Read Batak Karo 1 SAMUEL 31 Bible Online

1 SAMUEL 31 - Batak Karo bible

1 SAMUEL 31

¹Bangsa Pilisti erperang ngelawan bangsa Israel i Deleng Gilboa. Nterem bangsa Israel mate i je, janah si debanna subuk Raja Saul ras anak-anakna enggo lompat.

²Tapi itunduk kalak Pilisti jenari ibunuh kalak ndai telu kalak anak Saul: Jonatan, Abinadap, ras Milkisua.

³Pertempuren e seh kal sangatna isekelewet Saul, jenari ia jine kena panah musuh janah mekelek lukana.

⁴Ikatakenna man anak perana si maba senjatana nina, “Sentapken pedangndu, jenari bunuh aku, gelah ola pagi iguro-guroken bangsa Pilisti si la erdibata enda aku jenari ibunuhna.” Tapi la nggit anak perana ndai erbahan si e, mbiar ia. E maka ibuat Saul pedangna e jenari ibulakkenna bana ku ujung pedang e.

⁵Iidah anak perana ndai maka enggo mate, e maka ibulakkenna ka man bana ku ujung pedangna jenari mate ia ras Saul.

⁶Bage me dalanna Saul, anakna si telu kalak, ras anak perana ndai mate; kerina kalak si ras Saul mate i bas wari e.

⁷Kenca enggo ieteh bangsa Israel si arah lepar Baluren Jesreel ras si arah Timur Lau Jordan maka tentera bangsa Israel enggo kiam janah Saul ras anak-anakna enggo mate, itadingkenna kerina kutana jenari lompat ia. Kenca bage reh kalak Pilisti nciatisa.

⁸Pepagina kenca perang e, irampasi bangsa Pilisti barang-barang kalak si mate e, janah idahna mait Saul ras anakna si telu ampar i Deleng Gilboa.

⁹Ibuatna takal Saul, itangtangina paken perangna, jenari isuruhna persuruhen mabasa ku kerina taneh Pilisti nuriken berita si mehuli man sembah-sembahen ras man rayatna kerina.

¹⁰Kenca bage itamakenna senjata Saul i bas rumah pertoton man Dewi Astarte, janah maitna ipakukenna i bas tembok kuta Bet-San.

¹¹Kenca anak kuta Jabes i Gileat megi kai si enggo ibahan bangsa Pilisti man Saul,

¹²minter berkat piga-piga kalak si merawa janah erdalan ia gedang-gedang berngi ku Bet-San. Ibuatna mait Saul ras anak-anakna i bas tembok e nari, ibabana mulih ku Jabes, jenari itutungna.

¹³Kenca bage ibuatna tulan-tulanna janah ikuburkenna i teruh batang tamariska i bas kuta e, jenari erpuasa ia pitu wari dekahna.