Read Batak Simalungun 1 MUSA 39 Bible Online

1 MUSA 39 - Batak Simalungun bible

1 MUSA 39

¹Tapi anggo si Josep iboban ma ia tuad hu Masir; jadi iboli si Potipar, sada halak Masir, pagawai istana ni Parao, kepala pangawal ni raja ma ia humbani halak Ismael, na mamboan ia tuad hujai.

²Sai ihasomani Naibata do si Josep ai, gabe jadi ma tongtong na hinorjahonni; jadi sai i rumah ni tuanni, halak Masir ai do ia.

³Jadi dob iidah tuanni, na hinasomanan ni Jahowa do ia, anjaha na itumpak Jahowa do ganup na hinorjahon ni tanganni,

⁴jumpahan idop ni uhur ma ia i lobei ni tuanni, boi ma ia gabe siparugas i lobeini; iangkat ma ia gabe siramotkon rumahni, anjaha ganup na dong bani iondoskon ma hu tangan ni si Josep.

⁵Dob na pinabangkitni ai ia gabe siramotkon rumahni ronsi haganup na dong bani, ipasu-pasu Jahowa ma rumah ni halak Masir ai marhalanihon si Josep; pasu-pasu ni Jahowa do na sogop bani ganup na dong bani, i rumah pakon i juma.

⁶Sabonar haganup na dong bani iondoskon do hu tangan ni si Josep, anjaha marhasomankon si Josep, aha pe lang na ipabotoh-botoh uhurni, sobali ruti na pinanganni ai. Tapi jenges do rupa pakon bohi ni si Josep ai.

⁷Jadi masa ma dob ai, rosuh ma uhur ni parinangon ni tuanni ai mangidah si Josep, ihatahon ma: Hasomani ma ahu modom!

⁸Tapi manjua do si Josep, ihatahon ma bani parinangon ni tuanni ai: Tonggor ma, seng dong ipabotoh-botoh tuanku sobali ahu i rumah on, anjaha ganup na dong bani iondoskon do hu tanganku.

⁹Seng dong sibanggalan kuasani i rumah on sobali ahu, anjaha aha pe lang na so iondoskon hu bangku sobali ham, halani parinangonni ham. Sonaha ma tarbahen ahu mangkorjahon hajahaton na sonin banggalni anjaha mardousa dompak Naibata?

¹⁰Tapi age pe sai sonai hatani hubani si Josep ari-ari, seng itangihon si Josep ia, sihol modom i lambungni atap marsaor pakonsi.

¹¹Tapi bani na sadari, laho ma si Josep hu rumah manlahoi lahoanni, anjaha sahalak pe lang dong na i rumah.

¹²Jadi isoroh puang-puang ai ma hiouni, nini ma, “Hasomani ma ahu modom!” Tapi itadingkon si Josep ma hiouni ai i tanganni, lanjar lintun ma ia hu darat.

¹³Dob iidah na dob itadingkon si Josep ai hiouni i tanganni lanjar lintun ia hu darat,

¹⁴gabe dilo-dilo ma ia bani parhorja na i rumahni, nini ma hubani sidea, “Tonggor ma, iboan do hujon sada halak Heber, laho mambahen habadoron banta. Roh do ia hu bangku, sihol rap modom pakon ahu, gabe hupagogoh ma sorangku dilo-dilo.

¹⁵Tapi dob ibogei hupagogoh sorangku dilo-dilo, itadingkon ma hiouni i lambungku, lanjar lintun ma ia hu darat.”

¹⁶Dob ai ipaturut ma hiou ni si Josep ai i lambungni, paima mulak tuanni hu rumah.

¹⁷Ipatugah ma songon hata ni ondi hu bani, nini ma, “Roh do nongkan hu bangku jabolon halak Heber ai, na binoanmu hujon laho mambahen habadoron hu bangku.

¹⁸Tapi dob hupagogoh sorangku dilo-dilo, itadingkon ma hiouni i lambungku, lanjar lintun ma ia hu darat.”

¹⁹Jadi dob ibogei si Potipar hata ni parinangonni ai, na hinatahonni ai hu bani, “Sonon-sonon do ibahen jabolonmai hu bangku, gabe manringis tumang ma ia.”

²⁰Itangkap tuanni ai ma si Josep, iondoskon ma ia hu tutupan ni halak na tinutup ni raja ai. Ase ijai ma si Josep tartutup.

²¹Tapi ihasomani Jahowa do si Josep, idop do uhur-Ni mangidahsi, anjaha ibahen do dear uhur ni sijaga tutupan ai mangidahsi.

²²Iondoskon sijaga tutupan ai ma ganup na tartutup ibagas tutupan ai hu tangan ni si Josep, ronsi haganupan silahoan ijai, ia do manlahoi.

²³Seng pala be ipaanu-anu sijaga tutupan ai atap aha pe horja na dob niondoskonni hubani si Josep, halani ihasomani Jahowa do ia, anjaha aha na hinorjahonni itumpaki Jahowa do.