Read Batak Simalungun 2 SAMUEL 1 Bible Online

2 SAMUEL 1 - Batak Simalungun bible

2 SAMUEL 1

¹Jadi dob matei si Saul, anjaha si Daud pe domma mulak hun bani na mantaluhon halak Amalek, anjaha dua ari ma ia i Ziklag,

²jadi bani ari patoluhon, tonggor ma, roh ma sada halak hun bani parsaranan ni si Saul, marigat hiouni anjaha tanoh i atas ni uluni. Daskonsi ia hu bani si Daud, manrogop ma ia anjaha marsombah.

³Nini si Daud ma hu bani, “Na roh hunja do ho?” Nini ma hu bani, “Na maporus do ahu hun parsaranan ni halak Israel.”

⁴Dob ai nini si Daud ma hu bani, “Aha do na masa? Patugah ma bangku.” Nini halak ai ma, “Domma maporus bangsa ai hun parporangan, buei do hun bani bangsa ai na matei, anjaha si Saul pakon anakni si Jonatan domma matei.”

⁵Nini si Daud ma hu bani anak parana, na mamboan barita ai hu bani, “Sonaha pambotohmu, na dob matei si Saul pakon anakni si Jonatan?”

⁶Jadi nini anak garama, siboan barita ai ma hu bani, “Tudu ahu i Dolog Gilboa; mangunsandei do si Saul bani tanjani, anjaha manrohan gareta porang pakon siparhuda mangasaksi. [1]

⁷Marhusor ma ia, iidah ma ahu, dob ai idilo ma ahu. Ningku ma mambalosi, ʻIjon do ahu!ʼ

⁸Nini ma hu bangku, ʻAi ise do ho?ʼ Ningku ma bani, ʻHalak Amalek do ahu.ʼ

⁹Dob ai nini ma hu bangku, ʻRoh ma ho hujon, tobak ma ahu, ai domma margonggong namin huahap, tapi ibagas ope hosahku.ʼ

¹⁰Jadi hupadohor ma hu bani, anjaha hubunuh ma ia, halani tangkas do hubotoh, seng anjai manggoluh be ia anggo domma pala runggang; dob ai hubuat ma sortali na i uluni ai pakon golang-golang na bani tanganni, anjaha huboan do ai nuan bani tuannami.”

¹¹Dob ai ijolom si Daud ma bajuni, lanjar irigati ma ai; sonai do homa ibahen halak na rap pakonsi ai. [2]

¹²Dob ai tangis-tangis ma sidea, anjaha marpuasa ronsi bodari, halani si Saul pakon si Jonatan, anakni ai, pakon halani bangsa ni Jahowa ampa halak Israel na radag ibahen podang. [3]

¹³Dob ai nini si Daud ma hu bani anak parana na mamboan barita ai bani, “Hunja do ho?” Nini ma mambalosi, “Anak ni sada halak panginsolat do ahu, halak Amalek.”

¹⁴Nini si Daud ma hu bani, “Mase ma lang mabiar ho mardas tangan hu bani na mininakan ni Jahowa?” [4]

¹⁵Dob ai idilo si Daud ma sada hun bani anak garama, nini ma, “Roh ma ho, bunuh ma ia!” Jadi ibunuh ma ia. [5]

¹⁶Tapi nini si Daud do hu bani, “Marsapata hubam ma darohmu; pamanganmu do gabe saksi dompak ho, ai nim do, ʻAhu do mamunuh na mininakan ni Jahowa.ʼ ” [6]

¹⁷Dob ai itangiskon si Daud ma tangis-tangis on pasal si Saul pakon si Jonatan, anakni ai,

¹⁸anjaha ihatahon maningon ajarhononkon do ai hu bani halak Juda; tonggor ma, tarsurat do ai ibagas buku ni halak na bonar. [7]

¹⁹Domma matei tarpantom hamuliaonmu, o Israel, tarpantom i atas buntu-buntu. Sonaha do parmatei ni halak na borani ai?

²⁰Ulang patugah in i Gat, ulang mungmungkon in bani dalan-dalan i Askalon, ase ulang marmegah-megah boru ni halak Palistim, ase ulang marsurak-surak boru ni halak na so marsunat ai. [8]

²¹Nasiam Dolog-dolog Gilboa! Ulang be namin turun namur barang udan bani nasiam, nasiam juma panggalangan. Ai ijin do mambuk gantar ni puanglima, gantar ni si Saul, sinjata ni halak na mininakan. [9]

²²Na so ongga mulak do namin panah ni si Jonatan hun bani daroh ni halak na timbul, hun bani taboh-taboh ni puanglima, anjaha podang ni Saul pe namin seng mulak, anggo lang dapotan.

²³Ham Saul ampa Jonatan, na hinaholongan anjaha haudungan ni uhur! Sanggah manggoluh barang matei seng marsirang sidea; dorasan do sidea hun bani manuk-manuk nanggordaha, anjaha gogohan do sidea hun bani singa.

²⁴Nasiam boru Israel tangisi nasiam ma si Saul, na mangkioui nasiam jenges bani sitora sigerger, na mambahen pakeian nasiam marjagar-jagar hun bani omas.

²⁵Sonaha do parmatei ni puanglima i tongah-tongah ni parporangan! Si Jonatan matei tarpantom i atas buntu-buntu.

²⁶Pusok do uhurhu halani ham, o Jonatan saninangku, holong tumang do ham bangku. Tobunan do holong ni uhurmu bangku hun bani holong ni naboru.

²⁷Sonaha do parmatei ni puanglima pakon parmasab ni sinjata porang!