Read Batak Simalungun 2 SAMUEL 8 Bible Online

2 SAMUEL 8 - Batak Simalungun bible

2 SAMUEL 8

¹Jadi dob salpu ai, italuhon si Daud ma halak Palistim, anjaha tunduk sidea ibahen; ibuat do panggomgomion hun bani tangan ni halak Palistim.

²Italuhon do homa halak Moab, anjaha isibar sidea bani tali; ihatahon do sidea manlangkob hu tanoh; dua tali isibarhon hu bani sidea na laho sibunuhon, sada tali bani halak sipagoluhon. Ase gabe jabolon ma halak Moab bani si Daud anjaha manggalar sohei.

³Italuhon si Daud do homa si Hadadezer, anak ni si Rehob, raja hun Soba, sanggah na laho ia use pajongjongkon kuasani i Eufrat. [98]

⁴Ibuat si Daud do hun bani saribu pitu ratus halak siajak huda pakon dua puluh ribu balani sipardalan nahei; irimpongi si Daud do ganup huda sitarik gareta, pitah saratus tumang itebai. [99]

⁵Anjaha sanggah roh halak Aram hun Damaskus sihol mangurupi si Hadadezer, raja ni Soba ai, ibunuh si Daud ma dua puluh dua ribu hun bani halak Aram ai.

⁶Dob ai ipajongjong si Daud ma bentengni i tanoh Aram inggot ni Damaskus; gabe jabolon ma sidea bani si Daud anjaha manggalar sohei. Sai itumpaki Jahowa do si Daud, barang huja pe ia manlangkah. [100]

⁷Dob ai ibuat si Daud ma gantar-gantar omas, na pinaboan-boan ni juakjuak ni si Hadadezer, anjaha iboan ma ai hu Jerusalem. [101]

⁸Hun Tebah ampa hun Berotai, ai ma huta ni si Hadadezer, ibuat Raja Daud do buei tumang tombaga. [102]

⁹Dob ibogei si Tou, raja ni Hamat, na dob italuhon si Daud ganup bala ni si Hadadezer,

¹⁰isuruh si Tou ma anak ni si Joram marayak Raja Daud, laho manungkun pasalsi anjaha mamasu-masusi, halani na dob pinorangni si Hadadezer, anjaha italuhon ia, ai munsuh ni si Tou do si Hadadezer; iboan ma siluahni ugas-ugas pirak, omas pakon tombaga.

¹¹Ai pe ikahulhon Raja Daud do hu bani Jahowa rap pakon pirak ampa omas na dapotsi hun bani ganup bangsa sipajuh begu-begu, na dob tinaluhonni ai,

¹²hun Aram, hun Moab, hun bani halak Ammon, halak Palistim, halak Amalek pakon hun bani taban-taban, na dapot hun bani si Hadadezer, anak ni si Rehob, raja hun Soba.

¹³Jadi lambin tarambilan ma goran ni si Daud. Sanggah na mulak ai ia, italuhon ma sapuluh ualuh ribu halak Edom i habungan Garam. [103]

¹⁴Ipabangkit ma wakilni i Edom; bani haganup Edom ipabangkit do wakilni, jadi gabe jabolon bani si Daud ma ganup halak Edom. Sai itumpaki Jahowa do barang huja pe laho si Daud. [104]

¹⁵Ase si Daud do na manggomgom Israel ganup, anjaha idalankon si Daud do uhum pakon hapintoron hu bani ganup bangsa ai. [105]

¹⁶Si Joab, anak ni si Seruya do pambobai ni bala, anjaha si Josafat anak ni si Ahilud do wakil ni raja. [106]

¹⁷Si Sadok, anak ni si Ahitub, pakon si Abiatar anak ni si Ahimelek, sidea do malim; si Seruya juru tulis, [107]

¹⁸si Benaya, anak ni si Joyada, pambobai ni pangawal, anjaha anak ni si Daud gabe malim. [108]