Read Batak Simalungun 2 SAMUEL 9 Bible Online

2 SAMUEL 9 - Batak Simalungun bible

2 SAMUEL 9

¹Nini si Daud ma manungkun, “Adong ope nani tading-tadingan ni Raja Saul, ase hupatuduhkon bani idop ni uhur, halani si Jonatan?” [109]

²Jadi adong ma sada juakjuak i rumah ni si Saul hinan, na margoran si Siba, gabe tardilo ma ia hulobei ni si Daud. Dob ai nini raja ai ma hu bani, “Atene, ho do na margoran si Siba?” Nini ma mambalosi, “Ahu ma da, jabolonmu!” [110]

³Nini raja ai ma, “Atene, adong ope tading-tadingan ni si Saul, ase hubahen bani idop ni uhur na hun bani Naibata?” Nini si Siba ma mambalosi raja ai, “Adong ope sada anak ni si Jonatan, repat do naheini duasi.” [111]

⁴Dob ai nini raja ai ma hu bani, “Ija do ia?” Nini si Siba mambalosi raja ai, “Tonggor ma, i Lodebar do ia, tondok bani si Makir, anak ni si Ammiel.” [112]

⁵Dob ai isuruh Raja Daud ma suruhanni laho mangalopi hun rumah ni si Makir, anak ni si Ammiel na hun Lodebar.

⁶Jadi dob das si Mepiboset anak ni si Jonatan, anak ni si Saul hu bani si Daud, manrogop ma ia manombahsi. Tapi nini si Daud ma, “Mepiboset!” Nini ma mambalosisi, “Ijon do ahu, jabolonmu!”

⁷Nini si Daud ma hu bani, “Ulang ma ho mabiar, ai sihol bahenonku do bam idop ni uhur, halani si Jonatan bapamu ondi, anjaha sihol paulakonku do bam ganup tanoh ni si Saul ompungmu ondi, anjaha rapkon ahu ma ho tongtong mangan.”

⁸Jadi marsombah ma ia, lanjar nini ma, “Ise ma ahu jabolonmu on, ase pala ma dompakkononmu baliang na matei songon ahu on?” [113]

⁹Dob ai idilo raja ai ma si Siba, juakjuak ni si Saul, anjaha nini ma hu bani, “Sagala na bani si Saul pakon na bani rumahni hinan domma hubere hu bani anak ni tuanmu.

¹⁰Halani ai maningon horjahononmu do tanoh ai bani, ho pakon anakmu ampa jabolonmu, anjaha patumpu ma gogohni, ase adong hagoluhon ni anak ni tuanmu. Ia si Mepiboset, anak ni tuanmu, maningon rapkon ahu ma ia tongtong mangan. Adong do bani si Siba sapuluh lima anak pakon dua puluh jabolon.”

¹¹Dob ai nini si Siba ma dompak raja ai, “Songon na pinarentahkon ni tuanku, raja in hu bani jabolonni, maningon sonai do bahenon ni jabolonmu on.” Ase rap mangan ma si Mepiboset ampa si Daud, songon sada hun bani anak ni raja ai. [114]

¹²Adong do bani si Mepiboset sada anak na etek-etek, na margoran si Mika. Tapi ganup na marianan i rumah ni si Siba jabolon ni si Mepiboset do. [115]

¹³Ase marianan i Jerusalem ma si Mepiboset ai tongtong do ia rap mangan pakon raja ai; tapi repat do naheini. [116]