Read Batak Simalungun 1 MUSA 15 Bible Online

1 MUSA 15 - Batak Simalungun bible

1 MUSA 15

¹Ipudi ni na masa on, roh ma hata ni Jahowa hubani si Abram ibagas sada panonggoran, nini ma, “Ulang ho mabiar, ale Abram, Ahu do gantarmu; banggal tumang do upahmu.”

²Tapi nini si Abram ma, “Ham Tuhan Jahowa, aha ma bereon-Mu bangku, ai na popor do ahu, si Elieser, na hun Damaskus mando sitean rumahku.”

³Nini si Abram ope, “Seng dong ginompar ibere Ham bangku; jabolon na tubuh i rumahku ma sitean ahu.”

⁴Dob ai roh ma hata ni Jahowa hu bani, “Seng ia manean ho, tapi anakmu sandiri do manean ho.”

⁵Iboan ma ia hu darat, anjaha nini ma, “Torih ma hu langit ai, bilangi ma bintang ai, atap tarbilangi ho do ai.” Ihatahon ma use hu bani, “Sonai ma ginomparmu holi.”

⁶Porsaya ma si Abram bani Jahowa, anjaha ai ma ihira Jahowa gabe hapintoronni.

⁷Ihatahon ma hu bani, “Ahu do Jahowa na padaratkon ho hun Ur-Kasdim, laho mamberehon tanoh on bam jadi siteanonmu.”

⁸Nini si Abram ma, “Ham Tuhan Jahowa, hunja ma botohonku, ahu sihol sitean ai?”

⁹Nini ma hu bani, “Buat ma Bangku sada lombu na marumur tolu tahun, sada hambing na marumur tolu tahun, sada biribiri tunggal na marumur tolu tahun, sada kuhui pakon sada anak ni asas.”

¹⁰Ibuat ma ganupan ai bani Tuhan, ipardostongah ma ai anjaha ibatur, tapi anggo manuk-manuk ai seng ibolah.

¹¹Marsogopan ma manuk-manuk panoroh hubani gulei na ginalangkon ai, jadi iosiki si Abram ma ai.

¹²Sanggah na laho sundut mata ni ari, tarpodom ma si Abram, sinok tumang, jadi sogop ma bani hasonggotan pakon hagolapon bolon.

¹³Dob ai nini Jahowa ma hubani si Abram, “Ulang lang ibotoh ho manginsolat do magira ginomparmu bani na so tanohni; parjabolonon anjaha arsikon ni halak ma sidea ompat ratus tahun dokahni.

¹⁴Tapi bangsa na marjabolonkon sidea pe uhumon-Ku do, dob ai kaluar ma sidea mararta na mabuei.

¹⁵Anggo ho parayakonmu ma ompungmu mardamei-damei, dob sayurmatua pe ho tanomon.”

¹⁶Paompat sundutkon mulak ma sidea, ai lang ope gok hajahaton ni halak Amori.

¹⁷Dob sundut mata ni ari anjaha golap marimpot-impot, tonggor ma sada pamurunan na martimus ampa sada sipu-sipu na gara montas i holangkolang ni gulei na tinoktokan ai.

¹⁸Bani ari ai ma marpadan Jahowa pakon si Abram, nini ma, “Hubani ginomparmu do bereon-Ku tanoh on, singgan ni bah Masir das ronsi bah bolon ai, ai ma bah Eprat,

¹⁹tanoh na niianan ni halak Keni, halak Kenisi pakon halak Kadmoni,

²⁰halak Het, halak Peresi, halak Refaim,

²¹halak Amori, halak Kanaani, halak Girgasi pakon halak Jebusi.”