Read Batak Simalungun 1 MUSA 16 Bible Online

1 MUSA 16 - Batak Simalungun bible

1 MUSA 16

¹Ia si Sarai, parinangon ni si Abram, seng dong tubuhan tuah. Tapi dong do sada jabolonni naboru, halak Masir, na margoran si Hagar.

²Nini si Sarai ma hubani si Abram, “Ibotoh ham do, ilanglangi Jahowa do tubuhan tuah ahu; dear do parayakonmu jabolonkai, andohar dapotan tuah ahu humbani.” Itangihon si Abram ma hata ni si Sarai ai.

³Jadi ibuat si Sarai, parinangon ni si Abram ai ma si Hagar, jabolonni boru Masir ai, ibere ma ia hubani si Abram, paramangonni ai, ai ma dob marianan si Abram i tanoh Kanaan sapuluh tahun dokahni.

⁴Iparayak si Abram ma si Hagar, jadi boratan rumah ma ia. Dob iahapkon domma boratan rumah ia, pis ma matani mangidah si Sarai.

⁵Nini si Sarai ma hubani si Abram, “Marsapata hu bamu do ahu; hubere do jabolonku hu bamu, hape dob ibotoh na dob boratan rumah ia, gabe pis matani mangidah ahu; Jahowa ma panguhum banta.”

⁶Nini si Abram ma hubani si Sarai, “Gok bam ma jabolonmin, bahen ma rosuh ni uhurmu hu bani.” Jadi iarsik si Sarai ma jabolonni ai, gabe laho ma ia lintun hun lobeini.

⁷Tapi jumpah malekat ni Jahowa ma ia i lambung ni sada bah tubuh i halimisan, ai ma i lambung ni bah tubuh bani dalan laho hu Sur.

⁸Nini ma, “Roh hunja anjaha laho huja do ho Hagar, jabolon ni si Sarai?” Balosni, “Na lintun do ahu hun lobei ni si Sarai tondokankin.”

⁹Nini malekat ni Jahowa ma hu bani, “Mulak ma ho hubani tondokanmai, paunduk ma dirimu hu toruh ni kuasani!”

¹⁰Ambah ni ai nini malekat ni Jahowa ma hu bani, “Buei tumang do bahenonku ginomparmu, gabe seng tarhira halani bueini.”

¹¹Nini malekat ni Jahowa ma use hu bani, “Tonggor ma, domma boratan rumah ho, tubuhan anak ma ho, bahen ma goranni si Ismael, ai itangihon Jahowa do hasombuhonmu.

¹²Sada jolma na songon halode liar do ia magira. Tanganni mangimbang ganup jolma, anjaha tangan ni ganup jolma mangimbangsi, anjaha marianan ma ia patontang ampa haganup saninani.”

¹³Jadi ibahen si Hagar ma goran ni Jahowa na mansahapkonsi ai, “Ham do Naibata Sipanatap.” Ai nini do: Tongon, ijon do huidah Ia, si Tatap ahu.

¹⁴Halani ai igoran ma parigi ai: Parigi Lachai-Roi, ai ma na i holangkolang ni Kades pakon Bered.

¹⁵Dob ai itubuhkon si Hagar ma sada anak bani si Abram, jadi ibahen si Abram ma goran ni anakni, na tinubuhkon ni si Hagar ai, si Ismael.

¹⁶Marumur ualuh puluh onom tahun do si Abram, sanggah na tinubuhkon ni si Hagar si Ismael bani.