Read Batak Simalungun 1 MUSA 45 Bible Online

1 MUSA 45 - Batak Simalungun bible

1 MUSA 45

¹Jadi lang tartahan si Josep be sihol ni uhurni i lobei ni ganup halak na jongjong i lambungni, gabe idilohon ma, “Suruh hanima ma hu darat haganup halak hun lambungkon.” Ase seng dong halak na jongjong i lambungni, sanggah na pinatandahon ni si Josep dirini hubani saninani ai.

²Dob ai tangis ma ia gogoh, pala tarbogei hubani halak Masir pakon hubani sinrumah ni Parao.

³Nini si Josep ma dompak saninani ai, “Ahu do si Josep, manggoluh ope bapanta? Tapi lang tarbalosi saninani ai ia, halani gobir ni sidea i lobeini.”

⁴Dob ai nini si Josep ma dompak saninani ai, “Padohor nasiam ma hu lambungkon!” Jadi ipadohor sidea ma. Nini ma, “Ahu do si Josep, anggi nasiam, na jinual nasiam hu tanoh Masir.

⁵On pe, ulang ma sunsah anjaha pusok uhur nasiam, halani na jinual nasiam ahu hujon, ai pasirsir hagoluhan nasiam do ase isuruh Naibata ahu parlobei nasiam.

⁶Ai padua tahun on ope masa lohei i tanoh on, tapi lima tahun nari ope lang adong tidahan atap pariama pe.

⁷Tapi isuruh Naibata do ahu parlobei nasiam, laho pajonamkon ginompar nasiam i tanoh on, laho paluahkon ampa pagoluhkon buei humbani nasiam.

⁸On pe, sedo nasiam na marsuruh ahu hujon, Naibata do. Ia do pabangkit ahu gabe bapa bani Parao, gabe kopala ni ganup rumahni, ampa panrajai i sab tanoh Masir.

⁹Ase papodas nasiam ma tangkog hubani bapa, patugah nasiam ma hu bani, ʻSonon do hata ni anakmu si Josep, domma ipabangkit Naibata ahu gabe raja ni ganup tanoh Masir, tuad ma ham marayak ahu, ulang be ipadokah-dokah.

¹⁰Marianan i tanoh Gosen ma ham, ase dohor i lambungku ham pakon anakmu, ampa pahompumu, ronsi biribiri pakon lombumu ampa haganup na dong bamu.

¹¹Ahu do mansarihon ham ijai, ai lima tahun nari ope lohei on, ase ulang gabe masombuh ham pakon isi ni rumahmu, ronsi ganup na adong bamu.

¹²Ai mata nasiam pakon mata ni anggingku si Benjamin in do mangidahsi, paboa pamanganku do na manonahkon hata in bani nasiam.ʼ

¹³Patugah nasiam ma hubani bapa pasal haganup hasangaponku i tanoh Masir on, ampa haganup na niidah nasiam, dob ai papodas nasiam ma tuad hujon rap pakon bapa.”

¹⁴Dob ai irohop ma borgok ni si Benjamin anggini ai, janah tangis; si Benjamin pe sai tangis do manrohop borgokni.

¹⁵Isummahi si Josep ma ganup abangni ai anjaha inunut tangis; dob ai pe ase marsahap-sahap saninani ai pakonsi.

¹⁶Dob tarbogei barita ai hu rumah ni Parao, paboa na dob roh sanina ni si Josep ai, jadi malas ma uhur ni Parao pakon juakjuakni pasal ai.

¹⁷Jadi nini Parao ma dompak si Josep, “Hatahon ma hubani saninamu, ʻSonon ma bahen, muati ma ganup pinahanmu anjaha laho ma hu tanoh Kanaan,

¹⁸alop hanima ma bapanima pakon rumah tangganima, boban hanima ma hu bangku, ase hubere bannima bagian sidearan i tanoh Masir, ase ipangan hanima gogoh ni tanoh on.ʼ

¹⁹Hatahon ope hubani sidea, ʻSonon bahen, boan hanima ma gareta hun tanoh Masir hundulan ni anak pakon parinangonnima anjaha boan hanima ma pakon bapanima roh hujon.

²⁰Anjaha ulang ma pusok uhurnima mangidah ugas-ugasnima, ai hanima do simada atap aha sidearan in sab tanoh Masir on.ʼ ”

²¹Jadi ibahen anak ni si Israel ma sonai. Ibere si Josep ma hubani sidea gareta songon na hinatahon ni Parao, ibere ma pakon bohal bani sidea i dalan.

²²Ibere ma hubani ganup sidea sapasang pakean pesta, tapi hubani si Benjamin tolu ratus rupiah pakon lima pasang pakean pesta do iberehon.

²³Ambah ni ai itongos ma hubani bapani sapuluh halode tunggal, na mamboan barang sidearan na adong i Masir, pakon sapuluh halode boru-boru na mamboan gandum ruti pakon sipanganon hubani bapani ai i tongah dalan.

²⁴Dob ai ipabingkat ma saninani ai, anjaha sanggah na laho ai sidea, nini ma dompak sidea, “Ulang ma maringori nasiam i tongah dalan.”

²⁵Jadi tangkog ma sidea hun tanoh Masir, das ma sidea hu tanoh Kanaan, hubani si Jakob bapa ni sidea ai.

²⁶Ibaritahon sidea ma hu bani, nini ma, “Manggoluh ope si Josep, anjaha ia do na manggomgomi ganup tanoh Masir.” Tapi labuh do hata ai bani uhur ni si Jakob, ai lang ihaporsayai sidea.

²⁷Tapi dob ihatahon sidea hubani haganup hata ni si Josep, na tinonahkonni ai hubani sidea, anjaha iidah pakon gareta, na tinongos ni si Josep laho mambobansi, gabe malas ma tonduy ni si Jakob, bapa ni sidea ai.

²⁸Jadi nini si Israel ma, “Dear ma ai, manggoluh ope hape si Josep anakkai! Misir ma ahu ase huidah ia, paima matei ahu.”