Read Batak Simalungun 1 MUSA 13 Bible Online

1 MUSA 13 - Batak Simalungun bible

1 MUSA 13

¹Jadi tangkog ma si Abram hun Masir hu tanoh Dangsina, ia pakon parinangonni, pakon ganup na adong bani, ampa si Lot rap pakonsi.

²Bayak tumang do si Abram, buei do pinahan, pirak pakon omasni.

³Inunuti ma dalanni hun Dangsina das hu Betel, ronsi das bani ianan hajongjongan ni lampolamponi hinan, i holangkolang ni Betel pakon Ai,

⁴hu ianan ni anjapanjap na pinaulini ai hinan ijai; ipadilo-dilo si Abram ma ijai goran ni Jahowa.

⁵Si Lot pe homa, na dihut rap pakon si Abram, marbiribiri, marlombu ampa marlampolampo do.

⁶Jadi lang tarsarihon tanoh ai be sidea, anggo rap marianan; ai buei tumang do arta ni sidea, seng boi be rap sidea marianan.

⁷Halani ai masa ma paringoran i tongah-tongah ni parmahan ni si Abram ampa parmahan ni si Lot. Halak Kanaan pakon halak Perisi do ijia marianan i tanoh in.

⁸Nini si Abram ma bani si Lot, “Ulang ma adong partinggilan i tongah-tongahmu pakon i tongah-tongahku, ai na marsanina do hita.

⁹Ai lang i lobeimu do ganup tanoh in? Sirang ma ho humbangku! Anggo hu sambilou ho, hu siamun ahu, anggo hu siamun ho, hu sambilou ahu.”

¹⁰Jadi itatap si Lot ma, iidah ma jenges do haganup parmarbah ni pamah Jordan ai. Sanggah lape iripaskon Jahowa Sodom pakon Gomora, songon pohon ni Jahowa, songon tanoh Masir do pamah ai das hu Zoar.

¹¹Ipilih si Lot ma haganup bani, haganup pamah Jordan ai; laho ma si Lot hampit Purba, jadi marsirang ma sidea.

¹²Marianan i tanoh Kanaan do si Abram, tapi si Lot marianan do i huta-huta na i pamah ai, anjaha mosor-osor do ia marlampolampo ronsi das hu Sodom.

¹³Tapi halak na jahat anjaha pardousa banggal do pangisi ni Sodom ai i lobei ni Jahowa.

¹⁴Jadi nini Jahowa ma dompak si Abram dob na sirang ai si Lot humbani, “Tatap ma humbani ianan hajongjonganmin dompak utara pakon dangsina, dompak hapoltakan pakon hasundutan.

¹⁵Tongon, haganup tanoh na tinatapmin, berehonon-Ku do in hubam, pakon hubani ginomparmu ronsi sadokah ni dokahni.

¹⁶Anjaha bahenon-Ku do ginomparmu songon orbuk ni tanoh bueini, anjaha anggo tarhira jolma orbuk ni tanoh, tarhirai ma homa ginomparmu.

¹⁷Misir ma ho, siar ma tanoh in mangihutkon ganjang ampa bolagni, ai hubam do in berehonon-Ku.”

¹⁸Dob ai iosor si Abram ma lampolamponi, laho ma ia marianan hu tombak Mamre na i Hebron, anjaha ipajongjong ma ijai sada anjapanjap bani Jahowa.