Read Batak Simalungun 1 MUSA 42 Bible Online

1 MUSA 42 - Batak Simalungun bible

1 MUSA 42

¹Dob itangar si Jakob, adong do gandum i tanoh Masir, nini ma hubani anakni ai, “Mase ma sai marsinonoan hanima?”

²Ambah ni ai nini ma, “Adong do hubogei gandum i tanoh Masir, tuad ma hanima hujai, anjaha boli ma ijai gandum banta, ase manggoluh, ulang matei hita.”

³Jadi tuad ma sapuluh halak sanina ni si Josep laho mamboli gandum hun tanoh Masir.

⁴Tapi anggo si Benjamin, anggi ni si Josep ai, lang ipabingkat si Jakob rap pakon abangni ai, ai ninuhurni: Atap marmara holi ia.

⁵Dob ai das ma anak ni si Israel na mangaldung ai rap pakon pangaldung na legan, ai i tanoh Kanaan pe domma masa lohei.

⁶Tapi si Josep do manrajai i nagori ai, ia do sijual gandum hubani ganup rayat ni nagori ai. Daskonsi sanina ni si Josep ai, manrogop ma sidea i lobeini, pala das bohi ni sidea hu tanoh.

⁷Dob iidah si Josep abangni ai, itanda ma sidea, tapi ipakulah do ia songon halak na legan dompak sidea, anjaha koras do parsahapni dompak sidea, nini ma, “Roh hunja do hanima?” Nini sidea ma, “Hun tanoh Kanaan do, laho mamboli sipanganon.”

⁸Ase itanda si Josep do abangni ai, tapi anggo ia seng itanda sidea.

⁹Jadi idingat si Josep ma nipi, na niipini pasal sidea; nini ma dompak sidea, “Parkahap do hanima, na roh do hanima sihol mangidah partoguh na buruk.”

¹⁰Nini sidea ma dompaksi, “Lang tuannami! Pitah na sihol mamboli sipanganon do ase roh jabolon-jabolonmu on.

¹¹Anak ni sada halak do hanami ganup; na bujur do hanami, seng ongga parkahap hanami jabolonmu on.”

¹²Nini si Josep ma dompak sidea, “Lang, sihol mangidah partoguh na buruk do hanima ase roh.”

¹³Nini sidea ma mambalosi, “Sapuluh dua do hanami jabolonmu on marsanina, anak ni sada halak i tanoh Kanaan; tading i lambung ni bapanami do nuan sianggian ai, tapi anggo na sada seng ijin be.”

¹⁴Dob ai nini si Josep ma dompak sidea, “Songon na dob huhatahon in bannima, parkahap do hanima.

¹⁵On ma parsubaan bannima. Songon sintongni manggoluh Parao, seng boi laho hanima hunjon, anggo seng roh angginima sianggian ai hujon.

¹⁶Suruh hanima ma sahalak hun bannima, mangalop angginima ai, patutupkonon ma anggo hanima, ase boi ujion hatanima, atap na bujur do hanima; tapi anggo lang, songon sintongni manggoluh Parao, parkahap do hanima.”

¹⁷Jadi ipamasuk ma sidea hu tutupan tolu ari dokahni.

¹⁸Patolu-arihon nini si Josep ma hubani sidea, “Sonon ma bahen hanima ase manggoluh hanima, ai huhabiari do Naibata.

¹⁹Anggo halak na bujur do hanima, tading ma sahalak hun bannima na marsanina i tutupan on, laho ma anggo hanima, boban ma gandum, bahen panganon ni rumah tangganima bei.

²⁰Tapi boan hanima ma angginima sianggian ai, ase tarhaporsayai hatanima anjaha ulang matei hanima.” Jadi ibahen sidea ma sonai.

²¹Tapi marsisolsolan ma sidea, “Tongon do, pardousa do hita dompak angginta ondi, ai iidah hita do pusok ni uhurni, sanggah na ielek-elek hita, hape lang ibalosi hita; halani ai do roh hubanta hasosakan on.”

²²Jadi nini si Ruben ma mambalosi sidea, “Ai lang huhatahon hinan do hubannima, ulang mardousa hanima hubani ambia ai, tapi lang itangar hanima hatangku; ase sapata ni darohni ai do na manginsonoh hubanta.”

²³Tapi lang ibotoh sidea na iarusi si Josep do hata ni sidea ai, halani marjurubahasa do sidea.

²⁴Surut ma si Josep humbani sidea lanjar tangis; dob ai mulak ma ia use marsahap-sahap pakon sidea. Itangkap ma si Simeon hun tongah-tongah ni sidea, anjaha isangkut ma ia i lobei ni sidea.

²⁵Ihatahon si Josep ma na mannahi gandum hu sumpit ni sidea, paulakkon duit ni sidea hu sumpitni bei, ampa mamberehon bohal i dalan hubani sidea. Jadi ibahen ma sonai hubani sidea.

²⁶Dob ai inahkon sidea ma gandum ai bani halode ni sidea, jadi misir ma sidea hunjai.

²⁷Sanggah iungkab sahalak humbani sidea sumpitni laho mambere gagaton hubani halodeini i parbornginan, iidah ma duitni tampei i babah ni sumpitni.

²⁸Nini ma hubani saninani ai, “Mulak do duitku, andon ibagas sumpitkon.” Jadi malitonduy ma sidea, rusak bei ma sidea marsinonoan, nini sidea ma, “Aha do on, na binahen ni Naibata hubanta?”

²⁹Dob das sidea hu tanoh Kanaan, hubani si Jakob bapa ni sidea ai, ibaritahon sidea ma hubani ganup na masa ai bani sidea, nini ma,

³⁰“Gomos do parsahap ni halak ai, ai ma raja ni nagori ai hu bennami, anjaha ihatahon do hanami parkahap, na mangkahapi tanoh ai.

³¹Nini hanami ma hu bani, ʻNa bujur do hanami, seng parkahap hanami.

³²Sapuluh dua do hanami jabolonmu on marsanina, anak ni sada halak i tanoh Kanaan; tading i lambung ni bapanami do nuan sianggian ai, tapi anggo na sada seng ijin be.ʼ

³³Jadi ihatahon halak ai ma, ai ma raja ni nagori ai hu bennami, ʻHunjon ma botohon na bujur hanima. Tading ma sada humbennima i lambungku; boban hanima ma gandum bahen panganon ni rumah tangganima, misir ma hanima.

³⁴Dob ai boban hanima ma angginima sianggian ai hu bangku, ase hubotoh seng parkahap, na bujur do hanima hape. Paulakonku ma bannima saninanima ai, anjaha boi ma nunutonnima mangaldung hu tanoh on.ʼ ”

³⁵Sanggah na palumeihon sumpitni bei sidea, iidah ma parduitanni ibagas sumpitni bei. Dob iidah sidea pakon bapa ni sidea parduitan ni sidea ai, mabiar ma sidea.

³⁶Dob ai nini si Jakob, bapa ni sidea ai ma hubani sidea, “Na laho popor mando ahu bahenonnima. Lang ijin be si Josep, lang ijin be si Simeon, si Benjamin pe sihol buatonnima. Ganupan in martumpu hu bangku.”

³⁷Nini si Ruben ma hubani bapani ai, “Anakku na dua in ma bunuh ham, anggo lang mulak ia huboban bamu; ondoskon ham ma ia hu tanganku, sai na mulak do ia boanonku hubamu.”

³⁸Nini ma, “Seng bulih tuad anakkin pakon hanima, ai domma matei abangni, sahalaksi mando na tading; atap sonaha dong parmaraan mangonai hubani bani dalan sibontasonnima ai, jadi hu nagori toruh mando ahu na ubanon on taruhkononnima, halani pusok ni uhur.”