Read Batak Karo 1 SAMUEL 22 Bible Online

1 SAMUEL 22 - Batak Karo bible

1 SAMUEL 22

¹Lompat Daud i bas kuta Gat nari, ku bas sada gua deherken kuta Adulam. Kenca ibegi senina-senina ras keluargana kerina maka ia enggo i je, idahina ia. [31†]

²Kalak si itindas ntah kalak si lit utangna ntah pe kalak si ermenek ate lawes ndahi ia, lit kira-kira 400 kalak kerina, janah Daud jadi peminpinna.

³I jenari lawes ka Daud ku Mispa i taneh Moap janah ikatakenna man raja Moap nina, “Ngarap aku maka iberendu min bapangku ras nandengku ringan ras kam lebe seh tereteh man bangku kai ate Dibata ibahanNa man bangku.”

⁴E maka itadingken Daud orang tuana ras raja Moap janah i je me ia ringan kidekah Daud cebuni i bas gua e.

⁵Kenca bage reh nabi Gat ndahi Daud, janah ikatakenna man bana nina, “Olanai kam ringan i jenda, minterlah kam lawes ku taneh Juda.” E maka berkat minter Daud ku kerangen Heret.

⁶I bas sada wari Saul sangana i Gibea kundul i teruh batang kayu tamariska i das sada uruk; i bas tanna lit sada lembing janah kerina pegawaina tedis isekelewetna. Man bana iberitaken maka Daud ras temanna enggo teridah.

⁷E maka nina man pegawaina, “Begikenlah o kam kerina kalak Benyamin! Nggit kin iakapndu Daud mereken juma ras peken anggur man bandu kerina, janah ngangkat kam jadi komendan i bas tenterana?

⁸E kin sabapna maka kam erpekat ras ngelawan aku? La lit sekalak pe kam ngatakenca maka anakku jine enggo mpersada arihna ras Daud. La lit sekalak pe si erkuah ate man bangku ntah pe ngatakenca man bangku maka Daud sekalak i bas suruh-suruhenku nari ndarami kesempaten munuh aku, janah i bas si e iajuk-ajuk anakku ia!”

⁹Doek sangana tedis i je ras pegawai-pegawai Saul e maka nina, “Kuidah Daud ndahi Ahimelek anak Ahitup i kuta Nop. [32†]

¹⁰Ahimelek nungkun man TUHAN kai arus ibahan Daud, janah kenca e iberekenna man Daud nakan ras pedang Goliat kalak Pilisti e.”

¹¹E maka isuruh Raja Saul ngelegi Imam Ahimelek ras kerina kade-kadena si jadi imam i kuta Nop, e maka reh ia kerina ndahi Saul.

¹²Ngerana Saul man Ahimelek nina, “Begiken Ahimelek!” “Ue Raja,” nina ngaloi.

¹³Nungkun Saul man bana, “Engkai maka kam ras Daud erpekat ngelawan aku? Engkai maka iberekenndu man bana nakan ras pedang, janah isungkunndu Dibata guna ia? Genduari enggo ia erkusur ngelawan aku janah itimaina kesempaten lako munuh aku!”

¹⁴Ngaloi Ahimelek nina, “Daud kap pegawaindu si setia! Ia kelandu, kepala pasuken pengawalndu, janah kerina kalak i bas istanandu mujiken ia.

¹⁵Ue, payo tuhu kusungkuni Dibata kerna ia, janah labo e si pemenana. Adi kerna erpekat ngelawan kam, la patut ituduhndu aku ntah ise pe i bas keluargangku, o Raja. Sitik pe la lit kueteh kerna si e!”

¹⁶Nina raja, “O, Ahimelek, kam ras kerina kade-kadendu la banci lang mate.”

¹⁷Jenari iperentahkenna man pengawal-pengawal si tedis deherken ia nina, “Bunuhlah imam-imam TUHAN e! Erpekat ia ras Daud janah la iturikenna man bangku maka ia enggo kiam lawes, aminna gia ietehna si e gelgel.” Tapi la nggit pengawal-pengawal e nehken tanna munuh imam-imam TUHAN.

¹⁸E maka nina Saul man Doek, “Kam munuhsa!” Jenari ibunuh Doek ia kerina. I bas wari e ibunuhna waluh puluh lima imam si banci atan maba epod.

¹⁹Kerina anak kuta Nop pe, kuta imam-imam e, iperentahken Saul gelah ibunuh, dilaki ras diberu, danak-danak ras si mbaru tubuh, lembu, kelede, ras biri-biri kerina ibunuh.

²⁰Tapi Abiatar, sekalak i bas anak-anak Ahimelek sempat luah jenari lawes ia ersada ras Daud.

²¹Iturikenna man bana kuga Saul enggo munuh imam-imam TUHAN.

²²Nina Daud man bana, “Asum kuidah Doek i je i bas wari e, kueteh nge ugapa pe ikatakenna nge man Saul. E maka aku nge si ertanggung jawab kerna kematen kerina kade-kadendu.

²³Raslah kita janah ola kam mbiar. Ibunuh Saul atena kita duana, tapi kam la banci la terkawal ras aku.”