Read Batak Simalungun 1 MUSA 4 Bible Online

1 MUSA 4 - Batak Simalungun bible

1 MUSA 4

¹Jadi marsaor ma si Adam pakon si Hawa parinangonni ai; boratan rumah ma ia, anjaha itubuhkon ma si Kain. Dob ai nini ma, “Domma dapot ahu sada anak dalahi marhitei pangurupion ni Jahowa.”

²Itubuhkon ma use si Abel, anggini ai. Parmahan biribiri do anggo si Abel, tapi parjuma-juma do ia si Kain.

³Bani dokah-dokah ni ari, ibuat si Kain ma humbani limbuah ni jumani bahen galangan hubani Jahowa.

⁴Si Abel pe iboan ma humbani bunga tubuh ni pinahanni ampa humbani taboh-tabohni. Jadi rosuh ma uhur ni Jahowa mangidah si Abel ampa galanganni ai,

⁵tapi anggo si Kain ampa galanganni ai seng iharosuhkon. Jadi milas tumang ma uhur ni si Kain anjaha migar ma bohini.

⁶Nini Jahowa ma bani si Kain, “Mase milas tumang uhurmu anjaha migar bohimu?

⁷Ai lang dirgak do bohimu, anggo ihorjahon ho na madear? Tapi anggo lang ihorjahon ho na madear, monggop ma dousa in i lobei ni labah in, anjaha hubam do ihasiholhon, tapi ho do patut manrajaisi.”

⁸Dob ai nini si Kain ma bani anggini si Abel ai, “Eta, laho hita hu juma! Dob das sidea i juma, jongjong ma si Kain mandorab anggini ai, lanjar ibunuh.”

⁹Jadi nini Jahowa ma bani si Kain, “Ija do si Abel anggimin?” Nini ma, “Seng hubotoh, ai ahu siparorot-rorot anggingku?”

¹⁰Tapi nini ma, “Aha do na binahenmin? Tangar ma doruh-doruh do daroh ni anggimin hu Bangku hun tanoh in.

¹¹On pe, hona papa ma ho, hona usir hun tanoh in, na pangangang babahni manjalo daroh ni anggimin, humbagas tanganmin.

¹²Anggo ihorjahon ho tanoh in, seng be bereonni gok gogohni hubam; mawat-awat anjaha kahou-kahou mando ho i tanoh on.”

¹³Nini si Kain ma bani Jahowa, “Banggal do uhum na bangku in, lobih humbani na tarporsan ahu.

¹⁴Iusir Ham do ahu sadari on hun tanoh on anjaha maningon marponop do ahu humbani bohi-Mu; mawat-awat anjaha kahou-kahou mando ahu i tanoh on, anjaha bunuhon ni sagala na jumpahan ahu ma ahu.”

¹⁵Tapi nini Jahowa ma hu bani, “Lang sonai. Barang ise na mambunuh si Kain, maningon pitu lompit do abulonni.” Dob ai ibahen Jahowa ma tanda bani si Kain, ase ulang ibunuh atap ise pe ia, na marjumpah pakonsi.

¹⁶Dob ai laho ma si Kain hun lobei ni Jahowa, anjaha marianan ma ia i tanoh Nod, hampit hapoltakan ni Eden.

¹⁷Marsaor ma si Kain ampa parinangonni, boratan rumah ma ia anjaha itubuhkon ma si Hanok. Itombei ma sada huta ibahen ma goranni Hanok, mangihutkon goran ni anakni, si Hanok ai.

¹⁸Dob ai itubuhkon si Hanok ma si Irad, si Irad manubuhkon si Mahujael; si Mahujael manubuhkon si Lamek.

¹⁹Dua do ibuat si Lamek parinangonni, goranni na sada si Ada, goran ni na sada nari si Silla.

²⁰Dob ai itubuhkon si Ada ma si Jabal; ia do ompung ni halak siiankon tenda ampa sipahan pinahan.

²¹Ia goran ni anggini si Jubal do; ia do ompung ni sagala halak siparhusapi ampa siparsarunei.

²²Itubuhkon si Silla ma homa si Tubalkain; ia do ompung ni sagala halak tukang tombaga pakon bosi; si Naema do botou ni si Tubalkain.

²³Nini si Lamek ma hubani parinangonni na dua ai, “Ale Ada pakon ho Silla bogei ma sorangku; hanima parinangon ni si Lamek, tangar ma na huhatahon on! Hubunuh do sada amang-amang halani ugahku, sada parana halani lonsing-lonsing na hu bangku.

²⁴Anggo pitu hali lompit iabul si Kain, si Lamek maningon pitu puluh pitu hali lompit do.”

²⁵Marsaor ma use si Adam pakon parinangonni jadi itubuhkon ma sada anak, anjaha ibahen ma goranni si Set, ai nini do, “Ibere Naibata do bangku anak na legan gantih ni si Abel, halani ibunuh si Kain ia.”

²⁶Tubuh ma homa bani si Set sada anak, ibahen ma goranni si Enos. Ijia ma ipungkah halak mandilo goran ni Jahowa.