Read Batak Simalungun 2 SAMUEL 20 Bible Online

2 SAMUEL 20 - Batak Simalungun bible

2 SAMUEL 20

¹Dob ai adong ma ijai sada halak na so margagan na margoran si Seba, anak ni si Bikri, halak Benjamin; isompul ma tarompet, anjaha nini ma, “Seng dong parrupei hita bani si Daud, anjaha seng dong siteanonta hun bani si Daud, anak ni si Isai ai! Mulak ma ganup halak hu lampo-lamponi bei, o Israel!” [260]

²Jadi marbalik ma ganup halak Israel hun bani si Daud laho mangirikkon si Seba, anak ni si Bikri. Tapi anggo halak Juda totap do sidea mangirikkon raja ni sidea, olat ni Jordan das hu Jerusalem. [261]

³Jadi dob das si Daud i rumahni i Jerusalem, ibuat raja ai ma naboru sisapuluh ai, na tinadingkonni hinan manramotkon rumah, ipajagahon ma sidea ibagas sada rumah anjaha iparmudu do sidea, tapi lang iparayak be sidea. Jadi tarhurung ma sidea ijai das bani ari parmatei ni sidea, songon halak na mabalu. [262]

⁴Dob ai nini Raja Daud ma hu bani si Amasa, “Tingtingkon ma ase martumpu halak Juda hu lambungku ibagas na tolu ari on, anjaha ho pe roh ma hujon.” [263]

⁵Jadi laho ma si Amasa marhara patumpuhon Juda. Tapi dob salpu panorang na dob tinonahkon bani,

⁶nini si Daud ma hu bani si Abisai, “Ra bueinan do mara hu banta bahenon ni si Seba, anak ni si Bikri, hun bani na binahen ni si Absalom. Antong laho ma ho mambobahon juakjuak ni tuanmu, pardakdak ma ia, ase ulang sompat jumpahsi huta na marbatar-batar gabe buei hasunsahan holi ibahen banta.” [264]

⁷Jadi luar ma mangirikkon si Abisai; si Joab, halak Kreti pakon Peleti ampa halak na borani-borani; bingkat ma sidea ganup hun Jerusalem mardakdak si Seba, anak ni si Bikri ai. [265]

⁸Tapi dob das sidea hu batu na bolon ai, dohorhon Gibeon, roh ma si Amasa manjumpahkon sidea. Ia si Joab marpaheian baju porang do, anjaha i atas ni ai adong do sada gondit rap pakon podang ibagas sarungni, na sinangkutkon hu binongeini, hape peut ma anjaha madabuh hu tanoh.

⁹Dob ai nini si Joab ma hu bani si Amasa, “Naha, horas-horas do ho, ambia?” Anjaha itangkap si Joab ma si Amasa bani gumisni marhitei tangan siamunni laho manummahsi. [266]

¹⁰Tapi lang marjaga si Amasa bani podang na bani tangan sambilou ni si Joab; itobakkon si Joab ma ai bani badanni, gabe usei ma bituhani hu tanoh, seng pala ipaduahali manobaksi; jadi matei ma ia. Dob ai inunut si Joab pakon si Abisai anggini ai ma mardakdak si Seba, anak ni si Bikri ai. [267]

¹¹Tapi sahalak hun bani juakjuak ni si Joab jongjong do i lambung ni si Amasa, dob ai nini ma, “Barang ise na hampit si Joab anjaha na mangirikkon si Daud, iihutkon ma si Joab!”

¹²Tapi tibal margulu-gulu darohni do si Amasa i dalan na bolon ai. Anjaha ganup na mamontas, na mangidahsi sonto ma; jadi dob iidah halak ai, maronti ma ganup halak simbuei ai ijai, isarad ma si Amasa hun dalan na bolon ai hu ladang anjaha irongkobkon ma sada hiou bani. [268]

¹³Jadi dob ipaholang ia hun dalan na bolon ai, itoruskon halak na mabuei ai ma mangirikkon si Joab, laho mardakdak si Seba, anak ni si Bikri.

¹⁴Ia si Seba ibontas do ganup marga ni halak Israel das hu Abel-Bet-Mahaka, anjaha ganup na hampitsi domma martumpu anjaha iirikkon ia.

¹⁵Jadi roh ma ganup halak na rap pakon si Joab, anjaha ihubu ma ia i Abel-Bet-Mahaka; ipagugun sidea ma tanoh das hu tembok ni huta ai, jadi ganup ma sidea parsedahon tembok ai ase marosou ai.

¹⁶Jadi dilo-dilo ma sada puang-puang na pantas hun huta ai, “Tangar! Tangar nasiam ma! Patugah nasiam ma hu bani si Joab, Padohor ma hujon, adong hatahononku bamu!”

¹⁷Jadi ipadohor ma hu bani, lanjar nini naboru ai ma, “Ham do in Joab?” Balosni, “Eak.” Dob ai nini ma hu bani, “Tangar ma sora ni jabolonmu naboru on!” Jadi nini ma mambalosi, “Hutangar do.”

¹⁸Dob ai nini naboru ai ma, “Somal do nabasaia ihatahon halak sonon, ʻManingon marpanungkun lobei hu Abel,ʼ jadi jorei ma ganup.

¹⁹Hanami do sidameinan anjaha sibujuran i Israel; hapeni isura-surahon ham do mamunuh sada huta ampa sada inang i Israel; mase ma sihol bondutonmu parbagianan ni Jahowa?” [269]

²⁰Dob ai nini si Joab ma mambalosi, “Palis, palis, ahu mintor sihol mamondut barang mangagou.

²¹Seng sintong sonai. Adong do sada halak hun Dolog Efraim, na margoran si Seba, anak ni si Bikri, na manggeori dompak Raja Daud. Bere nasiam ia gelah bangku, ase surut ahu hun huta on.” Jadi nini naboru ai ma hu bani si Joab, “Tonggor ma, sampakkononkon do holi uluni bamu hu lopah ni tembok on.”

²²Dob ai laho ma naboru ai hu bani halak simbuei ai patugahkon hapentaronni ai. Itampul sidea ma ulu ni si Seba, anak ni si Bikri ai, anjaha igijigkon sidea ma ai hu bani si Joab. Jadi isompul ma tarompet, gabe merap ma sidea hun huta ai, ganup mulak hu lampo-lamponi bei. Mulak ma homa si Joab hu Jerusalem marayak raja ai.

²³Si Joab do pambobai ni ganup bala ni Israel, anjaha si Benaya, anak ni si Joyada, pambobai ni halak Kreti pakon Peleti. [270]

²⁴Si Adoram kopala ni halak siparrodi, anjaha si Josafat, anak ni si Ahilud, wakil ni raja ai. [271]

²⁵Si Seya jurutulis, anjaha si Sadok pakon si Abyatar malim.

²⁶Anjaha si Ira, halak Jair ai pe, malim do homa bani si Daud.