Read Batak Simalungun 1 MUSA 1 Bible Online

1 MUSA 1 - Batak Simalungun bible

1 MUSA 1

¹Bani mula ni mulani itompa Naibata ma langit pakon tanoh.

²Tapi seng marrumang anjaha lumei do tanoh on; hagolapan do manrongkob luhung ai,anjaha mayap-ayap do Tonduy ni Naibata i atas bah ai.

³Dob ai marsahap ma Naibata, “Jadi ma ho na lihar!” Gabe lihar ma tongon.

⁴Iidah Naibata ma na dob dear na lihar ai; isirang Naibata ma na lihar ai humbani na golap ai.

⁵Jadi igoran Naibata ma na lihar ai arian, anjaha na golap ai igoran borngin. Bod ma ari, siang ma ari use, ai ma ari na parlobei.

⁶Dob ai marsahap ma Naibata, “Jadi ma ho hajangkajang iparsitongahan ni sagala bah, bahen parsirangan ni bah humbani bah!”

⁷Ibahen Naibata ma hajangkajang ai gabe parsirangan ni bah na i toruh ni hajangkajang ai humbani bah na i atas hajangkajang ai. Anjaha jadi ma sonai.

⁸Igoran Naibata ma hajangkajang ai langit. Bod ma ari, siang ma ari use, ai ma ari na paduahon.

⁹Marsahap ma use Naibata, “Martumpu ma sagala bah na i toruh ni langit in hubani sada ianan, ase taridah na horah.” Anjaha jadi ma sonai.

¹⁰Igoran Naibata ma na horah ai tanoh, anjaha partumpuan ni bah ai igoran laut. Iidah Naibata ma, domma dear ai.

¹¹Marsahap ma use Naibata, “Ipantubuhkon tanoh in ma poyon-poyon, suan-suanan na marbatu, ampa hayu na marbuahkon buah na marbatu, marsiboan masamni i tanoh on.” Anjaha jadi ma sonai.

¹²Ipantubuhkon tanoh in ma poyon-poyon, suan-suanan na marbatu marsiboan masamni ampa hayu na marbuahkon buah na marbatu marsiboan masamni. Iidah Naibata ma, na dob dear ai.

¹³Bod ma ari, siang ma ari use, ai ma ari na patoluhon.

¹⁴Marsahap ma use Naibata, “Jadi ma panondang i hajangkajang ni langit in, bahen parsirangan ni arian pakon borngin, bahen tanda pakon titi ni panorang, ari pakon tahun,

¹⁵bahen panondang i hajangkajang ni langit in, laho manondangi tanoh on!” Anjaha jadi ma sonai.

¹⁶Jadi itompa Naibata ma dua panondang bolon; panondang sibanggalan ai manrajai arian, panondang sietekan ai manrajai borngin. Itompa do homa bintang-bintang.

¹⁷Inahkon Naibata ma sidea hu hajangkajang ni langit ai laho manondangi tanoh on,

¹⁸laho manrajai arian pakon borngin ampa manirang na lihar humbani na golap. Iidah Naibata ma, domma dear ai.

¹⁹Bod ma ari, siang ma ari use, ai ma ari na paompatkon.

²⁰Marsahap ma Naibata use, “Manjuluri ma ibagas bah in na tinompa na manggoluh, anjaha marhabangan ma manuk-manuk i atas ni tanoh, ibagas hajangkajang ni langit in!”

²¹Jadi itompa Naibata ma binatang laut na banggal-banggal pakon sagala na tinompa na marhosah na manggoluh ibagas bah, marsiboan masamni, ampa sagala manuk-manuk na marhabong, marsiboan masamni. Iidah Naibata ma, domma dear ai.

²²Ipasu-pasu Naibata ma ganupan ai, nini ma, “Manggompari anjaha lambin gargar ma hanima, goki hanima ma bah ni laut in;” lambin bueini ma homa manuk-manuk i atas tanoh on.

²³Bod ma ari, siang ma ari use, ai ma ari na palimahon.

²⁴Marsahap ma use Naibata, “Ipantubuhkon tanoh in ma na tinompa na manggoluh, marsiboan masamni, pinahan, binatang na manjulur pakon binatang na i talun marsiboan masamni.” Anjaha jadi ma sonai.

²⁵Jadi itompa Naibata ma binatang-binatang marsiboan masamni, pakon pinahan marsiboan masamni, ampa sagala binatang na manjulur i atas tanoh on, marsiboan masamni. Iidah Naibata ma, domma dear ai.

²⁶Marsahap ma use Naibata, “Tompa Hita ma jolma songon rupan-Ta, pakon songon parlahouta, ase irajai sidea dengke na i laut, manuk-manuk na i awang-awang, pinahan, pakon ganup tanoh on, ampa sagala binatang na manjulur i atas tanoh on.”

²⁷Jadi itompa Naibata ma jolma in songon rupa-Ni, songon rupa ni Naibata do itompa sidea; dalahi pakon naboru do sidea itompa.

²⁸Dob ai ipasu-pasu Naibata ma sidea, nini ma dompak sidea, “Manggompari anjaha lambin manggargar ma hanima, goki hanima ma tanoh on anjaha patunduk ma in; rajai hanima ma dengke na i laut, manuk-manuk na i awang-awang, pakon sagala binatang na manjulur i atas tanoh on.”

²⁹Marsahap ma use Naibata, “Hubere ma bennima sagala suan-suanan na marbatu bani sab tanoh on, ampa sagala hayu na marbuahkon buah na marbatu, ai ma gabe sipanganonnima.

³⁰Tapi bani haganup binatang na iatas tanoh on, haganup manuk-manuk na i awang-awang ampa haganup na manjulur i atas tanoh on, sagala na marhosah, poyon pakon naporon na maratah ma Hubere panganon ni sidea.” Anjaha jadi ma sonai.

³¹Jadi iidah Naibata ma sagala na tinompa-Ni ai, domma dear tumang. Bod ma ari, siang ma ari use, ai ma ari na paonomkon.