Read Batak Karo 1 SAMUEL 30 Bible Online

1 SAMUEL 30 - Batak Karo bible

1 SAMUEL 30

¹Dua wari kenca si e seh Daud ras teman-temanna i Siklak. Alu la isangka-sangka enggo iserang bangsa Amalek taneh Juda Selatan janah enggo ikernepkenna Siklak. Enggo icilukna kuta e,

²janah kerina diberu-diberu itabanna; la lit sekalak pe ibunuhna, tapi enggo ibabana kerina lawes.

³Kenca Daud ras teman-temanna seh, idapetina maka kuta e enggo keri meseng, janah ndehara-ndeharana, anak-anakna si dilaki ras si diberu enggo ibabaken lawes.

⁴Daud ras teman-temanna tangis la erngadi-ngadi seh ia enggo ngelabuh kerina.

⁵Ndehara Daud pe duana, Ahinoam ras Abigail, enggo ibabaken kalak lawes. [42†]

⁶Genduari Daud lit i bas keguluten si mbelin sabap ngilas kal ate teman-temanna kerina kerna kebenen anak-anakna e, janah ibenterina atena Daud alu batu; tapi TUHAN Dibatana mereken ukur si tetap man bana.

⁷Nina Daud man Imam Abiatar anak Ahimelek, “Baba man bangku epod e.” E Maka ibaba Abiatar man bana. [43†]

⁸Nungkun Daud man TUHAN nina, “Kuayaki nge pengerampok e? Tunduk aku denga nge ndia ia?” Ngaloi Ia nina, “Ayakilah; tundukndu denga nge ia janah banci ipulahindu tabanen e.”

⁹E maka minter berkat Daud ras temanna si 600 kalak ndai, janah kenca enggo seh i Lau Besor, piga-piga kalak ia tading i je.

¹⁰Daud nerusken perdalanenna ras 400 kalak temanna; si 200 kalak nari lanai ngasup ngepari lau e perban enggo latihsa akapna, e maka tading ia.

¹¹Kalak si ikut ras Daud njumpai sekalak anak perana kalak Mesir i bas mbalmbal jenari ibabana ku Daud. Ibere kalak ndai ia man ras minem,

¹²e me buah ara si enggo ikerahken, ras dua tandan buah anggur si enggo ikerahken. Kenca elah man, enggo ka reh gegehna; enggo telu wari telu berngi ia la lit man ntah minem kai pe.

¹³Isungkuni Daud ia, “Ise tuanndu janah i ja nari kam?” “Aku bangsa Mesir budak kalak Amalek,” nina ngaloi. “Telu wari si enggo lepas itadingken tuanku aku erkite-kiteken aku sakit.

¹⁴Enggo iserang kami daerah Kereti i bagin Selatan Juda daerah terpuk Kalep, janah iciluk kami kuta Siklak.”

¹⁵“Nggit kam mabai kami ku pengerampok e?” nina Daud nungkun ia. Ngaloi ia, “Adi ersumpahlah kam i bas gelar Dibata maka la aku ibunuhndu ntah ndudurken aku man tuanku, nggit aku naruhken kam.”

¹⁶Jenari itaruhkenna Daud ku kalak ndai. Perampok-perampok e merap kerina i belang-belang ingan e, sangana man ras minem, janahna erpesta erkite-kiteken seh kal buena barang rampasen si ibuatna i bas taneh Pilisti ras Juda nari.

¹⁷Pepagina, enggo kenca terang, iserang Daud perampok-perampok e janah ibunuhina seh ben. La lit sada pe si luah, seakatan 400 anak perana si lawes ngersak unta.

¹⁸Kasa si enggo itaban kalak Amalek ndai ipulahi Daud kerina, ikut pe ndeharana si dua e.

¹⁹La lit sada kal pe si bene. Kerina ibaba Daud mulih, subuk anak-anak dilaki ras anak diberu teman-temanna, ras kerina barang-barang rampasen si enggo ibuat bangsa Amalek.

²⁰Kerina biri-biri ras lembu pe idatca, igera kalak ndai kerina asuh-asuhen e arah lebe-lebena janah nina, “Enda sikerajangen Daud!”

²¹Kenca bage lawes mulihken Daud ndahi temanna si 200 kalak ndai si lanai ngasup erdalan ras ia janah enggo tading i Lau Besor. Reh ia kerina ngalo-ngalo Daud ras temanna, janah Daud erdalan ndeheri ia kerina jenari isalamina alu ukur meriah.

²²Tapi ngerana piga-piga kalak si jahat ras la terpake si enggo lawes ras Daud nina, “Kalak enda la ikut ras kita e maka la kami nggit merekenca sitik pe man kalak enda barang-barang rampasen e. Ndeharana ras anak-anakna banci ibuatna, jenari mulih ia.”

²³Tapi nina Daud ngaloi, “O senina-seninangku, la banci bage perbahanenndu kerna kai si enggo ibereken TUHAN man banta! IkawaliNa kita janah iberekenNa man banta kemenangen ngelawan perampok-perampok e.

²⁴Labo ise pe nggit ngikutken kata si ibelaskenndu e! Kerina la banci la ngaloken bagin si seri: kalak si tading ngiani barang-barang ndat bagin si seri ras kalak si lawes erperang.”

²⁵Ibahan Daud enda jadi sada peraturen, janah mulai i bas paksa e nari peraturen e iikutken i Israel.

²⁶Kenca Daud enggo mulih ku Siklak, itenahkenna sada bagin i bas barang-barang rampasen e man teman-temanna, peminpin-peminpin negeri Juda, alu berita, “Enda pemere man bandu i bas barang-barang rampasen si ibuat kami i bas musuh-musuh TUHAN nari.”

²⁷Ikirimkenna e man anak kuta Betel, Rama i bagin Selatan Juda, ras man anak kuta Jatir,

²⁸Aroer, Sipmot, Estemoa,

²⁹ras Rakal; man terpuk Jerahmeel, man kalak Keni,

³⁰ras man anak kuta Horma, Borasan, Atak,

³¹ras Hebron. Ikiremkenna hadiah-hadiah e ku kerina ingan si enggo isiarna ras teman-temanna.