Read Batak Simalungun 1 MUSA 12 Bible Online

1 MUSA 12 - Batak Simalungun bible

1 MUSA 12

¹Dob ai nini Jahowa ma hubani si Abram, “Bungkas ma ho hun tanoh hagodanganmu, humbani diha-dihamu ampa hun rumah ni bapamu hu tanoh sipatuduhon-Ku hu bam.

²Hubahen pe ho gabe sada bangsa na banggal; Hupasu-pasu pe ho anjaha Hupabanggal goranmu, ase gabe pasu-pasu ho.

³Pasu-pasuon-Ku do na mamasu-masu ho, anjaha papaan-Ku na mamapai ho; dapotan pasu-pasu ma marhitei ho haganup bangsa na i tanoh on.”

⁴Jadi bungkas ma si Abram, songon na hinatahon ni Jahowa bani; bungkas ma homa si Lot rap pakonsi. Marumur pitu puluh lima tahun do si Abram, sanggah na bungkas ai ia hun Haran.

⁵Iboan si Abram ma si Sarai parinangonni ai, pakon si Lot anak ni saninani ai, ampa sagala arta-arta na sinarini, ronsi halak na nibolini i Haran, jadi misir ma sidea hu tanoh Kanaan. Dob das sidea i tanoh Kanaan,

⁶ibontas si Abram ma tanoh ai das hu ianan Sikem, das ronsi tombak More. Bani panorang ia domma marianan halak Kanaan i tanoh ai.

⁷Dob ai ipatalar Jahowa ma diri-Ni bani si Abram, nini ma, “Hubani ginomparmu ma bereon-Ku tanoh on.” Jadi ipajongjong si Abram ma ijai sada anjapanjap bani Jahowa na patalar diri-Ni hu bani.

⁸Hunjai bungkas ma ia hu pardologan hampit hapoltakan ni Betel ampa hapoltakan ni huta ai; ipauli ma ijai sada anjapanjap bani Jahowa, anjaha ipadilo-dilo ma goran ni Jahowa.

⁹Dob ai bungkas ma use si Abram laho dompak dangsina.

¹⁰Masa ma lohei i tanoh ai, jadi tuad ma si Abram hu tanoh Masir, sihol manginsolat ijai, halani lohei maningting do i tanoh ai.

¹¹Marayak das ia hu tanoh Masir, nini ma bani si Sarai parinangonni ai, “Hubotoh do, puang-puang sijenges rupa do ho.

¹²Anggo iidah halak Masir ho, hatahonon ni sidea ma, ʻParinangonni do on,ʼ gabe bunuhon ni sidea ma ahu, tapi anggo ho pagoluhonni do.

¹³Mahua hatahon ma, botouhu do ho, ase sonang ahu ibahen sidea halani ho, anjaha manggoluh hosahku marhalanihon ni ho.”

¹⁴Dob das si Abram i tanoh Masir, iidah halak Masir ai ma, na jenges tumang do puang-puang ai.

¹⁵Dob iidah gamot-gamot ni Parao ia, ipapuji-puji ma ia hubani Parao; jadi iboan ma puang-puang ai hu rumah ni Parao.

¹⁶Ipadear ma pambahenni hubani si Abram, marhalanihon ni puang-puang ai, gabe dapotsi ma biribiri, lombu, halode, jabolon dalahi pakon jabolon naboru ampa unta.

¹⁷Jadi ihonahon Jahowa ma sitaronon bolon hubani Parao pakon hasomanni sarumah, halani si Sarai, parinangon ni si Abram ai.

¹⁸Idilo Parao ma si Abram, nini ma, “Aha do na binahenmon bangku? Mase ma lang ipatugah ho hu bangku, parinangonmu do ia hape?

¹⁹Mase ma ihatahon ho, botouhu do ia? Sihol buatonku ma ia gabe parinangonku. On pe, na ma parinangonmon, buat ma, dob ai laho ma ho!”

²⁰Anjaha iparentahkon Parao ma juakjuakni bahen hasomanni pataruhkonsi ampa parinangonni ai ampa haganup na dong bani.