Read Batak Simalungun 2 SAMUEL 6 Bible Online

2 SAMUEL 6 - Batak Simalungun bible

2 SAMUEL 6

¹Dob ai iulaki si Daud ma use patumpuhon ganup na pinilih i Israel, tolu puluh ribu halak bueini.

²Dob ai bingkat ma si Daud rap pakon hasomanni ai hu Baale-Juda, laho mamboan tangkog hunjai Poti Parpadanan ni Jahowa, na ginoran romban hu bani goran ni Jahowa Zebaot, na marparataskon herubim. [65]

³Dob ai iangkat sidea ma Poti ni Naibata ai huatas ni sada gareta na baru, anjaha iboan sidea ma ai hun rumah ni si Abinadab, na i atas ni buntu-buntu ai; si Usa pakon si Ahio, anak ni si Abinadab ai do manogu gareta na baru ai. [66]

⁴Si Usa mardalan romban hu bani Poti Parpadanan ni Jahowa ai, anjaha si Ahio mardalan i lobei ni.

⁵Ia si Daud pakon ganup ginompar ni halak Israel manortori do i lobei ni Jahowa hun bani sagala gogohni, marhasoman doding pakon na pahatahon arbab, sordam, tambur, ogung pakon mungmung. [67]

⁶Jadi dob das sidea hu pardogeian Nakon, isurdukkon si Usa ma tanganni hu Poti ni Jahowa ai anjaha itagangi ma ai, halani sihol tompas lombu ai.

⁷Jadi manringis tumang ma Jahowa mangidah si Usa; ibunuh Jahowa ma ia ijai i lambung Poti ni Naibata halani lanseini. [68]

⁸Seda tumang do uhur ni si Daud halani parsirangan na binahen ni Jahowa ai bani si Usa, jadi ibahen ma goran ni ianan ai Peres-Usa (panontapkon bani si Usa), ronsi sadari on.

⁹Jadi mabiar ma si Daud mangidah Jahowa bani na sadari ai, nini ma, “Sonaha ma pamboan bani Poti ni Jahowa das bani iananku?” [69]

¹⁰Halani ai seng be ra si Daud mamboan Poti ni Jahowa ai hu huta ni si Daud, tapi ihatahon si Daud ma na manaruhkon poti ai hu rumah ni si Obed-Edom, halak Gat ai.

¹¹Tading i rumah ni si Obed-Edom, halak Gat ai ma Poti ni Jahowa tolu bulan dokahni; jadi ipasu-pasu Jahowa ma si Obed-Edom pakon ganup isi ni rumahni.

¹²Adong ma halak na patugahkon hu bani si Daud, “Ipasu-pasu Jahowa do rumah ni si Obed-Edom ampa haganup na dong bani halani Poti ni Naibata.” Jadi laho ma si Daud mamboan Poti ni Naibata tangkog hun rumah ni si Obed-Edom hu huta ni si Daud marhasoman malas ni uhur.

¹³Jadi dob manlangkah halak siusung Poti ni Jahowa onom langkah daohni igalangkon ma sada lombu jonggi pakon sada anak ni lombu na pinamombur. [70]

¹⁴Tapi manortori do si Daud hun bani gogohni i lobei ni Jahowa; margonditkon baju epod do si Daud ai. [71]

¹⁵Sonai ma pamboan ni si Daud pakon ganup halak Israel bani Poti ni Jahowa marhasoman olob-olob pakon sora ni tarompet. [72]

¹⁶Jadi dob das Poti ni Jahowa ai hu huta ni si Daud, manungkir ma si Mikal, boru ni si Saul ondi hun jandela, jadi iidah ma Raja Daud marinjak-injak anjaha manortori i lobei ni Jahowa; gabe mapas ma uhurni mangidahsi. [73]

¹⁷Dob iboan masuk Poti ni Jahowa, inahkon ma ai bani iananni, i tongah-tongah ni lampo-lampo, na dob pinajongjong ni si Daud hinan; dob ai igalangkon si Daud ma galangan situtungon pakon galangan pardameian i lobei ni Jahowa.

¹⁸Jadi dobkonsi igalangkon si Daud galangan situtungon ai pakon galangan pardameian ai, ipasu-pasu si Daud ma bangsa ai marhitei goran ni Jahowa Zebaot, [74]

¹⁹anjaha isuruh ma na mamberehon hu bani ganup bangsa ai, hu bani ganup halak Israel, dalahi age naboru, ganup sada be i ruti, santoktok gulei ampa kuei na maragu buah anggur. Dob ai mulak ma ganup bangsa ai hu rumahni bei.

²⁰Tapi sanggah mulak si Daud sihol mamasu-masu isi ni rumahni namin, luar ma si Mikal boru ni si Saul ondi manjumpahkon si Daud, nini ma, “Tunggungni ai pangulah ni raja ni Israel sadari on, na patoruh dirini sadari on i lobei ni boru ni juakjuakni, songon sada halak na so mambotoh maila, ijanggai dirini!”

²¹Tapi nini si Daud ma mambalosi si Mikal ai, “Napuji ma Jahowa, na mamilih ahu bahen gantih ni bapamu pakon ginomparni, na pabangkit ahu gabe pambobai ni bangsa ni Jahowa, halak Israel, i lobei ni Jahowa do ahu sihol manortori; [75]

²²lobih hunjai ope patoruhonku diringku, anjaha sihol ope lambin etekni diringku bahenonku i lobei-Ni; tapi bani naboru-naboru na hinatahonmai, lambin marmulia do ahu bahenon ni sidea.” [76]

²³Tapi anggo si Mikal, boru ni si Saul ondi, lanjar do seng tubuhan tuah das bani parmateini.