Read Batak Simalungun 2 SAMUEL 13 Bible Online

2 SAMUEL 13 - Batak Simalungun bible

2 SAMUEL 13

¹Ia si Absalom anak ni si Daud ai, adong do sada botouni na jenges, na margoran si Tamar. Rosuh do uhur ni si Amnon, anak ni si Daud ai mangidahsi. [148]

²Halani oji ni uhurni hu bani botouni si Tamar ai, gabe boritan ma ia, ai anak boru ope ia, anjaha lang tarbahen iahap si Amnon mandohorisi.

³Tapi adong ma sada huan-huan ni si Amnon, na margoran si Jonadab, anak ni si Simea, abang ni si Daud; halak na pentar tumang do si Jonadab ai. [149]

⁴Dob ai nini ma hu bani, “Mahua ham, ase lambin tambah ari lambin merungni ham, alo anak ni rajanami! Ai lang tarpatugah ham do aha halani hu bangku?” Nini si Amnon ma hu bani, “Holong do uhurhu bani si Tamar, botou ni si Absalom ai.”

⁵Jadi nini si Jonadab ma hu bani, “Modom ma ham hu podomanmu, anjaha pakulah ham ma boritan. Anggo roh bapanta manorih ham, hatahon ma hu bani, ʻMahua suruh ham ma namin si Tamar botouhu ai mambere ahu mangan ruti, anjaha i lobeihu ma namin ihoseihon ai, ase hupaidah-idah anjaha hupangan ai hun bani tanganni.ʼ ”

⁶Dob ai modom ma si Amnon, ipakulah ma boritan. Jadi dob roh raja ai manorihsi, nini si Amnon ma dompak raja ai, “Ambit roh ma namin si Tamar botouhai ase ipaturei dua ruti i lobeihu, anjaha mangan ahu hun bani tanganni.”

⁷Dob ai isuruh si Daud ma na mangalopi si Tamar hu rumah, nini ma, “Mahua laho ma ho hu rumah ni si Amnon, botoumai, anjaha paturei ma bani sipanganon.”

⁸Dob ai laho ma si Tamar hu rumah ni si Amnon botouni ai, anjaha tibal do ia bani podomanni jumpahsi; ibuat ma nitak, iagu ma ai, anjaha ipaturei ma ruti i lobei ni, dob ai imasak ma.

⁹Dob ai iangkat ma balanga ai anjaha ipalumei i lobei ni, tapi manjua do ia mangan. Dob ai nini si Amnon ma, “Hatahon ma luar haganup halak ai hun lambungkon!” Jadi luar ma ganup sidea hun lambungni.

¹⁰Dob ai nini si Amnon ma dompak si Tamar, “Boan ma sipanganon in hu kamar ase mangan ahu hun tanganmu!” Jadi ibuat si Tamar ma ruti na pinaulini ai, anjaha iboan ma hu bani si Amnon, botouni ai, hubagas kamar.

¹¹Tapi dob iboan ai hundohor hu lambungni, ase mangan ia, itangkap ma ia, anjaha nini ma hu bani, “Roh ma ho botou, modom hu lambungkon.” [150]

¹²Tapi nini ma hu bani, “Ulang ma sonai botou! Ulang ma dohori ahu; ai seng bulih horjahonon sonin i Israel. Ulang ma bahen habadoron na sonin! [151]

¹³Anjaha ahu, huja ma boanonku habadoronku? Anjaha ho pe gabe songon sada halak na oto ma i Israel. Mahua parsahapkon rahanan raja in; ai seng tumaram juaonni mamberehon ahu bam.”

¹⁴Tapi seng ra ia manangihon ia; halani gogohan ia hun bani, ipaksa ma ia anjaha ihasomani ma ia modom.

¹⁵Dob ai magigi tumang ma si Amnon mangidahsi, banggalan gigini mangidahsi, ase holongni hinan hu bani. Dob ai nini si Amnon ma hu bani, “Jongjong ho, ne laho!”

¹⁶Tapi nini ma hu bani, “Lang sonai botou; banggalan ope hasalahan on, anggo mintor sonari ipalaho ho ahu, hun bani na legan na binahenmai hu bangku.” Tapi seng ra ia mambalosisi. [152]

¹⁷Idilo ma anak parana juakjuakni ai, nini ma, “Usir ma naboru on hun lambungkon hu darat, anjaha oruk labah in i pudi ni!”

¹⁸Tapi baju ganjang do bajuni; ai sonai do pamahei ni boru ni raja sadokah anak boru hun bani sapari nari. Jadi ionjar juakjuakni ai ma ia hu darat, anjaha ioruk ma labah ai i pudi ni.

¹⁹Inahkon si Tamar ma abuan hu bani uluni, irigati ma baju ganjang na pinaheini ai; inahkon ma tanganni hu atas uluni, laho ma ia, anjaha tangis gogoh-gogoh. [153]

²⁰Dob ai nini si Absalom botouni ai ma hu bani, “Ai adong na masambor ibahen si Amnon botoumai bam? Sip ma ho botou; botoumu do ia, ulang ma parimbagaskon in!” Jadi marianan i rumah ni si Absalom ma si Tamar, punjung anjaha marpusok ni uhur.

²¹Jadi dob ibogei Raja Daud na masa ai ganup, marah tumang ma ia. Tapi seng ra ia mangkahua anakni si Amnon ai, halani anak sikahananni ia.

²²Tapi seng marsihataan si Absalom pakon si Amnon pasal hata na bajan atap na madear pe; ai sogam do uhur ni si Absalom bani si Amnon, halani na pinarsedani ai si Tamar, botouni ai.

²³Dob salpu dua tahun adong ma horja manrasip biri-biri i Baal-Hazor dohor hu Efraim, jadi idilo si Absalom ma ganup anak ni raja ai.

²⁴Iparayak si Absalom ma raja ai, nini ma, “Tonggor ma, adong do horja manrasip biri-biri bani juakjuakmu on, mahua ra ma namin raja in pakon juakjuakni roh hujai mangkasomani juakjuakmu on.”

²⁵Tapi nini raja ai ma dompak si Absalom, “Lang anakku, ulang ma pala laho hanami haganup, ase ulang susah ho ibahen hanami.” Sai ielek-elek do namin ia, tapi lanjar do seng ra raja ai laho, tapi ipasu-pasu do ia.

²⁶Dob ai nini si Absalom ma, “Anggo lang, mahua lopas ham ma si Amnon, abang ai laho rap pakon hanami.” Nini raja ai ma hu bani, “Mase ma pala dihut ia laho rap pakon ho?”

²⁷Tapi sai inunut si Absalom do mangelek-eleksi ase ilopas si Amnon laho rap pakon sagala anak ni raja ai.

²⁸Dob ai iparentahkon si Absalom ma hu bani juakjuakni, “Ingat, anggo mamungkah malas ma uhur ni si Amnon ibahen anggur, anjaha huhatahon bennima, ʻBunuh hanima ma si Amnon, maningon bunuhonnima do ia.ʼ Ulang hanima mabiar, ai ahu do na mangkatahon hanima. Totap anjaha tenger ma uhurnima!” [154]

²⁹Jadi ibahen juakjuak ni si Absalom ma hu bani si Amnon songon na hinatahon ni si Absalom ai. Jadi jongjong bei ma ganup anak ni raja ai; iajak bei ma ganup halodeni laho maporus.

³⁰Sanggah i tongah dalan ope sidea, das ma barita ai hu bani si Daud, “Domma ibunuh si Absalom ganup anak ni raja in, seng dong na tading age sada hun bani sidea.”

³¹Dob ai jongjong ma raja ai, irigati ma paheianni, anjaha ilangkobkon ma dirini hu tanoh; haganup juakjuakni jongjong manginggotisi marpaheian na nirigatan.

³²Dob ai nini si Jonadab, anak ni si Simea, abang ni si Daud ai ma, “Ulang ma nini uhur ni tuannami, na dob matei ganup anak parana, anak ni raja in, sahalak si Amnon do na matei; hun bani ari ai nari, sanggah na pinaksa ni si Amnon si Tamar, botou ni si Absalom, sonai do sura-surani. [155]

³³On pe ulang ma pala mintor nini uhur ni raja in na dob matei ganup anak ni raja in. Lang, pitah si Amnon do hansa na matei.” [156]

³⁴Tapi maporus do anggo si Absalom. Jadi sanggah manatap-natap parana parjaga, gabe iidah ma buei halak roh manginsuah hun dalan na laho hu Horonaim. [157]

³⁵Dob ai nini si Jonadab ma dompak raja ai, “Tonggor ma, domma roh anak ni raja in; songon na hinatahon ni juakjuakmu on, sonai do tongon.”

³⁶Jadi salpuhonsi ia na marsahap ai, tonggor ma, domma roh anak ni raja ai, ipagogoh bei ma sorani tangis-tangis; raja ai pe pakon ganup juakjuakni manggogoh bei do tangis-tangis.

³⁷Tapi anggo si Absalom domma maporus laho marayak si Talmai, anak ni si Amihut, raja hun Gesur. Tapi sai tong do pusok uhur ni si Daud paingat-ingat anakni ai. [158]

³⁸Ase maporus hu Gesur do si Absalom, anjaha tading ma ia ijai tolu tahun dokahni.

³⁹Dob ai masihol ma uhur ni Raja Daud hu bani si Absalom, ai domma sabou uhurni mardingat si Amnon na dob matei ai.