Read Batak Simalungun 1 MUSA 18 Bible Online

1 MUSA 18 - Batak Simalungun bible

1 MUSA 18

¹Dob ai ipataridahkon Jahowa ma diri-Ni bani i tombak More, sanggah hundul ia bani labah ni lampolamponi, bani pardeteng ni ari.

²Mangkawah ma ia, gabe ididah ma tolu halak jongjong i lobeini; dob iidah sidea marlintun ma ia humbani labah ni lampolampo ai, manjumpahkon sidea lanjar manrogop ma ia.

³Nini ma, “Ham Tuhanku, anggo dapotan idop ni uhur do ahu i lobeimu, sai ulang ma laosi ham jabolonmu on.

⁴Mahua ma nabuat bah otik, ase iburihi nasiam nahei nasiam, dob ai marsaran ma nasiam i toruh ni hayu on,

⁵ase hualop roti otik, gabe margogoh nasiam use; dob ai toruskon nasiam ma pardalanan nasiam. Ai lang halani in do ase roh nasiam hubani jabolon nasiam on?” Ihatahon sidea ma, “Bahen ma songon na hinatahonmin!”

⁶Dob ai tarolos ma si Abraham laho hu lampolamponi, hubani si Sarah, nini ma, “Buat ma podas tolu tumba nitak, agu ma ai anjaha masak ma ruti!”

⁷Marlintun ma si Abraham marayak lombuni, ibuat ma sada anak ni lombu na mombur anjaha na jenges ibere ma ai hubani jabolonni, jadi podas ma ai ipauli sidea.

⁸Ibuat si Abraham ma dadih na nialhotan pakon dadih na matah sonai homa anak ni lombu na dob pinauli ai, jadi iidangkon ma ai i lobei ni sidea; jongjong do anggo ia i lambung ni sidea, i toruh ni hayu ai, sanggah na mangan ai sidea.

⁹Dob ai nini sidea ma hu bani, “Ija do si Sarah parinangonmu ai?” Balosni, “Ibagas lampolampo an do ia.”

¹⁰Jadi nini ma, “Roh do use Ahu marayak ho sonon tahun in; jadi adong ma sada anak bani si Sarah parinangonmin.” Dihut do si Sarah mambogei ai humbani labah ni lampolampo na i pudini ai.

¹¹Tapi domma sayur matua ia si Abraham pakon si Sarah, domma pala maronti bani si Sarah hasomalan ni puang-puang hinan.

¹²Jadi tartawa ma si Sarah ibagas uhurni, nini ma, “Dob matua pe ahu hape, ase dong bangku sipamalas uhur. Tuanku pe homa domma matua.”

¹³Jadi nini Jahowa ma hubani si Abraham, “Mase ma tartawa si Sarah anjaha marsahap, ʻTongon do nani tubuhan anak ahu, dob matua ahu?ʼ

¹⁴Adong do gatni na so tarpajadi Jahowa? Sonon tahun in, mulak ma Ahu marayak ho, jadi adong ma anak bani si Sarah.”

¹⁵Nini si Sarah ma mamorsou, “Seng tartawa ahu!” Ai mabiar do ia. Tapi nini Jahowa ma, “Lang, tongon do ho tartawa.”

¹⁶Dob ai misir ma hunjai dalahi-dalahi ai, laho dompak Sodom; dihut do si Abraham laho manaruhkon sidea.

¹⁷Jadi nini Jahowa ma, “Tor ponopkonon-Ku ma hubani si Abraham na sihol bahenon-Ku?

¹⁸Ai lang si Abraham do gabe bangsa na banggal anjaha na sangap, anjaha marhiteihonsi dapotan pasu-pasu sagala bangsa na i tanoh on?

¹⁹Ai Ahu do mamilihsi, ase itonahkon hubani anakni pakon hubani ginomparni i pudini, ase totap sidea mangirikkon dalan ni Jahowa, ase ihorjahon hapintoron pakon uhum, ase ipasaud Jahowa hubani si Abraham, na dob hinatahonni bani.”

²⁰Jadi nini Jahowa ma, “Banggal tumang do doruh-doruh dompak Sodom pakon Gumora anjaha borat tumang do dousa ni sidea.

²¹Susur do Ahu ase huidah atap na tongon do ganup na hinorjahon ni sidea ai, romban hubani doruh-doruh na das ai hu Bangku, atap lang, sihol do botohon-Ku ai.”

²²Dob ai manirpang ma hunjai dalahi na dua ai, laho ma sidea dompak Sodom; tapi anggo si Abraham jongjong ope i lobei ni Jahowa.

²³Ipadohor si Abraham ma, nini ma, “Mintor ripaskononmu ma parpintor rap pakon parjahat?

²⁴Anggo dong lima puluh halak parpintor ibagas huta ai, mintor ripaskononmu do ai, lang hargaanmu do huta ai halani silima puluh parpintor, na ibagas ai?

²⁵Daoh ma in humbamu, mambahen sisonin, mamunuh parpintor rap pakon parjahat, gabe doskon halak parjahat halak parpintor! Daoh ma in humbamu. Mintor lang ma pintor Panguhum, siuhumi ganup dunia on?”

²⁶Jadi nini Jahowa ma, “Anggo jumpah Ahu ibagas huta Sodom lima puluh halak parpintor, sai hargaan-Ku do na sanagori ai halani sidea.”

²⁷Ibalosi si Abraham ma, nini ma, “Tonggor Ham ma, domma hubaranihon marsahap hubani Tuhanku age pe orbuk ampa abuan ahu.

²⁸Ra hurang do lima halak humbani si lima puluh ai parpintor; mintor ripaskonon-Mu ma ganup huta ai halani na lima ai?” Nini ma, “Lang ripaskonon-Ku ai anggo adong do jumpah Ahu ijai ompat puluh lima halak.”

²⁹Dob ai iulaki si Abraham ope use mangkatahon hatani hu bani, nini ma, “Ra ompat puluh halak hansa jumpah ijai.” Nini ma, “Lang kahuaon-Ku sidea halani na ompat puluh halak ai.”

³⁰Nini si Abraham ma, “Ulang ma manringis Tuhan, halani hununut marsahap. Ra pitah tolu puluh halak hansa jumpah ijai.” Nini ma, “Lang kahuaon-Ku sidea anggo dapot Ahu tolu puluh halak ijai.”

³¹Nini ma, “Tonggor ma, domma hubaranihon marsahap hubani Tuhanku; ra pitah dua puluh halak hansa dapot ijai.” Nini ma, “Lang ripaskonon-Ku sidea halani na dua puluh halak ai.”

³²Ulang Ham manringis Tuhan halani marsahap ope ahu pitah sahali nari. Ra pitah sapuluh halak hansa jumpah ijai. Nini ma, “Lang ripaskonon-Ku sidea halani na sapuluh halak ai.”

³³Jadi laho ma Jahowa, dob salpu Ia marsahap pakon si Abraham; mulak ma homa si Abraham hu iananni.