Read Batak Simalungun 1 MUSA 24 Bible Online

1 MUSA 24 - Batak Simalungun bible

1 MUSA 24

¹Ia si Abraham domma ubanon, domma sayur matua, anjaha ipasu-pasu Jahowa do ia bani haganup.

²Dob ai ihatahon si Abraham ma bani jabolonni, situanan i rumahni, na manramotkon ganup na dong bani, “Mahua nahkon ma tanganmu i toruh ni binongeihu,

³ase hupabija ho hubani Jahowa, Naibata ni nagori atas pakon tanoh on, paboa na so bulih buatonmu humbani boru ni halak Kanaan, panginsolatankin, bahen parinangon ni anakkin,

⁴tapi maningon laho do ho hu tanoh hagodanganku pakon hubani hade-hadengku, laho manririd bahen parinangon ni anakkin, si Isak.”

⁵Jadi nini jabolonni ai ma dompaksi, “Naha, porini lang marosuh puang-puang ai mangirikkon ahu hu nagori on, boi do boanonku anakmu in mulak hu tanoh habingkatanmu ai?”

⁶Nini si Abraham ma dompaksi, “Jaga ma, ase ulang iarahkon ho mulak anakkin hujai!

⁷Jahowa, Naibata ni nagori atas, na mambobahon ahu kaluar hun rumah ni bapa pakon hun tanoh ni hade-hadengku, na mangkatahon ampa na mambijahon bangku sonon, ʻHubani ginomparmu do berehononku tanoh on. Ia ma na marsuruh malekatni mardalan i lobeimu, laho mambuat boru bani anakku hunjai.ʼ

⁸Tapi anggo lang ra puang-puang ai mangirikkon ho, maluah ma ho humbani bija na hu bangku in, asal ulang iarahkon ho anakkin mulak hujai.”

⁹Jadi inahkon jabolonni ai ma tanganni hu toruh ni binongei ni si Abraham, tuanni ai, anjaha ibijahon ma pasal ai hu bani.

¹⁰Ibuat jabolon ai ma sapuluh unta humbani unta ni tuanni ai, ampa bagei ni ugas-ugas na maharga ni tuanni, dob ai bingkat ma ia, laho hu Mesopotamia, hu huta ni si Nahor.

¹¹Dob ai ipasaran ma unta ai i darat ni huta ai, i lambung ni sada parigi marayak bod ari, bani panorang parroh ni halak parbah.

¹²Jadi nini ma, “Ham Jahowa, Naibata ni si Abraham tuankai, patongon Ham ma langkahku sadari on, sai patuduhkon ma idop ni uhur-Mu bani si Abraham, tuankai.

¹³Tonggor ma, jongjong do ahu i lambung ni parigi on, anjaha laho kaluar ma boru ni sinkuta on sihol manahui bah.

¹⁴On pe, anggo huhatahon bani sada halak sidea, ʻMahua pateleng ham hudonmu in ase minum ahu,ʼ gabe ibalosi, ʻinum ham ma, hupabosur pe ampa untamu, ai ma namin na tinontuhonmu bani jabolonmu si Isak, ase hubotoh marhitei ai, na dob ibahen ham idop ni uhurmu bani tuankai.ʼ ”

¹⁵Jadi lape ope torus hatani ai ihatahon, tonggor ma, domma kaluar si Rebekka, boru ni si Betuel, anak ni si Milka, parinangon ni si Nahor, abang ni si Abraham, mangabarai hudonni.

¹⁶Jenges tumang do rupani, sada anak boru, na so ongga ope manandai dalahi; tuad ma ia hu parigi ai, igoki ma hudonni, dob ai tangkog ma ia.

¹⁷Jadi marlintun ma jabolon ai marayaksi, nini ma, “Mahua bere ham ma bah in otik inumonku humbani hudonmu in.”

¹⁸Nini ma mambalosi, “Minum ma ham tuan!” Jadi tarolos ma ia patoruhkon hudonni ai hu tanganni, lanjar ibere ma ia minum.

¹⁹Dob salpu ia ibere minum, nini ma, “Hutahui pe bah age bani untamu ronsi sombuh horahni ganup.”

²⁰Dob ai tarolos ma ia manguseihon hudonni ai hu palangka, iulaki ma marlintun hu parigi ai laho manahui bah, jadi itahui ma bah bani ganup untani ai.

²¹Longang ma dalahi ai mangidahsi, sai sip do ia mardiateihon atap na itumpak Jahowa do langkahni, atap lang.

²²Jadi dob bosur minum unta ai, ibuat dalahi ai ma sada anting-anting omas, satongah sekel boratni, pakon saparangguan golang, sapuluh sekel omas boratni.

²³Dob ai nini ma, “Atene, boru ni ise do ham? Mahua patugah ham ma bangku! Adong do gatni ianan parbornginan i rumah ni bapanta bennami?”

²⁴Nini ma mambalosi, “Boru ni si Betuel do ahu, anak ni si Milka, na tinubuhkonni bani si Nahor.”

²⁵Ambah ni ai ihatahon naboru ai ma, “Anggala ni omei ampa gagaton pe, buei do bennami, parbornginan pe adong do.”

²⁶Jadi ipaunduk dalahi ai ma dirini marsombah hubani Jahowa,

²⁷nini ma, “Pinuji ma Jahowa, Naibata ni si Abraham; lang alang idop ni uhur pakon habujuronni hubani tuanku.”

²⁸Dob ai marlintun ma naboru ai laho patugahkon hata ai hu rumah ni inangni.

²⁹Adong do sada botou ni si Rebekka, si Laban goranni. Jadi marlintun ma si Laban hu darat manjumpahkon dalahi ai hu parigi nongkan ai.

³⁰Jadi dob iidah anting-anting ai pakon golang na i tangan ni botouni ai, anjaha dob ibogei hata ni si Rebekka, botouni ai, na mangkatahon, “Sonon-sonon do hata ni halak ai bangku,” mintor laho ma ia marayak dalahi ai, anjaha tonggor ma, jongjong ope ia i lambung ni untani, dohorhon parigi ai.

³¹Dob ai ihatahon ma, “Eta hita laho, ham na pinasu-pasu ni Jahowa! Mase ma sai jongjong ham i darat on? Domma pala huatur rumah, sonai homa ianan ni unta in.”

³²Jadi iarahkon ma dalahi ai hu rumah, itanggali ma palana ni unta ai, ibere ma anggala ampa gagaton bani unta ai, sonai bah pamurihi ni naheini pakon nahei ni hasomanni ai;

³³dob ai inahkon ma sipanganon hu lobeini. Tapi nini ma, “Seng mangan ope ahu, anggo lape husahapkon hatangkon.” “Anggo sonai, hatahon ma!” nini.

³⁴Jadi nini ma, “Jabolon ni si Abraham do ahu.

³⁵Tongon ipasu-pasu Jahowa do tuankai, jadi gabe bayak do ia; ibere Naibata do bani biribiri pakon lombu, pirak pakon omas, jabolon dalahi ampa jabolon naboru, unta pakon halode.

³⁶Ambah ni ai, itubuhkon si Sarah parinangon ni tuankai do sada anak bani tuanku, bani panorang hatuaonni; bani do iberehon ganup na dong ni tuankai.

³⁷Dob ai ipabija tuankai ma ahu, nini, ʻLang bulih buatonmu humbani boru ni halak Kanaan, panginsolatankin, bahen parinangon ni anakkin,

³⁸tapi laho ma ho hu rumah ni bapa, parayak ma hasomanku samarga, mambuat parinangon ni anakkin.ʼ

³⁹Ningku ma bani tuanku, ʻSonaha ma, anggo lang ra puang-puang ai mangirikkon ahu?ʼ

⁴⁰Nini ma dompak ahu, ʻJahowa na hubalosi, Ia do marsuruh malekatni mangkasomani ho ampa manumpak langkahmu, laho mambuat boru bani anakkin humbani hasomanku samarga hun rumah ni bapa.

⁴¹Maluah ma ho humbani bijamu hu bangku anggo domma das ho hubani hasomanku samarga; anggo lang ibere sidea puang-puang ai bam, maluah ma ho humbani bijamu hu bangku.ʼ

⁴²Jadi dob das ahu sadari on hu parigi ai, ningku ma: Ham Jahowa, Naibata ni si Abraham, tuankai, sai tumpak Ham ma langkah na hulangkahkon on.

⁴³Tonggor ma, jongjong do ahu i lambung ni parigi on: Anggo adong sada anak boru, na kaluar laho manahui bah, jadi huhatahon bani, ʻBere ham bangku otik bah humbani hudonmu in,ʼ

⁴⁴jadi ihatahon bangku, ʻinum ma, pakon bani untamu hutahui pe bah, ai ma puang-puang, na dob tinontuhon ni Jahowa bani anak ni tuankai.ʼ

⁴⁵Lang ope salpu huhatahon hata ai ibagas uhurhu, tonggor ma, kaluar ma si Rebekka mangabarai sada hudon, turun ma ia hu parigi ai manahui bah. Jadi huhatahon ma bani, ʻMahua bere ham ma ahu minum.ʼ

⁴⁶Jadi tarolos ma ia patoruhkon hudonni humbani abarani, nini ma, ʻMinum ma ham, hupasobur pe pakon untamu on.ʼ Ase minum ma ahu, anjaha ipasobur ma homa unta ai.

⁴⁷Dob ai husungkun ma ia, ningku ma, ʻBoru ni ise do ham?ʼ Balosni, ʻBoru ni si Betuel do, anak ni si Nahor, tinubuhkon ni si Milka bani.ʼ Dob ai hubahen ma sada tintin hu igungni pakon golang hu tanganni.

⁴⁸Dob ai mangunduk ma ahu marsombah hubani Jahowa, hupuji ma Jahowa, Naibata ni si Abraham, tuankai, na patongonkon langkahku laho mambuat boru ni abang ni tuanku, bani anakni ai.

⁴⁹Sonari pe, anggo ra do nasiam patuduhkon idop pakon bujur ni uhur bani tuankai, patugah nasiam ma bangku; anggo lang, patugah nasiam homa bangku, ase hubotoh mandompakkon hu siamun atap hu sambilou.”

⁵⁰Jadi nini si Laban pakon si Betuel ma mambalosi, “Na roh humbani Jahowa do hata in; seng tarhatahon hanami bam, na bajan atap na madear.

⁵¹Tonggor ma, i lobeimu do si Rebekka, buat ma ia anjaha langkahkon ma, ase gabe parinangon ni anak ni tuanmai ia, songon na hinatahon ni Jahowa.”

⁵²Jadi dob ibogei jabolon ni si Abraham hata ni sidea ai, marsombah ma ia bani Jahowa.

⁵³Dob ai ipadarat jabolon ai ma ugas pirak, ugas omas ampa hiou, lanjar ibere ma ai bani si Rebekka; sonai homa bani botouni ampa inangni ibere do ugas maharga.

⁵⁴Dob ai mangan ampa minum ma sidea, ia pakon hasomanni saodoran, lanjar marborngin ma sidea ijai. Patarni puho ma sidea, jadi nini ma, “Palopas nasiam ma hanami mulak bani tuanku.”

⁵⁵Tapi nini botou pakon inangni ai ma, “Paturut ma siboru ai tading ijon hira-hira sapuluh borngin nari, ai pe ase laho ho.”

⁵⁶Dob ai nini ma hubani sidea, “Ulang jolomi nasiam ahu, halani Jahowa do na manumpak langkahku. Palopas nasiam ma ahu laho mulak hubani tuanku.”

⁵⁷Jadi nini sidea ma, “Anggo sonai, idilo hanami ma siboru ai, ase nasungkun hatani.”

⁵⁸Idilo sidea ma si Rebekka, ihatahon ma hu bani, “Atene, ra do ho bingkat ampa dalahi on?” Ibalosi ma, “Eak, ra do ahu.”

⁵⁹Jadi ipaingkat sidea ma si Rebekka, botou ni sidea ai, pakon parorotni rap pakon jabolon ni si Abraham ai ampa hasomanni saodoran.

⁶⁰Ipasu-pasu sidea ma si Rebekka, anjaha ihatahon ma hu bani, “Gabe ma ham botou, marribu-ribu laksa, anjaha ginomparmu ma simada horbangan ni munsuhni.”

⁶¹Dob ai marugas ma si Rebekka pakon parorotni, manaik ma sidea hu atas unta, anjaha iirikkon ma dalahi ai.

⁶²Tapi na roh do si Isak hun parigi Lachai-Roi, ai i Tanoh Dangsina do ia marianan.

⁶³Marayak bod ari laho do si Isak hu juma martonggo; jadi mangkawah ma ia, gabe iidah ma roh unta.

⁶⁴Mangkawah ma homa si Rebekka, jadi iidah ma si Isak, gabe turun ma ia hun unta ai.

⁶⁵Nini ma hubani jabolon ai, “Ise do dalahi ai, na mardalan i juma ai, na roh manjumpahkon hita?” Nini jabolon ai ma, “Ai ma da tuanku.” Jadi ibuat ma tudung-tudung na manrungkub bohini ai.

⁶⁶Dob ai ipajojor jabolon ai ma hubani si Isak ganup na hinorjahonni ai.

⁶⁷Jadi iarahkon si Isak ma si Rebekka hu lampolampo ni si Sarah, inangni ai; ibuat ma si Rebekka bahen parinangonni, anjaha holong do uhurni mangidahsi. Jadi tarapoh ma uhur ni si Isak bani panading ni inangni ai.