Read Batak Simalungun 2 SAMUEL 18 Bible Online

2 SAMUEL 18 - Batak Simalungun bible

2 SAMUEL 18

¹Dob ai ipabaris si Daud ma simbuei ai rap pakonsi, anjaha ipabangkit ma bani sidea kopala ni sisaribu pakon kopala ni sisaratus.

²Dob ai ipabangkit si Daud ma bala ai, sapartolu binobahon ni si Joab, sapartolu binobahon ni si Abisai, anak ni si Seruya, anggi ni si Joab, anjaha sapartolu nari binobahon ni si Itai, halak Gat ai. Nini si Daud ma hu bani simbuei ai, “Maningon dihut do ahu rap pakon nasiam.” [224]

³Tapi nini simbuei ai ma, “Seng bulih ham bingkat. Porini pe maporus hanami, seng parduli sidea bennami; age matei pe satongah hunbannami, seng parduli sidea bannami, tapi dos do hargamu pakon sapuluh ribu na songon hanami on. Rahanan ma hun huta ham roh mangurupi hanami.” [225]

⁴Nini raja ai ma hu bani sidea, “Barang aha sidearan nini uhur nasiam, ai do bahenonku.” Jadi jongjong ma raja ai i lambung ni horbangan ai, anjaha luar ma bala ai mar sasaratus pakon mar sasaribu. [226]

⁵Dob ai martonah ma raja ai hu bani si Joab, si Abisai pakon si Itai, “Harga ma bahen nasiam anaha ai, si Absalom.” Anjaha ganup do simbuei ai mambogeisi sanggah na martonah ai raja ai hu bani kopala-kopala ai pasal si Absalom. [227]

⁶Ase luar ma bala ai hu ladang manjumpahkon halak Israel, jadi marsiporangan ma sidea i harangan Efraim.

⁷Jadi talu ma ijai halak Israel ibahen hasoman ni si Daud; anjaha banggal tumang do hataluan ai ijai sadari ni ai, pala matei dua puluh ribu halak.

⁸Rarat do parporangan ai bani sab talun ai, anjaha daoh do bueinan bala ai ibondut harangan ai sadari ni ai ase ipangan podang.

⁹Tudu pajumpah ma si Absalom pakon juakjuak ni si Daud. Mangajak halode do ia, anjaha mamontas ma halode ai hun toruh ni dangkah ni sada jabi-jabi na banggal, jadi alit ma jambulanni bani jabi-jabi na banggal ai, jadi gayung-gayung ma ia i holangkolang ni langit pakon tanoh, ai torus do lintun halode na i toruh ni ai. [228]

¹⁰Adong ma sahalak na mangidah ai gabe ipatugah ma ai hu bani si Joab, nini ma, “Huidah do si Absalom gayung-gayung bani sada jabi-jabi.”

¹¹Nini si Joab ma hu bani halak na patugahkon ai bani, “Aha, iidah ho ia? Mase ma lang mintor ibunuh ho ia ijai ase manlabab hu tanoh? Mintor bereonku ma namin bam sapuluh sekel pirak pakon sada gondit.”

¹²Tapi nini halak ai ma hu bani si Joab, “Porini pe itimbang hubagas tanganku saribu sekel pirak seng anjai mangonai tangan ahu hu bani anak ni raja ai; ai itangar hanami do martonah raja ai bamu, bani si Abisai pakon bani si Itai, ʻHarga ma bahen nasiam, anaha ai, si Absalom!ʼ [229]

¹³Porini martahi-tahi ahu mambuat hosahni, seng tumaram ponop ai hun bani raja ai, anjaha ham pe ra do marlopas diri.”

¹⁴Dob ai nini si Joab ma, “Anggo sonai do, seng tarpaima-ima ahu ho.” Ibuat ma tolu tanja, ipantomkon ma ai hu pusu-pusu ni si Absalom, sanggah manggoluh ope ia gayung-gayung bani jabi-jabi ai.

¹⁵Roh ma sapuluh garama siboan sinjata ni si Joab, iinggoti sidea ma si Absalom, itampul ma ia lanjar matei.

¹⁶Isompul si Joab ma tarompet, jadi mulakan ma bala ai hun bani na mardakdak halak Israel; ai domma iparentahkon si Joab bani sidea ase ulang inunut be. [230]

¹⁷Dob ai ibuat sidea ma si Absalom, idabuhkon sidea ma ia hubagas sada godung ibagas harangan ai, anjaha ipagugun sidea ma batu, gijang tumang i atas ni. Tapi ganup halak Israel ai domma maporus hu rumahni bei. [231]

¹⁸Ia si Absalom sanggah manggoluh ope ia, domma ibuat anjaha ipajongjong bani sada tugu, ai ma i habungan Raja, ai nini do, “Seng dong anakku, na manjujung goranku.” Igoran do tugu ai mangihutkon goranni, lanjar margoran do ai ronsi sadari on: Tugu ni si Absalom. [232]

¹⁹Dob ai nini si Ahimas, anak ni si Sadok ma, “Palopas ham ma ahu marlintun, laho mamboan barita ai hu bani raja ai, ai ma na dob ipintori Jahowa do ia marimbang munsuhni.” [233]

²⁰Nini si Joab ma hu bani, “Seng dear ho siboan barita sadari on; santorap nari ma ho mamboan barita, tapi sadari on seng bulih siboan barita ho, halani matei anak ni raja in.”

²¹Dob ai nini si Joab ma hu bani halak Kus ai, “Laho ma ho, patugah ma hu bani raja in, aha na niidahmu!” Mintor isombah halak Kus ai ma si Joab lanjar laho ma ia.

²²Tapi iulaki si Ahimas, anak ni si Sadok ai ma, marsahap hu bani si Joab, “Barang sonaha pe, palopas ham ma homa ahu marpojong mangirikkon halak Kus ai.” Nini si Joab ma, “Mase sihol marlintun ho ambia, ai seng tumaram dapotan upah ho halani barita on? [234]

²³Barang sonaha pe, nini, sihol do laho ahu.” Jadi nini si Joab ma hu bani, “Antong, pojong ma!” Jadi marlintun ma si Ahimas, hun dalan na bani habungan ni Bah Jordan ai, gabe i lobei ma halak Kus ai.

²⁴Tapi hundul-hundul do si Daud i holangkolang ni horbangan na dua ai; tapi mardalan-dalan do parjaga ai i atas tayub ni horbangan ai dohor hu tembok. Sanggah mangkawah ia, iidah ma sada halak marlintun. [235]

²⁵Jadi idilohon parjaga ai ma laho patugahkon ai hu bani raja ai, nini raja ai ma, “Anggo sahalaksi do, tontu barita na madear do na binoanni.” Sanggah na lambin dohorni ia roh,

²⁶iidah parjaga ai ma roh sada halak na legan marlintun, gabe dilo-dilo ma parjaga ai dompak horbangan ai, nini ma, “Tonggor ma, roh marlintun use sada halak na legan, sahalaksi hansa.” Nini raja ai ma, “Ia pe siboan barita na madear do.”

²⁷Dob ai nini parjaga ai ma, “Songon parlintun ni si Ahimas, anak ni si Sadok do huidah parlintun ni na parlobei ai.” Nini raja ai ma, “Halak na bujur do ia anjaha barita na madear do na binoanni ai.” [236]

²⁸Dob ai dilo-dilo ma si Ahimas hu bani raja ai, nini ma, “Domma jorei!” Lanjar manrogop ma ia manombah hu bani raja ai, anjaha nini ma, “Pinuji ma Jahowa, Naibatamu, na maniapkon halak na manggeori dompak tuannami.”

²⁹Dob ai nini raja ai ma, “Naha, horas do anaha ai, si Absalom?” Nini si Ahimas ma mambalosi, “Sanggah na sinuruh ni si Joab ahu, lutu do huidah, tapi seng hubotoh na masa ai.”

³⁰Dob ai nini raja ai ma, “Surut ho otik, jongjong ma ijai.” Jadi surut ma ia otik lanjar jongjong ijai.

³¹Tonggor ma roh ma halak Kus ai, jadi nini ma, “Barita na madear do huboan, alo rajanami! Ai ipaluah Jahowa do ham sadari on hun bani tangan ni halak na manggeori dompak ham.”

³²Nini raja ai ma hu bani halak Kus ai, “Naha, horas do anaha ai, si Absalom?” Nini halak Kus ai ma mambalosi, “Sai songon na hu bani parana ai ma namin, sogop hu bani sagala munsuh ni tuannami pakon hu bani sagala na jongjong mangimbang ham, na sihol mangagou ham.”

³³Jadi seda tumang ma uhur ni raja ai, laho ma ia hu atas, hu kamar, na ibabou ni horbangan ai, anjaha tangis ma ia; sanggah na laho ai ia hujai nini ma, “Alo ambia Absalom, ambia, ambia, Absalom! Dearan ma namin ahu matei, gantihmu ambia Absalom! Ambia! Ambia!”