Read Batak Karo 1 SAMUEL 3 Bible Online

1 SAMUEL 3 - Batak Karo bible

1 SAMUEL 3

¹Tupung paksa Samuel anak-anak denga, sangana ndahiken dahin TUHAN i teruh pinpinen Eli. La lit piga kali reh berita i bas TUHAN nari janah pengenehenen pe merak-rak ngenca.

²I bas sada berngi Eli si menam-menam pentang sangana medem i bas kamarna.

³Samuel sangana medem i bas Kemah TUHAN i bas ingan Peti Perpadanen sibadia. Ope denga siang asum lampu gara denga,

⁴erlebuh TUHAN nina, “O Samuel! Samuel!” Ngaloi ia nina, “Kai Bapa?”

⁵Jenari minter ia kiam ndahi Eli nina, “Idilondu aku ndai Bapa? Enda aku.” Tapi nina Eli erjabap, “La lit kam kudilo, to pedemken mulihi.” E maka mulihken Samuel medem.

⁶ [6-7] Ilebuh TUHAN ka mulihken Samuel. La ietehna maka TUHAN kepe si erdilo e, sabap ope denga si e TUHAN langa pernah ngerana man bana. E maka minter ia keke, lawes ndahi Eli nina, “Idilondu aku ndai Bapa? Enda aku.” Tapi nina Eli erjabap, “Anakku, la lit kam kudilo, to pedemkenlah mulihi.”

⁸Erlebuh ka TUHAN petelu kaliken man Samuel, minter ia keke, idahina Eli, janah nina, “Idilondu aku ndai Bapa? Enda aku.” Kenca bage iangka Eli maka TUHAN nge si erlebuh man anak e,

⁹e maka ikatakenna man bana nina, “To mulihkenlah kam medem, adi erlebuh ka Ia nindulah, ‘Ngeranalah Kam TUHAN, aku suruh-suruhenNdu enggo sikap megikenca.’ ” E maka mulihken Samuel medem.

¹⁰Reh TUHAN janah tedis Ia i je. Jenari erlebuh Ia bagi si ndai nina, “Samuel! Samuel!” Ngaloi Samuel nina, “Ngeranalah, aku suruh-suruhenNdu enggo sikap megikenca.”

¹¹Nina TUHAN man bana, “I bas sada paksa ateKu ngelakoken perbahanen i tengah-tengah bangsa Israel si seh kal belinna ras mejinna seh maka si megisa kerna si e la banci lang erdeping nari nge cupingna.

¹²I bas wari e ateKu nehken ancamenKu man keluarga Eli, bena-benana nari seh ku pendungina.

¹³Enggo Kukataken man bana maka ateKu ngukum keluargana seh rasa lalap erkite-kiteken jahat cakap anakna man bangKu. Ieteh Eli perbahanenna enda tapi la ilarangna anak-anakna e.

¹⁴Tuhu-tuhu katangKu man keluarga Eli maka la lit persembahen gelehen ntah persembahen si deban si banci nangtangi akibat dosa si mejin enda.”

¹⁵Samuel medem seh erpagi-pagi, jenari keke ia italangina kerina pintun Rumah Pertoton. Mbiar ia nurikenca pengenehen e man Eli.

¹⁶Idilo Eli ia nina, “O Samuel, anakku!” “Kai Bapa?” nina Samuel ngaloi.

¹⁷“Kai si ikataken TUHAN man bandu?” nina Eli nungkun. “Ola buniken sada pe man bangku. La banci la mberat ukumenndu ibahan Dibata adi la iturikenndu man bangku kerina si ikatakenNa.”

¹⁸E maka ituriken Samuel kerina man Eli, sada pe la lit ibunikenna. Nina Eli, “Ia kap TUHAN, ibahanNalah kai ateNa si mehulina.”

¹⁹Samuel erbelinna, TUHAN tetap ras ia janah isehkenNa kerina si ikataken Samuel.

²⁰E maka kerina bangsa Israel i belang-belang negeri e, meteh maka Samuel tuhu-tuhu sekalak nabi TUHAN.

²¹ TUHAN terus encidahken baNa i Silo, i ja Ia enggo teridah man Samuel janah ngerana man bana. Janah adi ngerana kenca Samuel, kerina Israel megikenca.