Read Batak Simalungun 1 RAJA-RAJA 14 Bible Online

1 RAJA-RAJA 14 - Batak Simalungun bible

1 RAJA-RAJA 14

¹Bani panorang ai boritan ma si Abia, anak ni si Jerobeam.

²Dob ai nini si Jerobeam ma hu bani parinangonni, “Bingkat ma ho, pasamak hioumu, ase ulang ibotoh halak, parinangon ni si Jerobeam do ho, anjaha laho ma ho hu Silo; tonggor ma, ijai do Nabi Ahia, na mangkatahon hinan bangku, paboa ahu do gabe raja manggomgom bangsa on. [294]

³Lanjar boan ma sapuluh ruti, kuei pakon sada gusi manisan ni huramah laho marayaksi, ase ia patugahkon bam pasal hosah ni dakdanak on.” [295]

⁴Jadi ibahen parinangon ni si Jerobeam ma sonai; bingkat ma ia laho hu Silo, anjaha masuk hu rumah ni si Ahia. Tapi anggo si Ahia ai seng be marpangidah, ai domma rambon matani halani tuani. [296]

⁵Tapi nini Jahowa ma hu bani si Ahia, “Tonggor ma, na roh do parinangon ni si Jerobeam laho manungkun hunbam pasal anakni, ai boritan do ia.” Sonon ma hatahon hu bani. Sanggah na masuk ai ia, hiouni domma ipasamak, [297]

⁶nini si Ahia ma sanggah na binogeini ai panlangkahni ai roh hun labah, “Masuk ma ho, alo parinangon ni si Jerobeam! Mase ipasamak ho rupamu? Domma isuruh ahu mangkatahon hata na koras bam. [298]

⁷Laho ma ho, patugah ma hu bani si Jerobeam, sonon do hata ni Jahowa, Naibata ni Israel, ʻHalani na dob Hupatimbul do ho hun tongah-tongah ni bangsa in, anjaha Hupabangkit ho gabe pambobai ni bangsang-Ku halak Israel, [299]

⁸pala Hubuat harajaon in hun bani ginompar ni si Daud, anjaha Hubere in hubam; hape seng songon paruhuran ni juakjuak-Ku si Daud paruhuranmu, na manramotkon sagala titah-Ku anjaha na mangirikkon Ahu hun bani gok ni uhurni, pitah na pintor ibagas uhur-Hu do ihorjahon, [300]

⁹tapi jahat do pambahenanmu, lobih hun bani sagala raja na parlobei hunbam; ibahen ho do bam naibata na legan pakon gana-gana na tinuang, laho mamuhoi ringis-Hu, anjaha iambukkon ho do Ahu hu pudi ni gurungmu. [301]

¹⁰Halani ai, tonggor ma, parohon-Ku ma hamagouan hu bani ginompar ni si Jerobeam, anjaha siapkonon-Ku do hun bani si Jerobeam sagala dalahi, na etek pakon na banggal i Israel, anjaha masap tumang do bahenon-Ku ginompar ni si Jerobeam, songon halak na mamuruni tompoh-tompoh, paima masap tumang ia. [302]

¹¹Barang ise na matei hun bani si Jerobeam ibagas huta, maningon bois panganon ni baliang; anjaha barang ise na matei i ladang, maningon bois paguton ni manuk-manuk na i awang-awang; ai Jahowa do mangkatahon ai. [303]

¹²Halani ai bingkat ma ho laho hu rumahmu; daskonsi naheimu hubagas huta ai, matei ma dakdanak ai.

¹³Tangisan ni ganup halak Israel do ia, anjaha tanomonni; pitah ia do hun bani si Jerobeam na dear tanomon, halani adong ope jumpah bani, na hinarosuhkon ni Jahowa, Naibata ni Israel, i rumah ni si Jerobeam. [304]

¹⁴Tapi pajongjongon ni Jahowa ma bani sada raja na manggomgom Israel, na mansiapkon ginompar ni si Jerobeam. [305]

¹⁵Anjaha bogbogan ni Jahwoa ma Israel, gabe guling-guling songon arung-arung na meol-eol ibagas bah, anjaha painsahon-Ni Israel hun tanoh na madear on, na dob binere-Ni hu bani ompung ni sidea hu dipar ni Bah Eufrat, halani Asera na binahen ni sidea, gabe ipuhoi ringis ni Jahowa. [306]

¹⁶Anjaha ondoskonon-Ni ma Israel halani dousa na binahen ni si Jerobeam, pakon halani na tinoguni ai halak Israel mambahen dousa.” [307]

¹⁷Dob ai bingkat ma parinangon ni si Jerobeam laho hu Tirsa. Daskonsi ia hu molmolan ni rumahni, matei ma dakdanak ai. [308]

¹⁸Itanom sidea ma ia, anjaha ganup halak Israel manangisi, romban hu bani hata ni Jahowa, na dob pinatugah hinan marhitei Nabi Ahia, juakjuak-Ni ai. [309]

¹⁹Barita na legan pasal si Jerobeam, naha parporangonni anjaha naha panrajaionni, tonggor ma, tarsurat do ai ibagas buku barita ni raja-raja ni Israel.

²⁰Ia dokah ni si Jerobeam manrajai dua puluh tahun do. Dob ai modom ma ia pakon ompungni, anjaha si Nadab anakni ai ma raja manggantihsi. [310]

²¹Tapi si Rehabeam, anak ni Raja Salomo do marrajai i Juda. Ompat puluh sada tahun do umur ni si Rehabeam sanggah na bangkit raja ia, anjaha sapuluh pitu tahun do dokahni manrajai i Jerusalem, huta na pinilih ni Jahowa hun bani ganup marga ni Israel bahen ianan ni goranni. Goran ni inangni si Naama do, boru Ammon. [311]

²²Dob ai ihorjahon halak Juda ma sogam ni uhur ni Jahowa, ipuhoi ma simburu-Ni marhitei dousa, na binahen ni sidea ai, lobih hun bani ganup na binahen ni ompung ni sidea. [312]

²³Ai dihut do sidea padearhon bani sidea rumah panumbahan i buntu-buntu gana-gana pakon Asera i atas ni sagala buntu-buntu na gijang, pakon i toruh ni sagala hayu na tabun; [313]

²⁴anjaha adong do homa na marjolmahon dalahi i tanoh ai; ibahen sidea do romban hu bani hajahaton, na hinorjahon ni bangsa sipajuh begu-begu, na dob pinabali ni Jahowa i lobei ni halak Israel. [314]

²⁵Bani tahun palimahon dob raja si Rehabeam, tangkog ma si Sisak, raja hun Masir mandorab Jerusalem. [315]

²⁶Iayob do ugas-ugas hun rumah ni Jahowa pakon hun rumah ni raja ai, sabonar iayob do haganup; iayob do homa ganup gantar omas, na pinauli ni Raja Salomo. [316]

²⁷Dob ai ipauli Raja Rehabeam ma gantih ni ai gantar hun bani tombaga, anjaha iondoskon ma ai hu tangan ni pambobai ni bala, na marjaga i lambung ni labah ni rumah ni raja ai.

²⁸Barang piga hali pe raja ai masuk hu Rumah ni Jahowa, sai iusung parjaga ai do ai, dob ai iboan ma mulak hu kamar jaga.

²⁹Barita na legan ai pasal si Rehabeam pakon ganup na binahenni, ai lang tarsurat do ai ibagas buku Barita ni Raja-raja Juda?

³⁰Anjaha sai adong do tong porang i tongah-tongah ni si Rehabeam pakon si Jerobeam sadokah manggoluh sidea. [317]

³¹Dob ai modom ma si Rehabeam rap pakon ompungni, anjaha itanom ma ia ibagas huta ni si Daud. Ia goran ni inang ni Naama do, boru Ammon. Jadi si Abia, anakni ai ma bangkit raja manggantihsi. [318]