Read Batak Simalungun 1 MUSA 44 Bible Online

1 MUSA 44 - Batak Simalungun bible

1 MUSA 44

¹Dob ai iparentahkon ma hubani siramotkon rumahni, nini ma, “Nahi ma sumpit ni halak on pakon gandum, sadiha na tarboban sidea, anjaha bahen ma duit ni sidea bei, hu babah ni sumpit ni sidea.

²Nahkon ma panginumanku, panginuman perak in, hu babah ni sumpit ni sianggian ai, ampa duit boli ni gandum ai.” Jadi ibahen ma songon na hinatahon ni si Josep ai.

³Patarni siangkonsi ari, ipabingkat ma sidea rap pakon halode ni sidea.

⁴Tapi kaluarhonsi sidea hun kota ai, seng sadiha daohni ope, nini si Josep ma hubani siramotkon rumahni, “Misir ma ho, ayaki ma halak ondi, anjaha anggo dob jumpah ho sidea, hatahon ma hubani sidea, ʻMase ma ibahen hanima na jahat balos ni na madear? Mase ma itangko hanima panginuman perak ai?

⁵Ai lang on do panginuman ni tuanku, anjaha marhitei ai ia manjahai? Na sambor do na binahennima in?ʼ ”

⁶Daskonsi ia hubani sidea, ihatahon ma hata nongkan hubani sidea.

⁷Nini sidea ma mambalosisi, “Mase ma sonai parsahapmu, tuannami? Daoh ma hun bennami jabolonmu mangkorjahon na sonai.

⁸Tonggor ham, duit na jumpah hanami i babah ni sumpitnami iboban hanami do mulak bamu hun tanoh Kanaan. Sonaha ma panangkonami bani perak pakon omas hun rumah ni tuanta ai?

⁹Bani ise hun bennami jabolonmu on jumpah panginuman ai, maningon matei ma ia; hanami pe homa gabe jabolon ni tuanta ai ma.”

¹⁰Nini ma mambalosi, “Songon na hinatahon ni nasiam ai ma tongon. Bani ise jumpah ai, ia ma gabe jabolonku, tapi maluah do anggo nasiam.”

¹¹Iolos sidea ma patoruhkon sumpitni bei hu tanoh, anjaha iungkab bei ma sumpitni ai.

¹²Dob ai ipareksa ma, mulai humbani sikahanan marujung bani sianggian, jadi jumpah ma panginuman ai bani si Benjamin.

¹³Iparrigat sidea ma hiouni, ipantampeihon sidea ma sumpitni hu halodeni, jadi mulak ma sidea hu kota.

¹⁴Dob das si Juda pakon saninani ai hu rumah ni si Josep, ijai ope ia, jadi manrogop ma sidea hu tanoh i lobeini.

¹⁵Nini si Josep ma dompak sidea, “Aha do na binahennima on? Ai lang ibotoh hanima na pandei manjahai do jolma na songon ahu on?”

¹⁶Jadi nini si Juda ma, “Aha ma hatahononnami hubani tuannami, aha ma balosnami, anjaha sonaha ma pamintorinami bani dirinami? Domma ipatalar Naibata hajahaton ni jabolonmu on. Jabolon ni tuannami ma hanami ampa halak na jumpah bani panginuman ai.”

¹⁷Nini ma mambalosi, “Daoh ma ai humbangku, mangkorjahon na sonai. Bani ise jumpah panginuman ai, ia do na gabe jabolonku, tapi anggo hanima, tangkog ma hanima mardamei-damei hubani bapanima.”

¹⁸Dob ai ipadohor si Juda ma hu lambungni, nini ma, “Sombahku bamu, tuannami, lopas ma jabolonmu on mangkatahon sangkababah hata hu pinggol ni tuannami, sai ulang ma mintor gajak ringismu bangku jabolonmu, ai doskon Parao sandiri do ham.

¹⁹Tuannami do manungkun hubani jabolonmu, sonon, ʻAdong ope bapa atap angginima?ʼ

²⁰Jadi ihatahon hanami ma tongon hubani tuannami, ʻAdong ope bapanami na dob matua, anjaha sada anak sianggianni, tubuh bani panorang hatuaonni; ia abangni domma matei, ia mando tading na sainang, anjaha haholongan ni bapani do ia.ʼ

²¹Ham do mangkatahon hubani jabolonmu, ʻBoban hanima ma ia tuad hu bangku, ase iidah matangku ia.ʼ

²²Ihatahon hanami do namin bani tuannami, ʻLang tartadingkon dakdanak ai bapani, halani anggo itadingkon bapani, tontu matei ma ia.ʼ

²³Jadi nimu do hubani jabolonmu, ʻAnggo seng tuad angginima sianggian ai rap pakon hanima seng malo be idahonnima bohingku.ʼ

²⁴Dob mulak hanami hubani jabolonmu bapanami, ipatugah hanami ma hubani hata ni tuannami.

²⁵Dob ai nini bapanami ma, ʻUlaki hanima ma mangaldung otik sipanganon banta.ʼ

²⁶Tapi ihatahon hanami ma, ʻSeng tarbahen hanami tuad. Anggo dihut angginami sianggian in hasomannami, tuad pe hanami, ai lang malo idahonnami bohi ni raja ai, anggo lang angginami sianggian in hasomannami.ʼ

²⁷Jadi nini jabolonmu bapanami ai ma hu bennami, ʻIbotoh hanima do, dua do anak bangku itubuhkon parinangonku,

²⁸na sada domma misir humbangku, anjaha domma huhatahon: Tontu domma isoroh binatang panoroh ia, anjaha ronsi nuan, seng huidah ia.

²⁹Anggo ibuat hanima homa dakdanak on hun lobeihu anjaha hona mara ia, tontu hu nagori toruh mando ahu taruhononnima, halani pusok ni uhur.ʼ

³⁰On pe, anggo das ma ahu hubani jabolonmu, bapanami, hape lang dihut rap pakon hanami dakdanak in, na dob sangkut hubani tonduy ni bapani,

³¹tontu matei ma ia anggo iidah lang ijin dakdanak in; anjaha hanami jabolonmu ma na patuadkon jabolonmu, bapanami na ubanon ai, hu nagori toruh halani pusok ni uhur.

³²Tapi ahu, jabolonmu on do, na manjamin dakdanak in hubani bapanami, ningku do, ʻAnggo lang hupaulak ia hubamu, ahu ma mardousa hubani bapa sadokah manggoluh ahu.ʼ

³³On pe, ahu jabolonmu on ma, na tading ijon gabe jabolon ni tuannami gantih ni dakdanak in. Janah paturut ma ia mulak rap pakon sanina-saninani.

³⁴Sonaha ma tarbahen ahu tangkog hubani bapanami anggo lang odor rap pakon dakdanak in? Seng tarnonoi ahu hinamagou na sogop hubani bapangku.”