Read Batak Simalungun 1 RAJA-RAJA 13 Bible Online

1 RAJA-RAJA 13 - Batak Simalungun bible

1 RAJA-RAJA 13

¹Tonggor ma, roh ma sada halak ni Naibata hun Juda hu Betel ihatahon Jahowa, tudu sanggah jongjong si Jerobeam i lambung ni anjapanjap ai manutung dahupa. [275]

²Dob ai dilo-dilo ma nabi ai dompak anjapanjap ai padas hata ni Jahowa, nini ma, “O anjapanjap, anjapanjap, sonon do hata ni Jahowa, ʻTonggor ma tubuh do magira sada anak bani ginompar ni si Daud, na margoran si Josia; galangkononni do i atasmu malim-malim ni rumah panumbahan na i atas buntu-buntu, na manutung dahupa i atasmu, anjaha tutungonni do holi-holi ni jolma i atasmu.ʼ ” [276]

³Anjaha ibahen do sada tanda halongangan bani na sadari ai, nini do, “On ma partinandaanni paboa Jahowa do na mangkatahon hata on, ʻTonggor ma, mabolah ma anjapanjap on, anjaha sabur ma abuan na i atas ni.ʼ ” [277]

⁴Dob ibogei raja ai hata ni halak ni Naibata ai, na dilo-dilo dompak anjapanjap na i Betel ai, ituldukkon si Jerobeam ma tanganni hun datas anjapanjap ai, lanjar nini ma, “Tangkap nasiam ia!” Hape mintor jorgong ma tanganni, na tinuldukkonni ai dompaksi, seng tartariksi be. [278]

⁵Mabolah ma homa anjapanjap ai lanjar sabur ma abuan ai hun anjapanjap ai, romban hu bani partinandaan na dob hinatahon ni halak ni Naibata ai marhitei hata ni Jahowa.

⁶Dob ai nini raja ai ma mambalosi halak ni Naibata ai, “Martonggo ma ham marsombah hu bani Jahowa, Naibatamu, mangapiti ahu, ase suang use tangankon.” Jadi martonggo ma halak ni Naibata ai bani Jahowa, gabe suang ma tanganni ai songon na saindokah. [279]

⁷Nini raja ai ma hu bani halak ni Naibata ai, “Laho ma hita hu rumah pahosahkon tongkin; sihol bereonku do bamu homa sibere-bere.” [280]

⁸Tapi nini halak ni Naibata ai ma hu bani raja ai, “Porini pe ibere ham bangku satongah ni rumahmu, seng ra ahu laho rap pakon ham, anjaha seng ra ahu mangan ruti barang minum bah bani ianan on; [281]

⁹ai sonon do iparentahkon Jahowa hu bangku, ʻSeng bulih panganonmu ruti barang inumonmu bah, barang mulak ho hu bani dalan, na dob nidalananmu.ʼ ” [282]

¹⁰Jadi mulak ma ia hun bani dalan na legan, seng be hun bani dalanni hinan marayak huta Betel.

¹¹Tapi adong do sada nabi na matua marianan i Betel. Jadi roh ma anakni patugahkon bani pasal ganup na binahen ni halak ni Naibata ai bani na sadari ni ai i Betel, sonai homa hata, na hinatahonni ai bani raja ai, ipatugah sidea do hu bani bapani ai.

¹²Nini bapa ni sidea ai ma hu bani sidea, “Hun dalan ja ia mardalan?” Jadi ipatuduhkon anakni ai ma bani dalan na nidalanan ni halak ni Naibata, na roh hun Juda ai.

¹³Jadi nini ma hu bani anakni ai, “Palanai nasiam ma halode in bangku!” Dobkonsi ipalanai sidea halode ai bani, iajak ma ai.

¹⁴Iirikkon ma halak ni Naibata ai, gabe jumpahsi ma ia mangunsandei i bona ni jabi-jabi, anjaha nini ma hu bani, “Atene, ham do halak ni Naibata na roh hun Juda ai? Nini, “Ai ma da.”

¹⁵Dob ai nini ma hu bani, “Laho ma hita hu rumah mangan ruti.”

¹⁶Tapi nini ma, “Seng tarbahen ahu mulak pakon ham barang masuk hu rumahmu rap pakon ham; sonai homa seng bulih ahu mangan ruti barang minum bah rap pakon ham bani ianan on;

¹⁷ai domma roh hata ni Jahowa mangkatahon hu bangku, ʻSeng bulih panganonmu ruti ijai barang inumonmu bah, barang mulak ho hun bani dalanmu hinan.ʼ ” [283]

¹⁸Jadi nini ma hu bani, “Ahu pe nabi do songon ham, anjaha domma roh hata ni sada malekat bangku marhitei hata ni Jahowa mangkatahon, ʻArahkon ma ia mulak hu rumahmu, ase mangan ruti ia pakon minum bah.ʼ ” Tapi marladung do ia ai bani. [284]

¹⁹Jadi mulak ma ia rap pakonsi, anjaha mangan ruti ma ia i rumahni pakon minum bah.

²⁰Sanggah hundul sidea bani meja, roh ma hata ni Jahowa bani nabi, na mangarahkonsi mulak;

²¹jadi idilohon ma hu bani halak ni Naibata, na roh hun Juda ai, nini ma, “Sonon do hata ni Jahowa, halani na so tinangihonmai hata ni Jahowa, anjaha seng iramotkon ho tonah, na tinonahkon ni Jahowa Naibatamu, [285]

²²tapi mulak do ho anjaha mangan ruti pakon minum bah bani ianan, na dob hinatahonni bam, ʻSeng bulih ho mangan ruti barang minum bah ijaiʼ, halani ai, seng bulih das bangkeimu hu tanoman ni ompungmu.”

²³Jadi dob mangan ruti pakon minum ia, ipalanai ma halode bani nabi, na niarahkonni ai mulak.

²⁴Jadi bingkat ma ia, gabe pajumpah ma ia pakon singa i tongah dalan, gabe ibunuh ma ia. Tibal do bangkeini ai i dalan ai, anjaha halodeni ai jongjong i lambungni; singa ai pe jongjong do i lambung ni bangkei ai. [286]

²⁵Tonggor ma, roh ma halak mamontas, gabe iidah sidea ma bangkei ai tibal i tongah dalan, anjaha singa ai jongjong i lambung ni bangkei ai. Roh ma sidea patugahkon na masa ai hu huta, na niianan ni nabi na matua ai. [287]

²⁶Dob ibogei nabi, na mangarahkonsi ai mulak hun dalan pasal na masa ai, nini ma, “Halak ni Naibata do ia, na seng manangihon hata ni Jahowa, halani ai do ase iondoskon Jahowa ia hu bani singa, na manoroh anjaha na mamunuhsi, romban hu bani hata ni Jahowa, na dob nilumbahon-Ni hinan hu bani.” [288]

²⁷Dob ai nini ma hu bani anakni ai, “Palanai hanima ma bangku halode in!” Jadi ipalanai sidea ma ai.

²⁸Jadi laho ma ia anjaha jumpahsi ma bangkeini ai tibal i dalan, anjaha halode ai pakon singa ai jongjong i lambung ni bangkei ai. Seng ipangan singa ai bangkei ai anjaha seng isoroh halode ai.

²⁹Dob ai iangkat nabi ai ma bangkei ni halak ni Naibata ai, anjaha itampeihon ma ai hu halode ai, lanjar iboan ma ai mulak hu huta ai, laho manangisi pakon mananomsi.

³⁰Inahkon ma bangkei ai hu tanomanni sandiri; itangisi ma ia, nini ma, “Ai, saninangku!” [289]

³¹Jadi dob itanom sidea ia, nini nabi ai ma hu bani anakni ai, “Anggo matei ahu, tanom hanima ma ahu bani tanoman ni halak ni Naibata ai; tibalhon ma holi-holingku i lambung ni holi-holini. [290]

³²Ai maningon saud do hata na nidilohonni marhitei hata ni Jahowa dompak anjapanjap na i Betel, dompak ganup rumah panumbahan na i buntu-buntu, na ibagas huta-huta ni Samaria.” [291]

³³Dob salpu na masa ai, lanjar seng mulak do si Jerobeam hun bani dalanni na masambor ai, tapi iulaki do use pabangkitkon halak hun tongah-tongah ni ganup bangsa ai; barang ise na ra, ipabangkit ma ai gabe malim bani rumah panumbahan na i buntu-buntu. [292]

³⁴Gabe parbingkasan ni dousa ma ai bani ginompar ni si Jerobeam, ase siap sidea anjaha malobur hun tanoh on. [293]