Read Batak Simalungun 1 MUSA 19 Bible Online

1 MUSA 19 - Batak Simalungun bible

1 MUSA 19

¹Jadi das ma malekat na dua ai hu Sodom bodarini ai; ia si Lot hundul-hundul do i horbangan ni Sodom ai. Dob iidah si Lot sidea, jongjong ma ia mangalo-alo sidea, lanjar manrogop,

²nini ma, “Mahua tului ma nasiam tuanku hu rumah ni jabolon nasiam on; marborngin ma nasiam anjaha burihi nasiam ma nahei nasiam, patar pe toruskon nasiam pardalanan nasiam.” Tapi nini sidea ma, “Lang, marborngin i alaman on ma hanami.”

³Tapi sai ielek-elek si Lot ma sidea; jadi tului ma sidea hu bani, imasuki ma rumahni. Dob ai ipauli ma sipanganon bani sidea, imasak ma ruti na so niigaran, jadi mangan ma sidea.

⁴Tapi marayak modom sidea, domma iinggoti dalahi-dalahi ni huta ai, halak Sodom ai rumahni, na maposo ampa na matua, haganup halak parhuta ai, sada pe lang na tading.

⁵Dilo-dilo do sidea hubani si Lot, “Ija do dalahi in, na tondok bam saborngin on? Arahkon sidea hu bennami, ase itandai hanami sidea!”

⁶Laho ma si Lot hu darat marayak sidea hu lobei ni labah, tapi itutup do labah ai i pudini,

⁷nini ma, “Nasiam saninangku, ulang ma bahen nasiam na jahat!

⁸Tonggor ma, adong do dua borungku, na so haliaban ope, sidea ma huboban hu darat hubani nasiam; bahen nasiam ma hubani sidea harosuh ni uhur nasiam, asal ma ulang ibahen nasiam atap aha hubani halak on, ai na roh do sidea marlinggom hu rumahku.”

⁹Jadi nini sidea ma, “Laho ma ho!” Nini sidea ope, “Sahalaksi do roh manginsolat hujon, gabe ia sihol manguhumi? On pe parahan do bahenonnami bam, ase bani sidea!” Jadi ionjar sidea ma dalahi ai, ai ma si Lot, ipadohor sidea ma, sihol parseda labah ai.

¹⁰Jadi isurdukkon halak ai ma tanganni, itarik ma si Lot masuk hu rumah, lanjar itutup ma labah ai.

¹¹Ipapitung sidea ma mata ni halak na i lobei ni labah ai, dakdanak ampa na magodang, gabe soya ma halojaon ni sidea ai, mangindahi labah ai.

¹²Jadi nini halak ai ma hubani si Lot, “Ise ope ijon sindohormu? Hela, anak atap borumu, ampa na dohor bam i huta on, arahkon ma sidea kaluar hun ianan on.

¹³Ai sihol ripaskononnami ma huta on, halani banggal ni doruh-doruh dompak sidea ilobei ni Jahowa, halani ai do ase isuruh Jahowa hanami manripaskon huta on.”

¹⁴Laho ma si Lot marsahapkon sonduk helani sidua halak ai, na sihol mambuat boruni ai, nini ma, “Misir ma hun huta on, ai ripaskononni Jahowa ma huta on.” Tapi na marhuria-huria do ia, ninuhur ni sonduk helani ai.

¹⁵Sanggah na marlangat-langat ari, ijuljul malekat ai ma si Lot, nini ma, “Jongjong ma, boan ma parinangonmu pakon borumu sidua halak in, na adong ijon, ase ulang dihut ho rasei halani hajahaton ni huta on.”

¹⁶Halani ipadokah-dokah, itangkap na dua halak ai ma tanganni pakon tangan ni parinangon pakon tangan ni boruni na dua ai, halani sihol paluahon ni Jahowa do ia; iarahkon sidea ma ia anjaha ipasaran i darat ni huta ai.

¹⁷Dob das hudarat sidea itogu, marsahap ma sahalak, “Paluah dirimu! Ulang kawahkon dompak pudi, ulang ho marsaran barang ija pe i pamah on, hu dolog ma ho maporus, ase ulang bois ho.”

¹⁸Nini si Lot ma hubani sidea, “Ulang ma sonai, Tuannami!

¹⁹Tonggor ma, domma pala dapotan idop ni uhur jabolonmu on i lobeimu, anjaha domma ipatuduh ham bangku halayakon banggal marhitei na ipagoluh ham hosahku. Tapi seng tarbahen ahu maporus hu dolog an, ra tarayak hamagouan ai do ahu, gabe matei ahu holi.

²⁰Tonggor ma, dohor do huta ai, boi do hujai ahu maporus, etek do homa huta ai. Mahua hujai ma ahu lintun. Ai lang etek do huta ai? Anggo sonai manggoluh ma ahu.”

²¹Jadi nini ma mambalosi, “Dear, pasal on pe tatapon-Ku do. Seng parsedaon-Ku be huta na hinatahonmai.

²²Ne ma, papodas ma lintun hujai, ai seng tarbahen Ahu mambahen atap aha pe, paima das ho hujai.” Ai do halani ase Zoar huta ai igoran halak.

²³Domma pala poltak mata ni ari i tanoh on, sanggah na das ai si Lot i Zoar.

²⁴Dob ai iparoh Jahowa ma udan hirtah pakon apuy hu Sodom pakon Gumora, ai ma humbani Jahowa, hun nagori atas.

²⁵Iboiskon ma huta-huta ampa haganup pamah ai, ronsi haganup pangisi ni huta-huta ai, ampa suan-suanan na i tanoh ai.

²⁶Tapi mangkawah ma parinangon ni si Lot, na mardalan i pudini ai, dompak pudi, gabe salih ma ia gabe batu garam.

²⁷Misir ma si Abraham sogod patarni ai hubani ianan hajongjonganni hinan i lobei ni Jahowa.

²⁸Dob ai itatap ma dompak Sodom pakon Gumora pakon haganup tanoh na i pamah ai; jadi iidah ma martimpul timus hun tanoh ai, songon timus ni pamurunan.

²⁹Sanggah na laho manraseihon huta-huta na i pamah ai Naibata, idingat Naibata ma si Abraham, jadi iarahkon ma si Lot hun tongah-tongah ni halonglongan ai sanggah na ilonglongkon huta na niiankon ni si Lot hinan.

³⁰Dob ai tangkog ma si Lot hun Zoar, jadi marianan ma ia rap pakon boruni na dua ai i dolog, halani mabiar do ia tading i Zoar, gabe iiankon ma sada liang, ia rap pakon boruni na dua ai.

³¹Dob ai nini sikahanan ai ma dompak sianggian ai, “Domma matua bapanta, anjaha seng dong be dalahi i tanoh on na roh hubanta, songon hasomalan i sab dunia on.

³²Bere hita ma minum anggur bapanta, anjaha hasomani hita ma ia modom, ase pagoluh hita ginompar humbani bapanta.”

³³Jadi ipainumkon sidea ma anggur hubani bapa ni sidea ai bani na saborngin ai. Dob ai laho ma sikahanan ai mangkasomani bapani ai modom; lang ibotoh bapani ai sandihari boruni ai modom anjaha sadihari puho.

³⁴Patar ni ai nini sikahanan ai ma bani sianggian ai, “Tonggor ma, domma huhasomani na bodari bapa modom. Bere hita ma homa borngin on anggur inumonni, ase laho ho mangkasomanisi modom, ase pagoluh hita ginompar humbani bapanta.”

³⁵Jadi ibere sidea ma bani na saborngin ai anggur inumon ni bapa ni sidea ai. Jadi laho ma sianggian ai mangkasomanisi modom, anjaha lang ibotoh sadihari boru ni ai modom anjaha sadihari puho.

³⁶Jadi boratan rumah ma boru ni si Lot ai haduasi humbani bapa ni sidea ai.

³⁷Dob ai itubuhkon sikahanan ai ma anak sada, ibahen ma goranni si Moab; ia do ompung ni halak Moab ronsi sadari on.

³⁸Dihut do sianggian ai manubuhkon sada anak, ibahen do goranni si Ben-Ammi; ia do ompung ni halak Amon ronsi sadari on.