Read Batak Simalungun 1 MUSA 27 Bible Online

1 MUSA 27 - Batak Simalungun bible

1 MUSA 27

¹Jadi dob matua si Isak, anjaha rambon matani gabe lang marpangidah, jadi idilo ma si Esau, anakni sikahanan ai, nini ma dompaksi, “Ale anakku!” “Ijon do ahu,” nini mambalosi.

²Nini ma, “Tonggor ma, domma matua ahu, tapi lang hubotoh ari parmateihu.

³On pe, buat ma parugasmu, parlingkitan pakon siormu, laho ma ho hu talun, buru ma bangku sada binatang harangan.

⁴Jadi pasirsir ma bangku sipanganon songon na huharosuhkon, dob ai boan ma hu bangku ase hupangan, ase ipasu-pasu tonduyhu ho, paima lape matei ahu.”

⁵Tapi ibogei si Rebekka do hata ni si Isak ai, na hubani si Esau anakni ai. Dob misir si Esau hu harangan laho marburu binatang harangan siboanonni ai,

⁶nini si Rebekka ma hubani si Jakob anakni ai, “Tonggor ma, hubogei do bapamu marsahap hubani abangmu si Esau,

⁷ʻBoan ma hu bangku sada binatang harangan, anjaha pasirsir ma bangku sipanganon na mantin ase hupangan, ase hupasu-pasu ho i lobei ni Jahowa paima lape matei ahu.ʼ

⁸On pe, anakku, tangihon ma hatangku, songon na huparentahkon bam.

⁹Laho ma ho hu sampalan ni biribirinta, buat ma hunjai dua anak ni hambing tunggal na jenges, ase hupasirsir bahen sipanganon ni bapamu, songon na hinarosuhkonni.

¹⁰Jadi boan ma in hubani bapamu, ase ipangan, ase ipasu-pasu ho, sanggah lape matei ia.”

¹¹Nini si Jakob ma hubani si Rebekka, inangni ai, “Tonggor ma, na jabuton do si Esau abangkin, tapi anggo ahu lemes do.

¹²Ra ijamah bapa do holi ahu, jadi songon na paoto-otohon ma ahu ninuhurni, gabe na parohkon papa do ahu hu bangku sedo pasu-pasu.”

¹³Tapi nini inangni ai ma dompaksi, “Hu bangku pe papa na hubam ai, anakku, tangihon ma gelah hatangku, laho ma ho anjaha alop ma bangku hambing ai.”

¹⁴Jadi laho ma ia mangalop hambing ai, iboan ma hubani inangni. Dob ai ipasirsir inangni ai ma sipanganon, songon na hinarosuhkon ni bapani ai.

¹⁵Dob ai ibuat si Rebekka ma hiou sijengesan ni si Esau, anakni sikahanan ai, na sinimpanni i rumah, jadi isorungkon ma ai hubani si Jakob, anakni sianggian ai.

¹⁶Hubani tanganni pakon borgokni na lemes ai, ilangkobkon ma bobak ni anak ni hambing tunggal ai.

¹⁷Dob ai ibere ma sipanganon na mantin pakon ruti na dob pinasirsir ni ai, hubani si Jakob anakni ai.

¹⁸Sonai ma iparayak bapani ai, nini ma, “Ham bapa!” Balosni, “Ijon do ahu. Ise do ho, anakku?”

¹⁹Nini si Jakob ma hubani bapani ai, “Si Esau do ahu, anak sikahananmu; domma hubahen songon na hinatahonmu hu bangku. Puho ma ham anjaha hundul ma, pangan ham ma humbani na huburu on, ase ipasu-pasu tonduymu ahu.”

²⁰Tapi nini si Isak ma hubani anakni ai, “Anakku, sonaha ma ase sonai podasni dapotan ho?” Ibalosi ma, “Jahowa Naibatamu do mambahen dapotan ahu.”

²¹Nini si Isak ma hubani si Jakob, “Padohor ma hujon, anakku, ase hujamah ho, barang na tongon do ho anakku si Esau, atap lang.”

²²Ipadohor si Jakob ma hubani si Isak, bapani ai. Dob ijamah ia, ihatahon ma, “Anggo sorani, sora ni si Jakob do, tapi anggo tanganni, tangan ni si Esau do.”

²³Lanjar do seng itanda ia, ai jabuton do tanganni songon tangan ni si Esau, abangni ai. Jadi ipasu-pasu ma ia.

²⁴Dob ai nini ma, “Ho do tongon anakku si Esau?” “Ahu do tongon,” nini.

²⁵Dob ai nini ma, “Boan ma hujon, ase hupangan humbani na binurumin, anakku, ase ipasu-pasu tonduyhu ho.” Jadi iboan ma hu lambungni sipanganon ai, gabe mangan ma ia; iboan ma pakon anggur hu bani, lanjar iinum ma.

²⁶Dob ai nini si Isak, bapani ai ma dompaksi, “Mahua padohor ma, anjaha summah ma ahu, anakku.”

²⁷Jadi ipadohor ma, anjaha isummah ma bapani ai. Ianggoh si Isak ma bau ni hiouni ai, ipasu-pasu ma ia, nini ma, “Tonggor ma, usih bani bau ni sampalan na pinasu-pasu ni Jahowa ma bau ni anakku.

²⁸Sai ibere Naibata ma hubam namur hun nagori atas, pakon tanoh na marminak, ampa gandum pakon anggur buei.

²⁹Maningon balosan ni sagala bangsa do ho, anjaha sombahon ni sagala marga. Ho ma raja ni saninamu, anjaha marsombah ma hubam ganup anak ni inangmu. Hona papa ma sagala na mamapai ho, anjaha dapotan pasu-pasu ma sagala na mamasu-masu ho.”

³⁰Jadi dob salpu ipasu-pasu si Isak si Jakob, anjaha ai pe kaluar ia hun lambung ni si Isak, bapani ai, roh ma siluk si Esau abangni ai hun parburuan.

³¹Ia pe domma ipasirsir sipanganon na mantin, anjaha iboan ma ai hubani bapani. Nini ma dompaksi, “Hundul ma ham bapa, anjaha pangan ham ma humbani na binuru ni anakmu on, ase ipasu-pasu tonduymu ahu.”

³²Tapi nini si Isak, bapani ai ma dompaksi, “Ise do ho?” Nini ma, “Si Esau do ahu, anak bunga tubuhmu.”

³³Jadi tarsonggot tumang ma si Isak, nini ma, “Anggo sonai, ise do parburu ai, na mamboan binuruni ai hu bangku? Domma hupangan hunjai, sanggah lape roh ho, anjaha domma hupasu-pasu ia, anjaha domma totap hubani pasu-pasu ai.”

³⁴Dob ibogei si Esau hata ni bapani ai, ipagogoh ma sorani mandoraki, anjaha pusok tumang do uhurni, nini ma dompak bapani ai, “Pasu-pasu ham ma age ahu bapa!”

³⁵Tapi nini bapani ai ma, “Domma roh anggimu, akal-akal do ibahen mambuat pasu-pasu na hubam.”

³⁶Dob ai nini ma, “Patut ma ibahen goranni si Jakob, ai domma dua hali ahu iakal-akali. Domma ibuat hinan hak sikahanan humbangku, anjaha sonari ibuat use pasu-pasu na hu bangku. Nini ma, ʻSeng dong be pasu-pasu itebai ham bangku?ʼ ”

³⁷Nini si Isak ma mambalosi si Esau, “Domma hupabangkit ia gabe rajamu, anjaha domma huberehon ganup saninani gabe jabolonni; domma hutumpakkon bani gandum pakon anggur, aha ma tarbahen ahu nuan hubam, anakku?”

³⁸Dob ai nini si Esau ma dompak bapani ai, “Ai pitah na sada ai do hansa pasu-pasumu, bapa? Sai pasu-pasu ma pakon ahu, bapa!” Jadi ipagogoh si Esau ma sorani tangis-tangis.

³⁹Dob ai nini si Isak, bapani ai ma mambalosisi, “Tonggor ma, tanoh na so marminak ma iananmu, anjaha na so dapotan namur hun nagori atas.

⁴⁰Podangmin ma hagoluhanmu, anjaha marguru hubani anggimu ma ho. Tapi anggo sai maruntol ho, sai na tajahononmu do pasanganni humbani borgokmu.”

⁴¹Dob ai sogam tumang ma uhur ni si Esau mangidah si Jakob, halani pasu-pasu, na dob pinasu-pasuhon ni bapani ai hu bani, nini ma ibagas uhurni, “Dohor mando ari partangisan ni bapa, ai bunuhonku ma anggingku si Jakob ai.”

⁴²Hape tarbotoh si Rebekka ma hata ni si Esau, anakni sikahanan ai, jadi isuruh ma na mandilo si Jakob, anakni sianggian ai, nini ma hu bani, “Tonggor ma, domma iuhurhon si Esau mambalaskon pambahenanmin, sihol bunuhonni do ho.

⁴³Sonai pe, anakku, tangihon ma hatangkon, ʻMarugas ma ho, lintun ma ho hubani botouhu, si Laban, hu Haran.

⁴⁴Tondok bani ma ho piga-piga dokah on, paima mahombun sogam ni uhur ni abangmu,

⁴⁵paima mahombun ringisni hubam anjaha ihalupahon na binahenmin hu bani, dob ai husuruh pe na mangalopi ho hujai. Mase ma maningon magouan dua sinuan tunas (anak) ahu bani na sadari?ʼ ”

⁴⁶Nini si Rebekka ma dompak si Isak, “Domma soganan ahu i hagoluhan on, halani boru Het in. Anggo dihut do use si Jakob mambuat boru Het, songon boru Het in, humbani boru ni parnagori on, bahen aha be manggoluh ahu?”