Read Batak Simalungun 1 MUSA 2 Bible Online

1 MUSA 2 - Batak Simalungun bible

1 MUSA 2

¹Sonai ma pardob ni langit ai, tanoh in ampa haganup isini.

²Jadi dob idobkon Naibata horja na hinorjahon-Ni ai bani ari papituhon, marsaran ma Ia bani ari na papituhon ai humbani sagala horja na hinorjahon-Ni ai.

³Ipasu-pasu anjaha ipapansing Naibata ma ari papituhon ai, halani bani ari ai do Ia marsaran humbani sagala horja panompaon-Ni ai.

⁴Sonin ma parjadi ni langit pakon tanoh on, sanggah panompaon ai.

⁵Sanggah na itompa Naibata Jahowa langit pakon tanoh on, seng dong ope hayu i talun, seng dong ope suan-suanan itongah juma, halani seng ope iparoh Naibata udan hu tanoh on, anjaha seng dong ope jolma na mangkorjahon tanoh in,

⁶tapi dong do sabun naik hun tanoh on mangarbahi ganup sisik ni tanoh on;

⁷bani panorang ia ma itompa Naibata Jahowa jolma humbani orbuk ni tanoh on, anjaha isompulhon hosah hagoluhan hubagas ruang ni igungni. Jadi sonai ma martonduy na manggoluh jolma ai.

⁸Dob ai ipungkah Naibata Jahowa ma sada pohon i Eden, hampit hapoltakan; hujai ma inahkon jolma na tinompa-Ni ai.

⁹Ipantubuhkon Jahowa ma marmasam-masam hayu hun tanoh in, na jenges idahon anjaha na mantin panganon, pakon hayu hagoluhan iparsitongahan ni pohon ai, ampa hayu pambotohan ni na madear ampa na masambor.

¹⁰Dong do sada bah, tubuh i Eden laho mangarbahi pohon ai, hunjai mardangkah do ai gabe ompat bah bolon:

¹¹Goran ni na parlobei Pison, na mangarbahi ganup tanoh Hawila, pambuatan ni omas ai,

¹²jenges do omas na hun nagori ai. Adong do homa ijai damar Bedolah pakon batu intan Soham.

¹³Goran ni bah na paduahon Gihon, na mangarbahi ganup tanoh Kus.

¹⁴Goran ni bah na patoluhon Hidekel, ai ma na mabaor hampit hapoltakan ni Assur. Anjaha bah na paompatkon ai ma Eprat.

¹⁵Jadi iarahkon Naibata Jahowa ma jolma ai, inahkon ma ia hu pohon Eden laho manlahoi ampa manramotkon ai.

¹⁶Dob ai ititahkon Naibata Jahowa bani jolma ai, nini ma, “Boi do panganonmu humbani ganup hayu na i pohon on,

¹⁷tapi anggo humbani hayu pambotohan ni na madear ampa na masambor in, seng bulih panganonmu; halani ijin ipangan ho hunjai, maningon matei do ho.”

¹⁸Dob ai nini Naibata Jahowa ma, “Seng dear jolma in punjung, Hubahen ma bani sada pangurupi, gabe parangguanni.”

¹⁹Dob ai ijadihon Naibata ma humbani tanoh in sagala binatang na i darat pakon sagala manuk-manuk na i awang-awang. Iboan ma ganupan ai hubani si Adam laho mangidah, atap sonaha bahenonni goran ni ai, anjaha ia in ibahen si Adam goran ni haganup na marhosah ai, lanjar ai do goranni.

²⁰Jadi ibahen si Adam ma goran ni sagala pinahan-pinahan ai, pakon sagala manuk-manuk na i awang-awang ai, ampa sagala binatang na i darat, tapi bani jolma ai, seng dong jumpahsi pangurupi, gabe parangguan bani.

²¹Dob ai renges ma modom si Adam ibahen Naibata Jahowa. Jadi ibuat Naibata ma rusukni sada, dob ai itutupkon ma daging hubani ianan ai.

²²Ijadihon Naibata Jahowa ma sada naboru humbani rusuk na humbani si Adam, dob ai itogu ma ia hubani si Adam.

²³Jadi nini si Adam ma, “On ma da holi-holi humbani holi-holingku anjaha daging humbani dagingku. Naboru ma ia goranon, halani humbani dalahi do ia ibuat.”

²⁴Halani ai tadingkonon ni dalahi do bapa pakon inangni laho mangkasomani parinangonni, gabe sada daging ma sidea.

²⁵Ia sidea na dua ai, si Adam pakon parinangonni ai, talanjang do, tapi seng marsihailaan.