Read Batak Simalungun 1 MUSA 9 Bible Online

1 MUSA 9 - Batak Simalungun bible

1 MUSA 9

¹Jadi ipasu-pasu Naibata ma si Noak pakon anakni ai, nini ma bani sidea, “Gargar anjaha lambin mabuei ma hanima, goki hanima ma tanoh on.

²Mabiar anjaha bajoraon ma mangidah hanima sagala binatang na i tanoh on sagala manuk-manuk na i awang-awang, sagala na manjulur i atas tanoh on, ampa dengke na ibagas laut; ondos bani tangannima ma ganupan in.

³Sagala na manggulmit anjaha na manggoluh, bahen sipanganonnima ma in. Ganupan in Hubere bannima sonai homa suan-suanan simaratah.

⁴Tapi gulei, na ibagas ope hosahni, ai ma darohni, ulang pangan hanima.

⁵Anjaha tongon do, sai tungguon-Ku do darohnima, ai ma hosahnima; sai tungguon-Ku do in humbani sagala binatang pakon humbani jolma; humbani dalahi, saninani ai tungguon-Ku hosah ni jolma in.

⁶Barang ise na manduruskon daroh ni jolma, duruskonon ni jolma ma darohni, ai usih bani rupani do jolma in itompa Naibata.

⁷Ia hanima, sai gargar lambin bueini ampa roh raratni ma i atas tanoh on, sai lambin gargar ma hanima ijin.”

⁸Dob ai marsahap ma Naibata hubani si Noak pakon hubani anakni na rap pakonsi ai, nini ma,

⁹“Tonggor ma, pajongjongon-Ku ma padan-Ku pakon hanima ampa ginomparnima i pudinima.

¹⁰Pakon sagala na tinompa na manggoluh na rap pakon hanima: manuk-manuk, pinahan pakon binatang liar na i tanoh on, na rap pakon hanima, sagala na luar hun parau in, sagala binatang na i tanoh on.

¹¹Pajongjongon-Ku ma padan-Ku pakon hanima, paboa lang be ripaskonon ni bah na sumbang sagala na mardaging, anjaha lang be masa bah na sumbang mansedahon tanoh on.”

¹²Nini Naibata ma, “On ma tanda ni padan na Hubahen in bannima pakon hubani sagala na tinompa na manggoluh, na rap pakon hanima marsundut-sundut, sadokah ni dokahni.

¹³Halibitongan-Kai, na Hubahen bani hombun ai, ai ma tanda ni padan-Ku pakon tanoh on.

¹⁴Anggo Huparoh hombun hu atas tanoh on, anjaha taridah halibitongan ai bani hombun,

¹⁵jadi ingaton-Ku ma padan-Ku na hubahen bannima, pakon Hubani sagala na tinompa na manggoluh, sagala na marhosah, anjaha seng be mangulaki sumbang bah in laho manripaskon sagala na manggoluh.

¹⁶Anggo dong halibitongan ai bani hombun, kawahkonon-Ku ma ai, anjaha ingaton-Ku ma padan sisadokah ni dokahni na binahen ni Naibata hubani sagala na tinompa na manggoluh, sagala na marhosah, na i atas tanoh on.”

¹⁷Nini Naibata ma hubani si Noak, “On ma tanda ni padan na Hubahen ai hubani sagala na manggoluh i tanoh on.”

¹⁸Ia anak ni si Noak na luar hun parau ai, ai ma: Si Sem, si Ham pakon si Japet. Si Ham ai ma bapa ni si Kanaan.

¹⁹Na tolu on do anak ni si Noak, anjaha humbani sidea do rarat jolma hu sab tanoh on.

²⁰Ipungkah si Noak ma marjuma-juma, itombei ma sada pohon anggur;

²¹iinum ma humbani anggur ai, gabe mabuk ma ia, anjaha tibal lang marhiou ibagas lampolamponi.

²²Iidah si Ham, bapa ni si Kanaan ma bapani na talanjang ai, jadi ipatugah ma bani saninani sidua halak ai, na i darat ai.

²³Dob ai ibuat si Sem pakon si Japet ma hiou, itampeihon ma ai bani abara ni sidea; jadi mardalan tundal ma sidea, laho manrungkub hatalanjangon ni bapani sidea, bohi ni sidea pe tundal do, ase ulang iidah sidea hatalanjangon ni bapa ni sidea ai.

²⁴Dob tarjolma si Noak humbani parmabukonni ai, anjaha ibotoh na binahen ni anakni sianggian ai bani,

²⁵nini ma, “Hona papa ma si Kanaan, jabolon ni jabolon ma ia bani abangni.”

²⁶Ambah ni ai nini ma, “Napuji ma Jahowa, Naibata ni si Sem, jabolonni ma anggo si Kanaan.”

²⁷Ipabolag Naibata ma ianan bani si Japet, marianan ma ia ibagas lampolampo ni si Sem; jabolonni ma anggo si Kanaan.

²⁸Manggoluh ope si Noak tolu ratus lima puluh tahun nari ipudi ni bah na sumbang ai.

²⁹Siah ratus lima puluh tahun ma ganup umur ni si Noak; dob ai matei ma ia.