Read Batak Simalungun 1 MUSA 48 Bible Online

1 MUSA 48 - Batak Simalungun bible

1 MUSA 48

¹Dob salpu na masa on, adong ma na patugahkon hubani si Josep, “Boritan do bapanta!” Jadi iarahkon ma anakni na dua ai, si Manase pakon si Efraim.

²Adong ma na patugahkon hubani si Jakob, “Roh do anakmu si Josep bamu,” gabe iparpala-palai ma hundul i podomanni.

³Nini si Jakob ma dompak si Josep, “Domma ipatalar Naibata Pargogoh na so tarimbang in diri-Ni hu bangku i huta Lus, i tanoh Kanaan, anjaha ipasu-pasu do ahu.

⁴Nini do hu bangku, ʻTonggor ma, Hutumpak pe ho marginompar anjaha Hupabuei pe ho, Hubahen pe ho gabe hulanan ni bangsa-bangsa anjaha Hubere pe tanoh on hubani ginomparmu gabe rupei ni sidea sadokah ni dokahni.ʼ

⁵On pe, haduasi anakmin, na tubuh bam i tanoh Masir, sanggah lape roh ahu marayak ho hu tanoh Masir on, ahu do simadasi; ahu do simada si Efraim pakon si Manase usih songon si Ruben pakon si Simeon.

⁶Tapi ginompar na dob tubuh bam dob sidea, ho ma simadasi; goran ni abang ni sidea in ma panggoranonkon ni sidea bani parbagianan ni sidea.

⁷Ai sanggah na roh ahu hun Padang Aram, matei do si Rahel i tanoh Kanaan, i tongah dalan dohorhon huta Eprata, lanjar ijai do ia hutanom, bani dalan laho hu Eprata, ai ma Betlehem.”

⁸Sanggah iidah si Israel anak ni si Josep ai, nini ma, “Ise do on?”

⁹Nini si Josep ma dompak bapani ai, “Pahompumu do sidea, na binere ni Naibata hu bangku ijon.” Dob ai nini ma, “Togu ma sidea hu lambungkon, ase hupasu-pasu sidea.”

¹⁰Ia mata ni si Israel domma rambon halani tuani, lang be torang ia marpangidah. Jadi ipadohor si Josep ma sidea hubani bapani, gabe isummah ma sidea anjaha idahop.

¹¹Nini si Israel ma dompak si Josep, “Domma huidah bohimu, lang pangarapan ni uhurhu, anjaha tonggor ma, dihut do ginomparmu ipataridahkon Naibata hu bangku.”

¹²Dob ai itogu si Josep ma sidea hun abinganni, jadi manrogop ma ia hu tanoh i lobeini.

¹³Dob ai ijolom si Josep ma sidea haduasi, si Efraim i siamunni tontang sambilou ni si Israel, anjaha si Manase i sambilouni, tontang siamun ni si Israel, jadi ipadohor ma sidea hu bani.

¹⁴Tapi ipagostong si Israel ma tangan siamunni anjaha inahkon bani ulu ni si Efraim, age pe ia sianggian, anjaha sambilouni bani ulu ni si Manase, ase marsilang do tanganni, age pe si Manase sikahanan.

¹⁵Dob ai ipasu-pasu si Israel ma si Josep, nini ma, “Naibata, na hinabiaran ni ompung, si Abraham pakon si Isak, Naibata na marmahan ahu sadokah ahu adong ronsi nuan,

¹⁶Malekat na paluah ahu humbani sagala parmaraan, Ia ma na mamasu-masu dakdanak na dua on; sai tarambilan ma goranku ampa goran ni ompung si Abraham pakon si Isak marhitei sidea; sai manggargar anjaha lambin bueini ma sidea i tanoh on.”

¹⁷Tapi dob iidah si Josep, na tinampeihon ni bapani ai tangan siamunni ai hubani ulu ni si Efraim, sogam ma uhurni mangidahsi, gabe ijolom ma tangan ni bapani ai paosorhon humbani ulu ni si Efraim hubani ulu ni si Manase.

¹⁸Nini si Josep ma dompak bapani, “Lang sonin bapa, ai on do sikahanan, tampeihon ham ma tanganmu siamun hubani uluni.”

¹⁹Tapi manjua do bapani ai, nini ma, “Hubotoh do, anakku, hubotoh do; ia pe gabe sada bangsa do, anjaha banggal do age ia; age pe sonai, sai na banggalan do anggini magira ase ia, anjaha ginomparni gabe hulanan ni bangsa-bangsa.”

²⁰Jadi ipasu-pasu ma sidea bani na sadari ai, nini ma, “Ibagas gorannima do mamasu-masu halak Israel, marhitei na mangkatahon: Ibahen Naibata ma ho songon si Efraim pakon si Manase! Ase parlobei ma si Efraim ipasu-pasu humbani si Manase.”

²¹Dob ai nini si Israel ma dompak si Josep, “Tonggor ma, na laho matei mando ahu, tapi Naibata do mangkasomani hanima, anjaha bobahonon-Ni do hanima mulak hu tanoh ni ompungnima.

²²Anjaha domma hubere sada raboyon, hasurunganmu humbani saninamu, na hubuat humbani halak Amori marhitei podang pakon panahku.”