Read Batak Simalungun 1 MUSA 8 Bible Online

1 MUSA 8 - Batak Simalungun bible

1 MUSA 8

¹Dob ai idingat Naibata ma si Noak pakon haganup binatang ampa haganup pinahan, na rap pakonsi ibagas parau ai. Ipabontaskon Naibata ma logou hu tanoh ai, ase surut bah ai.

²Tartutup ma bah tubuh ni luhung bolon ai ampa labah ni bah na i langit. Mangadi ma udan manalosou na hun langit,

³gabe lambin surut ma bah ai hun tanoh on; sonai ma parsurut ni bah ai, dob salpu saratus lima puluh ari.

⁴Bani bulan pitu, ari sapuluh pitu, sangkot ma parau ai i atas pakpak ni Dolog Ararat.

⁵Lambin surut ma bah ai das bani bulan sapuluh; bani bulan sapuluh, ari sada taridah ma pakpak ni dolog-dolog.

⁶Dob salpu ompat puluh ari, iungkab si Noak ma jandela ni parau na pinaulini ai.

⁷Ipaluah si Noak ma sada kawak; jadi habang ma ai hujai-hujon, paima horah bah ai hun tanoh on.

⁸Dob ai ipaluah ma sada asas, laho mangidah atap na dob surut do bah ai hun tanoh on.

⁹Tapi seng jumpah asas ai tangkolan ni naheini, jadi mulak ma ia hubani si Noak hubagas parau ai, ai bah ope i atas ni ganup sisik ni tanoh on. Ipadurdur si Noak ma tanganni, itangkap ma asas ai, itarik ma hubagas parau ai.

¹⁰Ipaima ma pitu ari nari, dob ai ipaluah ma use asas ai hun parau ai.

¹¹Malele bod ari mulak ma asas ai hubani si Noak, anjaha tonggor ma, adong do sada bulung ni hayu jetun na ratah bani pagutni. Ibotoh si Noak ma na dob surut bah ai hun tanoh on.

¹²Ipaima ma use pitu ari nari, dob ai ipaluah ma asas ai; tapi seng mulak be ai hu bani.

¹³Paonomratussada-tahunkon, bani ari sada bulan sada, domma horah bah ai hun tanoh on. Iungkab si Noak ma tayub ni parau ai, gabe iidah ma na dob horah sisik ni tanoh on.

¹⁴Bani ari dua puluh pitu bulan dua, horah ma tanoh ai.

¹⁵Dob ai nini Naibata ma bani si Noak,

¹⁶“Luar ma ho hun parau in, ho pakon parinangonmu, anakmu pakon parinangon ni anakmu na rap pakon ho.

¹⁷Sagala binatang na rap pakon ho, sagala na manggoluh: manuk-manuk, pinahan pakon sagala binatang na manjulur, na manjulur i atas tanoh in, suruh ma kaluar rap pakon ho, ase gumayom sidea i atas tanoh in, manggargar anjaha martambah-tambah i atas tanoh in.”

¹⁸Jadi luar ma si Noak rap pakon anakni, parinangonni ampa parinangon ni anakni ai.

¹⁹Sagala binatang liar, sagala na manjulur, sagala manuk-manuk ampa sagala na manggulmit i atas tanoh in, marsiboan masamni, luar ma homa hun parau ai.

²⁰Dob ai ipauli si Noak ma sada anjapanjap bani Jahowa; ibuat ma humbani ganup pinahan na panti pakon humbani ganup manuk-manuk na panti, jadi igalangkon ma galangan situtungon i atas anjapanjap ai.

²¹Dob ianggoh Naibata uap na misbou ai, nini ma ibagas uhur-Ni, “Lang be papaan-Ku tanoh in halani jolma, ai na jahat do pingkiran ni uhur ni jolma in humbani sietek-etekonni; anjaha seng be ripaskonon-Ku sagala na manggoluh, songon na dob Hubahen in.

²²Sadokah adong tanoh on, seng anjai maronti tidahon pakon pariama, ari borgoh pakon ari milas, logou ni ari pakon musim udan, arian pakon borngin.”