Read Batak Simalungun 1 MUSA 49 Bible Online

1 MUSA 49 - Batak Simalungun bible

1 MUSA 49

¹Dob ai idilo si Jakob ma anakni ai, nini ma, “Martumpu ma hanima, ase hupatugah bennima aha na masa bennima magira.

²Martumpu ma hanima anjaha tangar ma, alo anak ni si Jakob! Tangar hanima ma si Israel, bapanima.

³Alo Ruben, ho do bunga tubuhku, gogohku pakon parmulaan ni kuasangku, sisurungan bani hamuliaon sisurungan bani hagogohon,

⁴anjaha na marjullak-jullak songon bah; seng be ho sisurungan, ai inaiki ho do podoman ni bapamu; ibutaki ho do ai, ipanangkih ho do podomanku.

⁵Na martinodohon do si Simeon pakon si Levi; sinjata hakorason do podang ni sidea.

⁶Sai ulang ma saor tonduyhu bani parriahan ni sidea, sai ulang ma marsada uhurhu pakon partumpuan ni sidea; ai ibagas ringis ni sidea ibunuhi do halak, anjaha ibagas hajungkaton ni sidea itagili do lombu.

⁷Bursik ma ringis ni sidea, ai parah do ai, ampa gila ni sidea, ai bajan do ai. Bagi-bagihononku do sidea itongah-tongah ni ginompar ni si Jakob, anjaha eraponku do sidea itongah-tongah ni Israel.

⁸Alo Juda, sipujion ni saninamu do ho; odoh bani tangkuhuk ni munsuhmu do magira tanganmu; marsombah hu bam do anak ni bapamu.

⁹Anak ni singa do Juda; domma manaek ho, anakku, marhitei panorohon. Manggompang, modom-modom do ia songon singa tunggal, songon singa boru-boru; ise ma na pag mamuhoisi?

¹⁰Seng na meret tungkot harajaon humbani si Juda, barang tampuk ni pamarentahan hun holangkolang ni naheini, paima roh si Silo, anjaha Ia do siirikkonon ni sagala bangsa.

¹¹Tambatonni ma halodeni hu bona ni hayu anggur pakon anak ni halodeni boru-boru hubona ni hayu anggur na pinilih; taptaponni ma hiouni bani anggur anjaha bajuni bani gotah ni hayu anggur.

¹²Gerger ma matani halani anggur, saksak ma iponni halani dadih.

¹³Marianan i topi ni laut do si Sebulon, i labuhan ni kapal, sabalog pakon Sidon.

¹⁴Halode simapir holi-holi do si Isasar, na manggompang i holangkolang ni harang;

¹⁵anggo iidah jenges do parsaranan ai anjaha lambut do tanoh ai, ipaunduk ma abarani laho mamorsan, gabe halak parrodi ma ia.

¹⁶Uhumon ni si Dan do bangsani songon sada marga ni Israel.

¹⁷Songon ulog i biding ni dalan na bolon do si Dan magira, sada ulog darih i biding ni dalan, na mamagut tambirik ni huda, gabe madabuh hu pudi na mangajaksi.

¹⁸Hatuahonmu in do na huhasiholhon ale Jahowa!

¹⁹Sosakon ni sipanosak do si Gad, tapi sosakonni do sidea use.

²⁰Mantin do sipanganon ni si Asser; ia do siidangkon sipanganon hasoloan ni raja.

²¹Ursa boru-boru na maluah do si Naftali, siluarhon hata na jenges-jenges.

²²Hayu na marbuah na poso do si Josep, hayu na marbuah na poso bani bah tubuh; dangkahni manlangkahi dingding.

²³Ipasoru-soru parsior do ia, itembak anjaha iparburu-buru,

²⁴tapi totap do siorni, anjaha gogoh do botohon ni tanganni, marhitei tangan ni puanglima ni si Jakob, marhitei goran ni Siparmahan, Batu gingging ni si Israel.

²⁵Marhitei Naibata ni bapamu, na mangurupi ho, marhitei Naibata pargogoh na so tarimbang, na mamasu-masuhon bam pasu-pasu na hun langit na i atas, pasu-pasu na hun luhung na i toruh, pasu-pasu na hun bagod panusuan ampa parnaibataan.

²⁶Surungan do pasu-pasu ni bapamu humbani pasu-pasu ni dolog na sadokah ni dokahni, humbani buntu-buntu na sadokah ni dokahni; sai sogop ma in hu ulu ni si Josep, hu sitabolan ni na tarpilih i tongah-tongah ni saninani.

²⁷Gipul sipanoroh do si Benjamin, na mangankon sorohan sogod, anjaha na marbagi taban-taban bodari.

²⁸Ai ma haganup marga ni Israel na sapuluh dua in; anjaha ai ma na ipatugah bapa ni sidea hubani sidea laho mamasu-masu sidea; ipasu-pasu ma sidea marhitei pasu-pasu na romban hubani ganup sidea.

²⁹Dob ai martonah ma ia nini ma dompak sidea: Sipatumpuon hubani bangsangku do ahu; tanom hanima ma ahu i lambung ni ompungku, i liang na i juma ni si Epron, marga Het ai,

³⁰i liang na i juma Makpela, tontang ni Mamre, na i tanoh Kanaan, na binoli ni si Abraham rap pakon juma humbani si Epron marga Het ai, gabe tanoman parsandirian.

³¹Hujai do itanom si Abraham pakon si Sarah, parinangonni ai; hujai do itanom sidea si Isak pakon si Rebekka, parinangonni ai, anjaha ijai do hutanom si Lea.

³²Juma ai pakon liang na ibagas ai, na binoli do ai humbani halak Het.

³³Jadi dob salpu si Jakob na martonah ai hubani anakni ai, itarik ma naheini hu atas podomanni; rotap ma hosahni, jadi ipatumpu ma ia hubani hasomanni sabangsa.