Read Batak Simalungun 2 SAMUEL 22 Bible Online

2 SAMUEL 22 - Batak Simalungun bible

2 SAMUEL 22

¹Dob ai ihatahon si Daud ma hu bani Jahowa hata ni doding on, bani ari sanggah na pinaluah ni Jahowa ia hun bani tangan ni ganup munsuhni pakon hun bani tangan ni si Saul. [286]

²Nini ma, “Jahowa do batu gingging bangku, batar-batarhu pakon na paluahkon ahu. [287]

³Naibatangku, batu ginggingku, hatengeran ni uhur bangku, gantarhu pakon tanduk ni haluahonku, paronding-ondinganku pakon haporusanku, pangurupi bangku, na mangurupi ahu hun bani odoh-odoh.

⁴Sai dilo-dilo do ahu bani Jahowa, na talup sipujion in, gabe maluah ma ahu hun bani munsuhku.

⁵Iinggoti gilumbang ni hamateian do ahu, isonggoti bah hajahaton.

⁶Isangkut rantei ni nagori toruh do ahu, siding hamateian tagang dompak ahu.

⁷Hudilo ma Jahowa bani hasosakankai; Naibata do hudilo. Gabe itangihon do sorangku hun rumah-Ni, anjaha das do doruhku hu pinggol-Ni.

⁸Jadi dugur ma tanoh on, onjolan ni langit pe hitir, anjaha murdug do halani marah-Ni. [288]

⁹Luar ma timus hun igung-Ni, pakon apuy na mangankon hun bani pamangan-Ni; narnar na gara marjimbur hun bani.

¹⁰Iondun ma langit, tuad ma Ia; golap marimpot-impot do i toruh ni nahei-Ni. [289]

¹¹Mangajak herub do Ia, anjaha habang mayab-ayab bani habong ni logou.

¹²Ibahen do hagolapan bahen lampo-lampo-Ni inggot Bani, bah na mamirong pakon hombun na mahapal.

¹³Marjimbur do gara ni apuy hun bani haliharon na i lobei-Ni.

¹⁴Ipahata Jahowa do longgur hun langit, anjaha ipabogeihon sigijangan ai do sora-Ni.

¹⁵Ipanahkon do panah-Ni ase mambur merap sidea, ibahen do mardejeb-dejeb hilap mardakdak sidea.

¹⁶Gabe taridah ma holbung ni laut, anjaha talag onjolan ni dunia on, halani pangasupi ni Jahowa, halani pangunsong ni hosah ni igung-Ni.

¹⁷Idurdurhon do tangan-Ni hun datas laho manangkap ahu, irintak do ahu hun bah marbanggal.

¹⁸Ipaluah do ahu hun bani munsuhku na gogoh, hun bani na marsogam ni uhur bangku, na gogohan hun bangku.

¹⁹Idorab sidea do ahu bani ari hasunsahanku; tapi Jahowa do arihanku.

²⁰Itogu do ahu bani ianan na lumbang; ipaluah do ahu, halani rosuh do uhur-Ni mangidah ahu.

²¹Ibalaskon Jahowa do hu bangku romban hu bani hapintoranku, romban hu bani haborsihon ni tanganku ipasuang bangku.

²²Ai huirikkon do dalan ni Jahowa, anjaha lang manjahati ahu, marbalik hun bani Naibata.

²³Ai tongtong do i lobeihu sagala uhum-Ni, anjaha titah-Ni seng hupadaoh hun bangku.

²⁴Bujur do ahu i lobei-Ni, anjaha hujaga do diringku dompak hajahaton.

²⁵Jadi ibalaskon Jahowa ma hu bangku romban hu bani hapintoranku, romban hu bani hapansingonku, niidah-Ni ai.

²⁶Bani halak na bonar, bonar do Ham; bani halak na bujur, bujur do Ham.

²⁷Ipatuduhkon Ham do hapansingon-Mu bani halak na pansing, tapi gila do uhur-Mu bani halak pargeduk. [290]

²⁸Ipaluah Ham do bangsa na toruh maruhur, tapi ipatoruh Ham do paruhur na gijang. [291]

²⁹Ai Ham do alo Jahowa, palita bangku, anjaha ipalihar Ham do hagolapanku.

³⁰Ai marhasomankon Ham tardorab ahu do bala ni munsuh, anjaha mangunsagahkon Naibatangku tarlumpati ahu tembok.

³¹Gokan dear do dalan ni Naibatangku, pitah do hata ni Jahowa; Ia do gantar ni ganup halak, na martenger ni uhur Bani.

³²Ai ise ma Naibata, sobali Jahowa? Anjaha ise ma batar-batar sobali Naibatanta?

³³Naibata do haporusanku na toguh, anjaha ipajorei do dalanku.

³⁴Ia do mambahen naheihu songon nahei ni ursa tini, anjaha ipajongjong do ahu jorgit i atas buntu-buntu.

³⁵Ia do mangajari tanganku marmunsuh gabe pandei tanganku manintak panah tombaga.

³⁶Ibere Ham do bangku gantar ni haluahon-Mu, anjaha halayakon-Mu do patimbulhon ahu.

³⁷Ipalumbang Ham do ianan panlangkahanku, anjaha seng tarlandit naheihu.

³⁸Sai hupardakdak do munsuhku anjaha siap sidea hubahen, anjaha seng mulak ahu, paima rasei sidea.

³⁹Huropuki anjaha husiapkon do sidea, radag do sidea i toruh ni naheihu.

⁴⁰Igonditkon Ham do bangku hagogohon mangkorjahon hamunsuhon, ipaunduk Ham do munsuhku bangku i toruhku.

⁴¹Ipamundur Ham do munsuhku i lobeihu, gabe siap hubahen na marsogam ni uhur bangku.

⁴²Sai mangkawah do sidea, tapi seng dong na paluahkon; doruh-doruh do sidea bani Jahowa, tapi seng itangihon sidea.

⁴³Jadi hulumati ma sidea songon orbuk ni tanoh, hulotloti sidea songon hubang i alaman.

⁴⁴Domma ipaluah Ham ahu hun bani partinggilan dompak bangsangku; ipabangkit Ham do ahu gabe kopala ni bangsa sipajuh begu-begu; bangsa na so hutanda pe ibalosi do ahu. [292]

⁴⁵Roh do bangsa na legan marsombah bangku; ijin ibogei sidea pasal ahu, mintor ibalosi sidea do ahu.

⁴⁶Mandatei do iahap bangsa na legan, gobir do sidea luar hun batar-batarni.

⁴⁷Manggoluh do Jahowa; sai tarpuji ma batu ginggingkin, anjaha sai timbul ma Naibatangku, batu gingging ni hatuahonku.

⁴⁸Naibata do na mambere pambalason bangku, anjaha na patundukkon bangsa-bangsa bangku,

⁴⁹Ham do na paluahkon ahu hun bani munsuhku; Ham do tongon na patimbulhon ahu mangimbang sipanlawan dompak ahu; Ham do na paluahkon ahu hun bani jolma sibahen gogoh.

⁵⁰Halani ai pujionku ma Ham, alo Jahowa, i tongah-tongah ni bangsa sipajuh begu-begu, anjaha dodingkononku ma goran-Mu. [293]

⁵¹Ia do sibere hatuahon hu bani raja-Ni, anjaha ipatuduhkon do idop ni uhur-Ni hu bani na mininakan-Ni, hu bani si Daud pakon hu bani ginomparni ronsi sadokah ni dokahni.”