola kam tedis i je! Pedasken!” Ibuat danak-danak ndai anak panah ndai jenari mulihken ia man tuanna,

³⁹alu la meteh kai e ertina. Jonatan ras Daud ngenca metehsa.

⁴⁰Ibereken Jonatan senjatana man danak-danak e janah isuruhna ia mabasa mulih ku kuta.

⁴¹Kenca enggo lawes danak-danak e, keke Daud i pudi gun-gunen batu e nari, minter ia erjimpuh dingen mungkuk ayona seh ku taneh telu kali. Duana ia siema-eman janahna tangis, seh enggo tetap ka mulihken ukur Daud.

⁴²Kenca bage nina Jonatan kempak Daud, “Berkatlah kam alu mejuah-juah. TUHANlah si petetapsa maka kam ras aku, bage pe kesusurenndu ras kesusurenku, ngasup nepati padan si ibahan kita pekepar i lebe-lebe TUHAN seh rasa lalap.” Kenca bage berkat Daud janah Jonatan lawes mulihken ku kuta.