Read Batak Simalungun 1 MUSA 46 Bible Online

1 MUSA 46 - Batak Simalungun bible

1 MUSA 46

¹Ase misir ma si Israel pakon ganup na adong bani. Das ma ia hu Berseba, jadi igalangkon ma galangan hubani Naibata ni bapani, si Isak.

²Dob ai ihatahon Naibata ma hubani si Israel marhitei panonggoran sanggah borngin, nini ma, “Jakob, Jakob! Ijon do ahu, nini mambalosi.”

³Dob ai nini ma, “Ahu do Naibata, Naibata ni bapamu;” ulang ma ho mabiar tuad hu tanoh Masir, ai gabe bangsa na bolon do ho tumpakonku ijai.

⁴Huhasomani pe ho tuad hu tanoh Masir, anjaha arahkonon-Ku do ho tangkog magira; anjaha si Josep do na manutup matamu holi.

⁵Dob ai misir ma si Jakob hun Berseba; anjaha anak ni si Israel do mamboban si Jakob, bapa ni sidea ai, ampa anak ni sidea ronsi parinangon ni sidea, ibagas gareta, na tinongos ni Parao mangalop sidea.

⁶Iboban sidea ma homa pinahan ronsi ugas-ugas ni sidea, na sinari ni sidea i tanoh Kanaan, jadi das ma sidea hu tanoh Masir, si Jakob ampa ganup ginomparni ai.

⁷Anak pakon pahompuni dalahi ampa boru pakon pahompuni naboru, haganup ginomparni iboban hu tanoh Masir.

⁸On ma goran ni anak ni si Israel na das hu tanoh Masir, ai ma si Jakob pakon anakni ai. Bunga tubuh ni si Jakob ai ma si Ruben.

⁹Anak ni si Ruben ai ma si Henok, si Palu, si Hesron pakon si Karmi.

¹⁰Anak ni si Simeon ai ma si Jemuel, si Jamin, si Ohad, si Jakin, si Zohar pakon si Saul, anak ni boru Kanaan ai.

¹¹Anak ni si Levi ai ma si Gersom, si Kehat pakon si Merari.

¹²Anak ni si Juda ai ma si Er, si Onan, si Sela, si Peres pakon si Zerah; tapi si Er pakon si Onan domma matei i tanoh Kanaan. Anak ni si Peres ai ma si Hesron pakon si Hamul.

¹³Anak ni si Isasar ai ma si Tola, si Pua, si Job pakon si Simron.

¹⁴Anak ni si Sebulon ai ma si Sered, si Elon, pakon si Jahleel.

¹⁵Ai ma anak ni si Lea, na tinubuhkon bani si Jakob i Padang Aram, ampa si Dina, boruni ai. Ganup sidea, anakni pakon boruni, tolu puluh tolu halak do.

¹⁶Anak ni si Gad ai ma si Zifion, si Haggi, si Suni, si Esbon, si Eri, si Arodi pakon si Areli.

¹⁷Anak ni si Asser ai ma si Jimna, si Jiswa, si Jiswi pakon si Beria, ampa si Sera, botou ni sidea; anjaha anak ni si Beria ai ma si Heber pakon si Malkiel.

¹⁸Ai ma anak ni si Zilpa, na binere ni si Laban hubani si Lea, boruni ai; na sapuluh onom halak ai do na tinubuhkonni hubani si Jakob.

¹⁹Anak ni si Rahel, parinangon ni si Jakob, ai ma si Josep pakon si Benjamin.

²⁰Tubuh do bani si Josep i tanoh Masir si Manase pakon si Efraim, na tubuh bani humbani si Asnat, boru ni si Potifera, malim i huta On.

²¹Anak ni si Benjamin ai ma si Bela, si Beker, si Asbel, si Gera, si Naaman, si Ehi, si Ros, si Mupim, si Hupim pakon si Ared.

²²Ai ma ginompar ni si Rahel, na tinubuhkonni bani si Jakob, sapuluh ompat halak ganupan.

²³Anak ni si Dan ai ma si Husim.

²⁴Anak ni si Naftali ai ma si Jahzeel, si Guni, si Jezer pakon si Syilem.

²⁵Ai ma ginompar ni si Bilha, na binere ni si Laban hubani si Rahel, boruni ai, anjaha pitu halak do ganup na tinubuhkonni bani si Jakob.

²⁶Haganup halak na das hu tanoh Masir rap pakon si Jakob, ai ma ginomparni sandiri, seng ipadihut parinangon ni anakni, haganup onom puluh onom halak.

²⁷Anak ni si Josep na tubuh bani i tanoh Masir dua halak do. Ase pitu puluh halak ma tumpu ginompar ni si Jakob na das i tanoh Masir.

²⁸Dob ai isuruh si Jakob ma si Juda parlobei marayak si Josep, ase roh si Josep hu Gosen manjumpahkon bapani. Jadi das ma sidea hu tanoh Gosen.

²⁹Jadi ipasang si Josep ma garetani, laho ma ia hu Gosen manjumpahkon si Israel, bapani ai. Dob iidah ia, mintor idahop ma borgok ni bapani ai, anjaha inunut tangis.

³⁰Nini si Israel ma dompak si Josep: Age matei ahu sonari, ai domma huidah bohimu, domma hubotoh manggoluh ope ho hape.

³¹Nini si Josep ma dompak saninani pakon dompak isi ni rumah ni bapani: Tangkog ma ahu patugahkon hubani Parao, hatahononku ma hu bani: Domma roh saninangku pakon isi ni rumah ni bapangku, na i tanoh Kanaan hinan, marayak ahu.

³²Halak parmahan biribiri do sidea, ai parpinahanon do hagoluhan ni sidea; iboan sidea do biribiri, lombu ronsi ganup na adong bani sidea.

³³On pe, anggo ipio Parao nasiam anjaha isungkun: Aha do parhorjaan nasiam?

³⁴Balosi nasiam ma: Halak parpinahan do jabolonmu on humbani sietek-etekonnami nari ronsi nuan, sonai hanami age ompungnami, ase andohar boi nasiam marianan i tanoh Gosen, halani magigi do halak Masir mangidah halak siparmahan biribiri.