Read Batak Simalungun 1 MUSA 41 Bible Online

1 MUSA 41 - Batak Simalungun bible

1 MUSA 41

¹Jadi dob salpu girtip dua tahun, marnipi ma Parao, jongjong ma ia i topi ni Bah Nil.

²Taridah ma tangkog hun Bah Nil ai pitu lombu na jenges-jenges janah na mombur-mombur, jadi manggagati ma sidea bani arung-arung ai.

³Dob ai soluk, tangkog ma pitu lombu na legan hun Bah Nil ai, na bajan-bajan anjaha na merung-merung, jongjong i lambung ni lombu na i topi ni bah ai.

⁴Jadi ipampangani lombu na bajan-bajan ampa na merung-merung ai ma lombu na jenges-jenges ampa na mombur-mombur ai. Dob ai tarpuho ma Parao.

⁵Tarpodom ma ia use, anjaha marnipi ma paduahalihon; taridah ma kaluar humbani sangkambona pitu kambuyur gandum na porngis anjaha na jenges.

⁶Dob ai taridah homa ma tubuh pitu kambuyur gandum na merung anjaha na melus ibahen logou na hun hapoltakan.

⁷Jadi ibonduti buyur na merung ai ma na pitu kambuyur na porngis anjaha na jenges ai. Jadi tarpuho ma Parao, tonggor ma, nipi do hape.

⁸Patar ni ai susah tumang ma uhurni. Isuruh ma na mangalopi haganup partondung pakon na pentar na i tanoh Masir. Ipajojor Parao ma nipini ai hubani sidea, tapi sahalak pe lang na boi patorangkon ai hubani Parao.

⁹Jadi ihatahon kopala ni sitahu anggur ai ma hubani Parao: Huingat do salahku sadari on.

¹⁰Sanggah na manringis Parao hubani jabolonta, gabe iondoskon ahu pakon kopala ni simasak ruti ondi hu tutupan, na i rumah ni kopala pangawal,

¹¹jadi marnipi ma hanami bani na saborngin, ahu pakon ia, legan bei do arti ni nipinami ai.

¹²Adong do ijai sada garama, halak Heber hasomannami, jabolon ni kopala pangawal ai, ipatugah hanami ma nipinami ai hu bani, gabe itorhai ma ai bennami, marguru hubani nipinami do itorhai.

¹³Anjaha songon tinorhaanni ai bennami, sonai do homa tarjadi; mulak do ahu hu jabatanku, targantung do anggo ia.

¹⁴Isuruh Parao ma na mangalopi si Josep; jadi podas ma ipaluah sidea ia hun tutupan ai, isuhur ma gumisni anjaha igantihi ma hiouni, dob ai laho ma ia mangadap Parao.

¹⁵Nini Parao ma dompak si Josep, “Na marnipi do ahu, hape sahalak pe lang na boi manorhaisi. Tapi hubogei do baritamu, nini halak: anggo adong ibogei ho nipi, mintor ibotoh ho do manorhaisi.”

¹⁶Nini si Josep ma mambalosi Parao, “Sedo ahu, Naibata do na patugahkon hasonangan hubani Parao.”

¹⁷Dob ai nini Parao ma dompak si Josep, “Marnipi do ahu, jongjong do ahu i pasir ni Bah Nil;

¹⁸dob ai kaluar ma pitu lombu na mombur anjaha na jenges rupani humbani Bah Nil ai, anjaha laho manggagati arung-arung ai.

¹⁹Dob ai siluk ma kaluar pitu lombu na legan, merung anjaha bajan tumang rupani, seng ongga ope huidah na sonai bajanni i sab tanoh Masir.

²⁰Ipampangani lombu na merung ampa na bajan ai ma hapitusi lombu na mombur na parlobei ai.

²¹Das ma ganupan ai hu boltokni ibonduti, tapi lanjar do lang adong tanda, na dob i boltokni ai, ai lanjar bajan do rupa ni sidea, songon na bani mulani ai. Jadi tarpuho ma ahu.

²²Huidah ma use ibagas nipingku kaluar hun sangkambona pitu kambuyur gandum na porngis anjaha na dear.

²³Dob ai tubuh ma use pitu kambuyur na legan, horah, merung anjaha melus ibahen logou na hun hapoltakan.

²⁴Jadi ibonduti buyur na merung ai ma hapitusi buyur na jenges ai. Domma namin hupatugah ganupan ai hubani partondung, tapi sahalak pe lang na boi patorangkonsi hu bangku.”

²⁵Dob ai nini si Josep ma dompak Parao, “Sada do arti ni nipi ni Parao ai. Ipatugah Naibata do hubani Parao, na sihol pamasaon-Ni.

²⁶Na pitu lombu na dear ai, pitu tahun do ai, anjaha na pitu kambuyur na dear ai, pitu tahun do homa ai; sada do arti ni nipi ai.

²⁷Na pitu lombu na merung anjaha na bajan ai, na soluk kaluar use, pitu tahun do ai; na pitu kambuyur na lapungon anjaha na melus ai ibahen logou na hun hapoltakan, lohei sipitu tahun do ai.

²⁸Ai ma na dob huhatahon hubani Parao; ipataridahkon Naibata do hubani Parao na sihol pamasaon-Ni.

²⁹Tonggor ma masa ma pitu tahun pariama bolon i sab tanoh Masir.

³⁰Irik hujai masa ma use pitu tahun lohei; gabe halupahonon ni halak ma ganup pariama bolon ai i tanoh Masir, halani bois ma tanoh in bahenon ni lohei ai.

³¹Lang be botohon ni halak pariama bolon na i tanoh in bahenon ni lohei na soluk ai, ai sabonar bajan tumang do ai.

³²Anjaha mambahen na pala dua hali marnipi Parao, artini ai: domma itotapkon Naibata na masa ai, anjaha podas ma pamasaon-Ni.

³³On pe, ipindahi Parao ma sada halak na pantas anjaha na pentar maruhur sipabangkitonni patorsahon tanoh Masir.

³⁴Ihatahon Parao ma pabangkitkon kopala-kopala i nagori on, laho patumpuhon saparlima ni gogoh ni tanoh Masir ibagas na pitu tahun pariama bolon ai.

³⁵Ipatumpu sidea ma sagala sipanganon ibagas tahun pariama bolon na roh on, anjaha ipagugun hinan ma gandum sikuasaan ni Parao bahen sipanganon i kota-kota, anjaha isimpan ma ai.

³⁶Jadi bohal ma ai i tanoh on bani lohei sipitu tahun na sihol masa ai i tanoh Masir, ase ulang maseda tanoh on halani lohei ai.”

³⁷Dear tumang do ojur ai bani uhur ni Parao pakon juakjuakni ganupan.

³⁸Jadi nini Parao ma hubani juakjuakni ai, “Boi ma jumpah hita sada halak na songonsi, na niiankon ni Tonduy ni Naibata?”

³⁹Nini Parao ma dompak si Josep, “Halani domma ipabotohkon Naibata haganupan on bam, seng dong be halak na pantas anjaha na pentar maruhur na songon ho.

⁴⁰Ondos hubam ma rumahku, anjaha balosan ni bangsangku ma parentahmu; pitah paratas on ma hasurunganku humbam.”

⁴¹Ambah ni ai nini Parao ma dompak si Josep, “Tonggor ma, domma hupabangkit ho manguasai ganup tanoh Masir.”

⁴²Dob ai itanggali Parao ma tintinni humbani tanganni, inahkon ma ai hubani tangan ni si Josep; isorungkon ma hubani pakean humbani kaen na alus, anjaha ibahen ma horung-korung omas hu borgokni.

⁴³Ipanaik ma ia hu garetani paidua, anjaha martingting ma sidea i lobeini, “Manrogop ma nasiam! Ase sonai ma ia ipabangkit Parao, markuasa i sab tanoh Masir.”

⁴⁴Ambah ni ai nini Parao ma hubani si Josep, “Ahu do Parao, tapi anggo lang ibagas botohmu, sahalak pe lang na boi mangangkat tangan atap naheini i sab tanoh Masir.”

⁴⁵Ibahen Parao ma goran ni si Josep: Zafenat Paneah, anjaha ibere ma hubani si Asnat, boru ni si Potifera, malim i huta On, bahen parinangonni. Dob ai misir ma si Josep manginggoti tanoh Masir.

⁴⁶Tolu puluh tahun ma umur ni si Josep sanggah na jongjong ai ia ilobei ni Parao, raja ni Masir. Misir hun lobei ni Parao ma si Josep, laho manginggoti ganup tanoh Masir.

⁴⁷Ibere tanoh ai ma gogohni marjunjun ibagas na pitu tahun pariama bolon ai.

⁴⁸Dob ai ipatumpu si Josep ma haganup sipanganon ibagas sipitu tahun ai, na adong i tanoh Masir, isimpan ma ai i kota-kota; gogoh ni juma inggot ni ganup kota, inahkon ma ai hubagas kota ai.

⁴⁹Jadi songon horsik na i topi ni laut ma hinabuei ni omei na pinajunjun ni si Josep ai, pala iparontihon use manuhati, halani lang be tarsuhati.

⁵⁰Dob ai tubuh ma dua anak bani si Josep, sanggah lang roh ope tahun lohei ai, ai ma na tinubuhkon ni si Asnat, boru ni si Potifera, malim i huta On.

⁵¹Ibahen si Josep ma goran ni bunga-tubuhni ai si Manase, halani nini, “Lupa do ahu ibahen Naibata bani haganup hasombuhonkin ronsi rumah ni bapa.”

⁵²Goran ni na paduahon ai ibahen si Efraim, halani nini, “Ai gabe do ahu itumpak Naibata i tanoh hadoyukonkin.”

⁵³Dob salpu na pitu tahun pariama bolon ai i tanoh Masir,

⁵⁴mulai ma roh lohei sipitu tahun na ipatugah si Josep hinan. Masa ma lohei bani haganup nagori, tapi i sab tanoh Masir adong do sipanganon.

⁵⁵Dob loheian haganup tanoh Masir, anjaha mandoraki rayat haganupan mangindo sipanganon hubani Parao, nini Parao ma hubani haganup halak Masir ai, “Laho ma hanima hubani si Josep, bahen ma aha na hinatahonni bennima!”

⁵⁶Ase dob masa lohei bani sab dunia on, iungkab si Josep ma sagala tuangan anjaha ijual ma gandum hubani halak Masir, halani parah tumang do lohei ai i tanoh Masir.

⁵⁷Roh ma homa hun sab dunia on halak hu tanoh Masir laho mamboli gandum humbani si Josep, halani parah tumang do lohei ai i sab dunia on.