Read Batak Simalungun 1 MUSA 33 Bible Online

1 MUSA 33 - Batak Simalungun bible

1 MUSA 33

¹Dob ai manatap-natap ma si Jakob, jadi iidah ma roh si Esau rap pakonsi ompat ratus halak hasomanni. Jadi ibagihon ma anakni ai hubani si Lea, si Rahel pakon jabolon naboru na dua halak ai.

²Parlobei ma ibahen jabolon naboru na dua ai rap pakon anak ni sidea, ipudi ni sidea si Lea pakon anakni, anjaha si Rahel pakon si Josep parpudi sahalian.

³Anjaha ia sandiri mardalan i lobei ni sidea, jadi mangunduk ma ia pitu hali das hu tanoh paima das ia hubani abangni ai.

⁴Tapi marlingkat ma si Esau manjumpahkonsi, idahop ma ia, irohop ma borgokni, anjaha isummah ma ia, anjaha tangis bei ma sidea.

⁵Dob ai mangkawah ma si Esau, iidah ma puang-puang pakon dakdanak ai, jadi nini ma, “Ise do halak na rapkon ho on?” Balos ni si Jakob, “In ma dakdanak na nilayakkon ni Naibata hubani jabolonmu on.”

⁶Dob ai roh ma hundohor jabolon naboru na dua ai rap pakon anak ni sidea, lanjar manombah ma sidea.

⁷Si Lea pakon anakni pe roh ma hundohor, lanjar manombah ma homa sidea. Dob ai parpudi sahali roh ma hundohor si Josep pakon si Rahel, lanjar manombah ma homa sidea.

⁸Nini si Esau ma: Aha do sura-suramu marhitei haganup tumpuan na dob manjumpahkon ahu nongkan? Balosni: Ase dapotan idop ni uhur ahu i lobei ni tuanku.

⁹Tapi nini si Esau ma: Sungkup do bangku, ambia, bam na dong bam hinan.

¹⁰Nini si Jakob ma: Ulang ma sonai, anggo maidop do uhurmu mangidah ahu, jalo ham ma sibere-berengkon hun tanganku; ai songon na mangidah bohi ni Naibata do ahu mangidah bohimu, anjaha layak do ham hu bangku.

¹¹Jalo ham ma siluahku na binoan in bamu, ai layak do Naibata bangku anjaha sungkup do ganup bangku. Sai ielek-elek ma ia, gabe ijalo ma.

¹²Dob ai nini si Esau ma: Eta ma hita misir, ahu pe i lobeimu.

¹³Tapi nini si Jakob ma dompaksi: Ibotoh tuanku do na hurang gogoh ope dakdanak on anjaha dong ope biribiri pakon lombu na pabagodkon rapkon ahu, anjaha sadari gelah naolos-olos, matei ma haganup pinahan in.

¹⁴Dear ma parlobei tuanku humbangku, jabolonmu on, ai mangiring-iring do ahu, marguru hubani panlangkah ni pinahan na i lobeihu, marguru hubani panlangkah ni dakdanak on, das bani na roh ahu marayak tuanku hu Seir.

¹⁵Jadi nini si Esau ma: Anggo sonai hutadingkon ma deba humbani hasomankon bahen hasomanmu.” Tapi nini ma, Aha ma porluni ai? Asal ma dapotan idop ni uhur ahu i lobei ni tuanku.

¹⁶Jadi mulak ma si Esau bani na sadari ai hu Seir.

¹⁷Tapi laho ma anggo si Jakob hu Sukot, ipauli ma rumahni sada, anjaha ibahen harang ni pinahan; halani ai do ase Sukot goran ni ianan ai.

¹⁸Jadi das ma si Jakob mardamei-damei hu huta Sikem na i tanoh Kanaan, bani pardalananni hun Padang Aram; ipajongjong ma barung-barungni i lobei ni huta ai.

¹⁹Iboli ma sanlambar juma hajongjongan ni barung-barungni ai, marharga saratus rupiah, humbani anak ni si Hemor, bapa ni si Sikem.

²⁰Ipajongjong ma ijai anjapanjap sada, ibahen ma goranni: Naibata do Naibata ni si Israel.