Read Batak Simalungun 1 MUSA 23 Bible Online

1 MUSA 23 - Batak Simalungun bible

1 MUSA 23

¹Saratus dua puluh pitu tahun do umur ni si Sarah, ansa ai do dokah ni si Sarah manggoluh.

²Dob ai matei ma si Sarah i Kiriat-Arba, ai ma Hebron, na i tanoh Kanaan. Jadi roh ma si Abraham mandoraki ampa manangisisi.

³Dob ai jongjong ma si Abraham laho humbani na mateini ai, iparsahapkon ma halak Het, nini ma,

⁴“Halak roh anjaha halak panginsolat do ahu i tongah-tongah nasiam; bere nasiam ma panimbunan parsandirianku bangku i tongah-tongah nasiam, ase hutanom na mateihai.”

⁵Ibalosi halak Het do si Abraham, nini sidea ma,

⁶“Tangihon ma hanami, tuannami. Raja na pinabangkit ni Naibata do ham i tongah-tongahnami on, tanom ma na mateimu hu panimbunannami, tinodoh ni uhurmu. Seng dong hun bennami on na mamandang ham mananom na mateimu hu tanomannami.”

⁷Dob ai jongjong ma si Abraham, isombah ma parnagori ai, ai ma halak Het,

⁸nini ma dompak sidea, “Anggo dear ma uhur nasiam, tanomonku na mateihai, tangihon nasiam ma ahu, anjaha parmaloi nasiam ma ahu hubani si Epron, anak ni si Sohar,

⁹ase ibere hu bangku liang Makpela, bagianni ai na i duru ni jumani ai. Sai ibere ma hu bangku ai atap sadiha pe hargani, bahen panimbunan parsandirian bangku i tongah-tongah nasiam.”

¹⁰Ai marianan i tongah-tongah ni halak Het do si Epron. Jadi marbalos ma si Epron, marga Het ai hubani si Abraham, ibogei haganup halak Het, ganup halak na masuk hun horbangan ni hutani ai, nini ma,

¹¹“Lang tuannami, tangihon ham ma ahu! Hubere ma juma ai bamu ampa liang na ibagas ai; i lobei ni hasoman sabangsangku ma hubere ai hubamu; tanom ham ma na mateimu ai.”

¹²Jadi isombah si Abraham ma parnagori ai.

¹³Anjaha marsahap ma ia dompak si Epron ibogei parnagori ai, nini ma, “Tongon, anggo ra do ham manangihon ahu hubere ma bamu boli ni juma ai; jalo ham ma ai humbangku, ase hutanom na mateihai.”

¹⁴Nini si Epron ma mambalosi si Abraham,

¹⁵“Eak tuanku, tangihon ham ma ahu! Sanlambar juma, marharga ompat ratus sekel pirak, sadiha ma ai. Tanom ham ma gelah na mateimu ai.”

¹⁶Ibalosi si Abraham ma si Epron, itimbang ma duit ai nasa buei ni na hinatahon ni si Epron ai i lobei ni ganup halak Het, ompat ratus sekel pirak, duit na laho bani partiga-tiga.

¹⁷Jadi saud ma juma ni si Epron, na i Makpela, tontang ni Mamre ai, juma ai pakon liang na ibagas ai, ganup hayu na i juma ai, ampa ganup na inggot hujai,

¹⁸gabe parbagianan ni si Abraham, i lobei ni ganup halak Het, ganup halak na masuk hun horbangan ni hutani ai.

¹⁹Dob ai itanom si Abraham ma si Sarah, parinangonni ai, hu liang juma Makpela, tontang ni Mamre, ai ma Hebron, na i tanoh Kanaan.

²⁰Ase ondos ma bani si Abraham juma pakon liang na ibagas ai, bahen tanoman parsandirian bani humbani halak Het.