Read Batak Simalungun 1 MUSA 35 Bible Online

1 MUSA 35 - Batak Simalungun bible

1 MUSA 35

¹Dob ai nini Naibata ma hubani si Jakob, “Marugas ma ho, laho ma hu Betel, iankon ma ijai, anjaha pauli ma ijai sada anjapanjap hubani Naibata na patalarhon diri-Ni hubam, sanggah na lintun ai ho humbani si Esau, abangmu.”

²Jadi nini si Jakob ma hubani hasomanni sarumah pakon hubani haganup na rapkonsi, “Pangambukkon hanima ma naibata na legan na adong i tongah-tongahnima, manguras ma hanima anjaha gantih hanima ma hiounima.

³Marugas ma hita tangkog hu Betel, ase hupauli ijai sada anjapanjap hubani Naibata, na mambalosi ahu bani panorang hasosakanku anjaha na mangkasomani ahu barang huja pe ahu laho.”

⁴Jadi ibere sidea ma hubani si Jakob sagala naibata na legan na adong bani sidea, ronsi anting-anting na bani pinggol ni sidea; dob ai iponopkon si Jakob ma ai hu toruh ni hayu ara na i lambung ni Sikem.

⁵Dob ai laho ma sidea; jadi sogop ma biar na humbani Naibata bani haganup huta-huta na inggot sidea ai, gabe lang be iayak sidea anak ni si Jakob ai.

⁶Jadi das ma si Jakob hu Lus na i tanoh Kanaan, ai ma Betel, ia pakon ganup hasomanni saodoran.

⁷Ipauli ma ijai sada anjapanjap, ibahen ma goran ni ianan ai El-Betel, halani ijai do ipatalar Naibata dirini hu bani, sanggah na lintun ai ia humbani abangni.

⁸Matei ma si Debora, parorot ni si Rebekka, jadi itanom ma ia i toruh ni hayu ara hampit kehen ni Betel; gabe ibahen ma goran ni hayu ara ai partangisan.

⁹Dob ai iulaki Naibata ma patalarhon diri-Ni hubani si Jakob, dob roh ia hun Padang Aram, anjaha ipasu-pasu ma ia.

¹⁰Ihatahon Naibata ma dompaksi, “Si Jakob do goranmu; seng be si Jakob diloon-Ku goranmu, tapi si Israel ma.” Gabe margoran si Israel mando ia.

¹¹Ambah ni ai ihatahon Naibata ma bani, “Ahu do Naibata, pargogoh na so tarimbang. Manggompari ma ho anjaha manggargar; sada bangsa anjaha sada hulanan ni bangsa-bangsa marharorohan humbam, anjaha raja-raja mandarat humbani binongeimu.

¹²Anjaha tanoh na dob Hubere hubani si Abraham pakon hubani si Isak, berehonon-Ku do in hubam, anjaha berehonon-Ku do in hubani ginomparmu i pudimu.”

¹³Dob ai manaik ma Naibata hun lambungni, humbani ianan parsahapanni ai pakon si Jakob.

¹⁴Ipajongjong si Jakob ma sada batu bani ianan parsahap-sahapanni ai pakon Naibata, iuseihon ma hu atasni galangan siinumon, anjaha iminaki ma ai.

¹⁵Jadi ibahen si Jakob ma goran ni ianan parsahap-sahapanni ai pakon Naibata Betel.

¹⁶Dob ai misir ma sidea hun Betel; jadi sanggah na lang sadiha daoh be sidea hun Eprata, tubuhan tuah ma si Rahel, anjaha payah do ia mangintubuh.

¹⁷Bani na payah ai ia mangintubuh, nini sibaso ai ma dompaksi: Ulang ma ham mabiar, halani sahali on pe anak do jumpah ham.

¹⁸Tapi bani na laho rotap hosahni, ai matei do ia, ibahen ma goranni: Ben-Oni; tapi si Benjamin do ibahen bapani goranni.

¹⁹Ase matei ma si Rahel, itanom ma ia i lambung dalan laho hu Eprata, ai ma Betlehem.

²⁰Anjaha ipajongjong si Jakob ma sada batu i atas tanomanni ai; ai ma tanda tanoman ni si Rahel ronsi nuan.

²¹Dob ai misir ma si Israel, ipajongjong ma barung-barungni i dipar ni Migdal-Eder.

²²Sanggah na marianan si Jakob i tanoh ai, laho ma si Ruben mangkasomani modom si Bilha, parinangon ni bapani ai, anjaha tarbogei do ai bani si Jakob. Sapuluh dua do anak ni si Jakob.

²³Anak ni si Lea ai ma: Si Ruben, anak sikahanan ni si Jakob, si Simeon, si Levi, si Juda, si Isasar pakon si Sebulon.

²⁴Anak ni si Rahel ai ma: Si Josep pakon si Benjamin.

²⁵Anak ni si Bilha, jabolon naboru ni si Rahel ai ma: Si Dan pakon si Naptali.

²⁶Anak ni si Silpa, jabolon naboru ni si Lea ai ma: Si Gad pakon si Asser. Ai ma anak ni si Jakob, na tubuh bani i Padang Aram.

²⁷Das ma si Jakob hubani si Isak bapani ai i Mamre, atap Kiriat-Arba, ai ma Hebron, panginsolatan ni si Abraham pakon si Isak.

²⁸Ia umur ni si Isak saratus ualuh puluh tahun do.

²⁹Dob ai rotap ma hosah ni si Isak, matei ma ia, jadi ipatumpu ma ia hubani ompungni, dob sayur matua anjaha sobalan bani hagoluhan on, anjaha si Esau pakon si Jakob anakni ai do mananomsi.