Read Batak Simalungun 1 MUSA 21 Bible Online

1 MUSA 21 - Batak Simalungun bible

1 MUSA 21

¹Dob ai itatap Jahowa ma si Sarah, songon na hinatahon-Ni ai, anjaha ibahen Jahowa ma hubani songon na pinarbagah-bagah-Ni ai.

²Ai boratan rumah ma si Sarah, anjaha itubuhkon ma sada anak bani si Abraham, bani panorang hatuaonni, domu hubani panorang na dob hinatahon ni Naibata hu bani.

³Dob ai ibahen si Abraham ma goran ni anakni, na tubuh bani, humbani si Sarah ai, si Isak.

⁴Jadi isunat si Abraham ma si Isak, anakni ai, bani ari paualuhkon, songon na tinonahkon ni Naibata hu bani.

⁵Marumur saratus tahun do si Abraham, bani partubuh ni si Isak, anak ni ai.

⁶Jadi nini si Sarah ma, “Domma ibahen Naibata tartawa ahu; ganup na mambogei, tartawa ma halani ahu.”

⁷Ambah ni ai ihatahon do, “Ise ma adong hinan na mangkatahon bani si Abraham, pabagodkon anak si Sarah? Hutubuhkon do anak sada bani, sanggah panorang hatuaonni.”

⁸Dob ai lambin banggal ma dakdanak ai, anjaha sirang minum; jadi marpesta banggal ma si Abraham, bani ari na sirang minum ai si Isak.

⁹Dob ai iidah si Sarah ma mangapasi anak ni si Hagar, boru Masir ai, na tinubuhkonni bani si Abraham.

¹⁰Jadi nini ma hubani si Abraham, “Usir ma boru jabolon ai rap pakon anakni ai, halani lang boi rap panean anak ni boru jabolon ai rap pakon si Isak anakkin.”

¹¹Tapi sogam tumang do uhur ni si Abraham pasal hata ai, halani anakni ai.

¹²Tapi nini Naibata ma dompak si Abraham, “Ulang sogam uhurmu pasal dakdanak in pakon jabolonmin. Tangihon ma ganup na hinatahon ni si Sarah bam, pitah marhitei si Isak do targoran bam ginompar.

¹³Sonai homa anak ni jabolonmin, bahenon-Ku do gabe sada bangsa, halani ginomparmu do ia.”

¹⁴Jadi ipagirah si Abraham ma patarni ai puho, ibuat ma ruti pakon bah satatabu, ibere ma ai bani si Hagar, ipahadangkon ma ai bani abarani ampa bani dakdanak ai, dob ai ipaingkat ma ia pakon dakdanak ai. Laho ma ia, hape kahou ma ia i halimisan Berseba.

¹⁵Jadi dob bois bah na i tatabu ai, itibalhon ma dakdanak ai hu toruh ni sada hayu na etek-etek,

¹⁶anjaha laho ma ia, hundul mandaoh-daoh hunjai, patontang hira-hira sampanah daohni, ai nini, “Seng tarpaidah-idah ahu dakdanak in laho matei.” Jadi hundul ma ia patontang hunjai, ipagogoh ma sorani anjaha tangis.

¹⁷Jadi itangihon Naibata ma sora ni dakdanak ai, anjaha dilo-dilo ma malekat ni Naibata hun nagori atas hubani si Hagar, nini ma, “Mahua ho Hagar? Ulang ma ho mabiar, ai domma itangihon Naibata sora ni dakdanak ai humbani hatibalan ni ai.

¹⁸Jongjong ma ho, angkat ma dakdanak ai anjaha abing ma, ai bahenonku do ia gabe sada bangsa na banggal.”

¹⁹Dob ai iungkab Naibata ma mata ni si Hagar, gabe iidah ma sada bah tubuh. Laho ma ia mannahi bah hubagas tatabuni ai, anjaha ipainum ma dakdanak ai.

²⁰Anjaha ihasomani Naibata do dakdanak ai, jadi lambin magodang ma ia; i halimisan do ia marianan, anjaha iguruhon do pamanahon.

²¹Jadi marianan ma ia i halimisan Paran, anjaha ibuat inangni ma bani sada boru Masir bahen parinangonni.

²²Dob ai roh ma ijia hata ni si Abimelek pakon si Pihol, puanglima ni balani hubani si Abraham, nini ma, “Sai ihasomani Naibata do ho bani haganup horjamu.

²³On pe, bijahon ma bangku i lobei ni Naibata, na so martahi-tahi ho bangku, barang hubani anakku ronsi ginomparhu; tapi songon na dob hubahen bam na madear, sonai ma bahen hu bangku pakon hu tanoh panginsolatanmu.”

²⁴Jadi nini si Abraham ma, “Hubijahon pe.”

²⁵Tapi ihutuk si Abraham do si Abimelek, halani parigi na nirampok ni jabolon ni si Abimelek ai.

²⁶Nini si Abimelek ma, “Seng hubotoh barang ise na mambahen ai, ho pe homa seng ipatugah ho hu bangku, anjaha seng dong hubogei pasal ai das hubani sadari on.”

²⁷Jadi ibuat si Abraham ma biribiri pakon lombu, ibere ma bani si Abimelek, jadi marbulawan ma sidea na dua.

²⁸Dob ai ipapulig si Abraham ma pitu anak ni biribiri.

²⁹Jadi nini si Abimelek ma hubani si Abraham, “Huja do anak ni biribiri na pitu, na pinapuligmon?”

³⁰Balosni, “Jalo ham ma na pitu anak ni biribiri on hun tanganku, bahen hasaksian bangku, paboa ahu sihurak parigi on.”

³¹Halani ai do ase Berseba goran ni ianan ai, ai ijai do sidea na dua marbulawan.

³²Ase marpadan ma sidea i Berseba. Dob ai misir ma si Abimelek pakon si Pihol, puanglima ni balani ai, mulak hu tanoh ni halak Palistim.

³³Dob ai isuan si Abraham ma sada hayu Tamariska i Berseba, anjaha ipadilo-dilo ma ijai goran ni Jahowa, Naibata sisadokah ni dokahni.

³⁴Dokah do si Abraham manginsolat i tanoh ni halak Palistim.