Read Batak Simalungun 1 MUSA 20 Bible Online

1 MUSA 20 - Batak Simalungun bible

1 MUSA 20

¹Dob ai bungkas ma si Abraham hunjai hu tanoh dangsina, laho marianan i holangkolang ni Kades pakon Sur, gabe manginsolat ma ia i Gerar.

²Jadi nini si Abraham ma pasal si Sarah parinangonni ai, “Botouhu do ia.” Jadi isuruh si Abimelek, raja ni Gerar ai ma na mangalop si Sarah.

³Tapi roh ma Naibata ibagas nipi hubani si Abimelek borngin ni ai, nini ma hu bani, “Marutang hosah ma ho, halani puang-puang na binuatmin, ai na dob marpuang do ia.”

⁴Tapi seng ongga ope dohor si Abimelek hu bani, jadi nini ma, “Ham Tuhan, mintor bunuhonmu ma bangsa na pintor?

⁵Ai lang ia do mangkatahon bangku, ʻBotouhu do ia?ʼ Puang-puang in pe ihatahon do, ʻBotouhu do ia.ʼ Ase ia hubahen pe sonin, halani bonar ni uhurhu pakon borsih ni tanganku do.

⁶Dob ai nini Naibata ma hubani ibagas nipi, “Ahu pe, Hubotoh do humbani bonar ni uhurmu do ibahen ho sonin, mambahen hulanglangi ho mardousa dompak Ahu; halani ai do ase lang Hulopas ho manjamahsi.

⁷Sonari pe paulak ma parinangon ni halak ai, ai nabi do ia; tonggohononni do ho ase manggoluh ho. Tapi anggo seng ipaulak ho, botoh ma, sai matei do ho pakon ganup na rapkon ho.”

⁸Jadi girah ma puho si Abimelek patarni ai, idilo ma ganup juakjuakni, ipajojor ma ganup hata ondi bani sidea, jadi mabiar tumang ma sidea.

⁹Dob ai idilo si Abimelek ma si Abraham, nini ma hu bani, “Aha do na binahenmu bennami, anjaha aha do dousangku hubam, mambahen iparoh ho dousa bolon hu bangku pakon hubani harajaonku? Pambahenan na so malo bahenon, ai do ibahen ho hu bangku.”

¹⁰Ambah ni ai nini si Abimelek ma use hubani si Abraham, “Aha do na niidahmu, ase ibahen ho sonin?”

¹¹Jadi nini si Abraham ma, “Nini uhurhu, ra seng dong na mangkabiari Naibata bani ianan on, tontu bunuhon ni sidea ma ahu halani parinangonku.

¹²Anjaha botul botouhu do tongon ia, boru ni bapa, tapi lang tinubuhkon ni inang, ase boi do parinangonku ia.

¹³Tapi dob ihatahon Naibata ahu bungkas hun rumah ni bapa, jadi huhatahon ma hu bani, ʻOn ma tanda ni holong ni uhurmu, sibahenonmu hu bangku, atap huja pe hita das,ʼ hatahon ma pasal ahu, “Botouhu do ia.”

¹⁴Jadi ibuat si Abimelek ma biribiri pakon lombu, jabolon dalahi pakon jabolon naboru, ibere ma ai bani si Abraham; ipaulak ma hubani si Sarah, parinangonni ai.

¹⁵Dob ai nini si Abimelek ma, “Tonggor ma, tanohku na i lobeimin; iankon ma ija rosuh ni uhurmu!”

¹⁶Tapi bani si Sarah nini do, “Tonggor ma, domma hubere bani botoumu saribu pirak, bahen pardearan bam pakon hubani ganup na rapkon ho, ase pintor ho i lobei ni ganup halak.”

¹⁷Dob ai martonggo ma si Abraham hubani Naibata. Jadi ipamalum Naibata ma si Abimelek, parinangon ampa jabolonni puang-puang, gabe tubuhan tuah ma sidea.

¹⁸Ai domma itutup Naibata ganup parnaibataan na i rumah ni si Abimelek, halani si Sarah parinangon ni si Abraham ai.