Read Batak Simalungun 1 MUSA 34 Bible Online

1 MUSA 34 - Batak Simalungun bible

1 MUSA 34

¹Jadi laho ma si Dina, boru ni si Lea na tinubuhkonni bani si Jakob, martandang hubani boru ni parnagori ai.

²Iidah si Sikem, anak ni si Hemor, halak Hewi, raja ni nagori ai ma ia, iluahon ma ia, modom ma ia pakonsi lanjar iparseda.

³Rosuh tumang do uhurni hubani si Dina, boru ni si Jakob ai, holong tumang do uhurni mangidah anak boru ai, gabe ihatahon ma hatani mambuat uhurni.

⁴Nini si Sikem ma hubani si Hemor bapani ai, “Buat ham ma bangku anak boru on bahen parinangonku.”

⁵Tarbogei si Jakob ma na dob iparseda si Sikem do boruni, si Dina ai; tapi halani i talun do anakni manjaga pinahanni, ipasip si Jakob do ai paima roh sidea.

⁶Jadi laho ma si Hemor bapa ni si Sikem ai marayak si Jakob sihol marsahap pakonsi.

⁷Mulak ma anak ni si Jakob hun talun, dob ibogei sidea na masa ai; borit anjaha marah tumang do uhur ni halak ai, halani na ibahen si Sikem na masambor i tongah-tongah ni Israel marhitei na pabutakkon boru ni si Jakob, ai seng bulih bahenon sonai.

⁸Marsahap ma si Hemor hubani sidea, nini ma, “Rosuh do uhur ni anakku si Sikem hubani boru nasiam; mahua bere nasiam ma ia hubani bahen parinangonni.

⁹Marsitondong-tondongan ma hita; bere nasiam ma boru nasiam bennami, borunami pe buat nasiam ma bani nasiam.

¹⁰Rapkon hanami ma nasiam marianan; ungkab do tanoh on bani nasiam; iani anjaha mardalani ma nasiam ijin, anjaha totap ma nasiam ijin.”

¹¹Nini si Sikem ma homa bani bapa ni si Dina ampa hubani botouni, “Idop ma uhur nasiam bangku, hubere pe bani nasiam atap aha na pinindo nasiam.

¹²Humbuei pe ipangindo nasiam bolini pakon sibere-bere, sai bereonku do ai romban hubani hata nasiam, asal ibere nasiam boru ai bangku bahen parinangonku.”

¹³Jadi akal ma ibahen anak ni si Jakob mambalosi si Sikem pakon si Hemor bapani ai, halani na binutakanni ai si Dina, botou ni sidea ai.

¹⁴Nini sidea ma hubani na dua halak ai, “Seng tarbalosi hanami hata ai, laho mamberehon botounami hubani halak na so marsunat, ai habadoron do ai bennami.

¹⁵Pitah ibagas pahara on ra hanami mambalosi pangindoan nasiam, anggo ra nasiam dos pakon hanami, marhitei na marsunat ganup dalahi bani nasiam.

¹⁶Ai pe ase ra hanami mambere borunami bani nasiam anjaha mambuat boru nasiam, marianan ma hanami rap pakon nasiam, gabe sada bangsa ma hita.

¹⁷Tapi anggo lang ra nasiam mambalosi hanami ase isunat nasiam, buatonnami ma borunami, dob ai bungkas ma hanami.”

¹⁸Jadi rosuh ma uhur ni si Hemor pakon si Sikem anakni ai mambogei hata ni sidea ai.

¹⁹Lang pala mardokah-dokah anak parana ai pasaudkon hata ai, halani rosuh ni uhurni bani boru ni si Jakob ai. Ia do sisangapan humbani ginompar ni bapani.

²⁰Jadi laho ma si Hemor pakon si Sikem anakni ai hu horbangan ni huta ni sidea, marsahap ma ia hubani dalahi na i huta ni sidea ai, nini ma,

²¹“Sihol do halak ai marhuan-kuan pakon hita; palopas hita ma sidea marianan i tanoh on, anjaha marhujai-hujon ijon, ai sungkup do lumbang ni tanoh on bahen ianan ni sidea. Boi do buatonta boru ni sidea bahen parinangonta, anjaha boi do bereonta borunta bani sidea.

²²Pitah ibagas pahara on do ase ra halak ai marianan i lambungta anjaha jadi sada bangsa pakon hita, anggo ganup dalahi na i tongah-tongahta isunat songon sidea na marsunat ai.

²³Pinahan ni sidea, arta ni sidea pakon ganup na adong bani sidea, ai lang hita ma simada ai? Sai balosi hita ma pangindoan ni sidea ai, ase marianan sidea rap pakon hita.”

²⁴Jadi ibalosi sidea ma si Hemor pakon si Sikem, anakni ai, ai ma sagala na roh marrapot hu horbangan ni hutani ai; isunat ma ganup dalahi, sagala na roh marrapot hu horbangan ni hutani ai.

²⁵Bani ari patoluhon, sanggah na borit ai iahap sidea, marsiboan podangni ma dua anak ni si Jakob, ai ma si Simeon pakon si Levi, botou ni si Dina ai, idorab ma huta ai na so panagaman anjaha ibunuhi ma sagala dalahi.

²⁶Ibunuh sidea ma homa si Hemor pakon si Sikem, anakni ai, marhitei podang; iboan sidea ma si Dina hun rumah ni si Sikem, jadi laho ma sidea.

²⁷Idorab anak ni si Jakob ma na tarbunuh ai, itaban ma huta ai, halani na binutakanni ai botou ni sidea ai.

²⁸Ibuat sidea ma biribiri, lombu pakon halode ni sidea ronsi haganup na ibagas huta pakon na i darat;

²⁹haganup ugas-ugas ni sidea pakon dakdanak ampa parinangon ni sidea, haganup na ibagas rumah ni sidea itaban anjaha idayok sidea ma.

³⁰Dob ai nini si Jakob ma hubani si Simeon pakon si Levi, “Domma iparoh hanima hasunsahan bangku marhitei na pasamborhon goranku hubani isi ni nagori on, hubani halak Kanaan pakon halak Peris; otik do bilanganku, ase anggo marsada ni riah sidea mangimbang ahu, tontu talu ma ahu bahenon ni sidea, gabe pusa ma ahu pakon na hugompar.”

³¹Tapi nini sidea ma, “Talup ma doskon boru jalang bahenonni botounami?”