Read Batak Simalungun 1 MUSA 7 Bible Online

1 MUSA 7 - Batak Simalungun bible

1 MUSA 7

¹Dob ai nini Jahowa ma hubani si Noak, “Masuk ma ho hubagas parau in pakon ganup sinrumahmu, ai ho do Huidah na bonar i lobeihu humbani halak na sansundut on.

²Humbani pinahan na panti panganon buat ma bam pitu parangguan, tunggal pakon boru-boruni, tapi saparangguan ma humbani pinahan na so panti panganon, tunggal pakon boru-boruni;

³sonai homa humbani manuk-manuk na i awang-awang pitu parangguan, tunggal pakon boru-boru, laho pagoluhkon bonihni bani sab tanoh on.

⁴Halani pitu ari nari parohon-Ku ma udan hu atas tanoh on ompat puluh ari ompat puluh borngin dokahni, anjaha ripaskonon-Ku ma sagala na dong na hutompa in, hun tanoh on.”

⁵Jadi ibahen si Noak ma ganup, songon na hinatahon ni Jahowa hu bani.

⁶Onom ratus tahun ma umur ni si Noak, sanggah na roh ai bah na sumbang hu atas tanoh on.

⁷Masuk ma si Noak hu parau ai rap pakon anakni, parinangonni ampa parinangon ni anakni ai, halani bah na sumbang ai.

⁸Humbani pinahan na panti panganon pakon humbani pinahan na so panti panganon, humbani manuk-manuk pakon humbani haganup na manjulur i atas tanoh on,

⁹roh mar sasaparangguan hubani si Noak hubagas parau ai, tunggal pakon boru-boru, songon na hinatahon ni Naibata hubani si Noak.

¹⁰Dob salpu na pitu ari ai, roh ma bah na sumbang hu atas tanoh on.

¹¹Bani paonomratus-tahunkon goluh ni si Noak, bani bulan dua ari sapuluh pitu, bani na sadari ai ma pultak bah ni luhung bolon anjaha mungkab ma ganup labah ni bah na i langit.

¹²Jadi manalosou ma roh udan hu tanoh on ompat puluh ari ompat puluh borngin dokahni.

¹³Bani na sadari ai ma masuk si Noak hubagas parau ai rap pakon anakni si Sem, si Ham, si Japet, pakon parinangonni ampa parinangon ni anakni na tolu halak ai,

¹⁴sidea pakon sagala binatang marsiboan masamni, pakon sagala pinahan marsiboan masamni, pakon sagala binatang na manjulur i atas tanoh on, marsiboan masamni, ampa sagala manuk-manuk marsiboan masamni, sagala manuk-manuk na marambulu pakon na marhabong;

¹⁵roh ma sidea sagala na manggoluh ampa na marhosah, marparangguan-parangguan hubani si Noak hubagas parau ai.

¹⁶Ia na masuk ai, ai ma tunggal pakon boru-boru humbani sagala na manggoluh, songon na hinatahon ni Naibata hubani; dob ai itutup Jahowa ma irik i pudini.

¹⁷Ompat puluh ari do dokahni roh bah na sumbang ai hu tanoh on; naik ma bah ai, iangkat ma parau ai, daoh hu babou ni tanoh on.

¹⁸Dob lambin martambah-tambah bah ai, anjaha lambin sumbang tumang i atas tanoh on, jadi mumbang-umbang ma parau ai i atas ni bah ai.

¹⁹Lambin manraja tumang ma bah ai i atas tanoh on, gabe irongkob ma sagala dolog na gijang na i toruh ni langit.

²⁰Sapuluh lima asta manraja bah ai hu atas, gabe tarrongkob ma sagala dolog-dolog.

²¹Jadi rotap ma hosah ni sagala na mardaging, na manggoluh i atas tanoh on, manuk-manuk, pinahan-pinahan, binatang-binatang pakon sagala binatang na manjulur, na manjuluri i atas tanoh on, ampa jolma haganupan.

²²Matei ma haganup na marhosah hagoluhan ibagas igungni, haganup na adong bani tanoh na mahorah.

²³Jadi sasap ma haganup na adong i atas tanoh on, jolma sonai homa pinahan, binatang na manjulur ampa manuk-manuk na i awang-awang, haganupan ai sasap do hun tanoh on. Pitah si Noak mando na tading manggoluh ampa haganup na rap pakonsi ibagas parau ai.

²⁴Saratus lima puluh ari do dokah ni bah ai manrajai tanoh on.