Read Batak Simalungun 1 RAJA-RAJA 19 Bible Online

1 RAJA-RAJA 19 - Batak Simalungun bible

1 RAJA-RAJA 19

¹Dob ai ipatugah si Ahab ma ganup na binahen ni si Elias pakon naha pamunuhni bani ganup nabi ai marhitei podang. [402]

²Dob ai isuruh si Isebel ma suruhanni marayak si Elias mangkatahon hu bani, “Sai sonin ma ibahen Naibata bangku, lobih ope tene, anggo seng hubahen hosahmu patar, usih songon na binahenmu hu bani hosah ni ganup sidea ai.” [403]

³Jadi mabiar ma ia, gabe bingkat ma ia mardalan paluahkon hosahni. Daskonsi ia i Berseba, na i tanoh Juda, itadingkon ma juakjuakni ijai. [404]

⁴Tapi laho ma ia hu halimisan, sadari mardalan daohni; dob das ia hujai, hundul ma ia marlinggom i toruh ni sada hayu tatada, anjaha ipangindo uhurni ma sihol matei, nini ma, “Sungkup ma in Ham Jahowa, buat Ham ma hosahku, ai seng dearan paruhuranku hun bani ompungku.” [405]

⁵Dob ai ipatibal ma bani lanjar modom i toruh ni sada hayu tatada; tapi tonggor ma, roh ma sada malekat manggiutsi, anjaha nini ma hu bani, “Puho ma ham, mangan ma!” [406]

⁶Jadi mangkawah ma ia, gabe iidah ma tibal hampit uluni sada ruti na ginoreng pakon sada gusi marisi bah. Dob mangan pakon minum ia iulaki ma use modom.

⁷Dob ai roh ma malekat ni Jahowa manggiutsi paduahalihon, anjaha nini ma, “Puho ma ham, mangan ma, ase ulang madaohtu iahap ham sidalananmu ai.”

⁸Dob ai puho ma ia, mangan ma ia anjaha minum, lanjar mardalan ma pinargogohan ni sipanganon ai ompat puluh ari ompat puluh borngin dokahni das hu Horeb, Dolog ni Naibata. [407]

⁹Masuk ma ia ijai hubagas sada liang, lanjar marborngin ma ia ijai; dob ai tonggor ma, roh ma hata ni Jahowa hu bani, nini ma, “Aha do horjamu ijon, Elias?” [408]

¹⁰Nini ma, “Na manringis do ahu mangkopkop horja ni Jahowa, Naibata Zebaot; ai domma itadingkon halak Israel parpadanan-Mu, domma irumbakkon sidea anjapanjap-Mu, anjaha domma ibunuhi sidea nabi-Mu marhitei podang, sahalak ahu mando na tading; anjaha ipindahi sidea do hosahku sihol mambuat ai.” [409]

¹¹Dob ai nini Jahowa ma, “Luar ma ho, anjaha jongjong ma ho bani dolog in i lobei ni Jahowa. Tonggor ma, mamontas ma Jahowa, anjaha torbanon ni ampilaos ma dolog-dolog in, anjaha bolahonni ma dolog batu i lobei ni Jahowa, tapi seng Jahowa ope ibagas ampilaos ai; dob salpu ampilaos ai roh ma lalou, tapi seng Jahowa ope ibagas lalou ai; [410]

¹²dob salpu lalou ai roh ma apuy, tapi seng Jahowa ope ibagas apuy ai; dob salpu apuy ai roh ma logou na anget-anget.” [411]

¹³Dob ibogei si Elias ai, irungkub ma bohini bani mantelni; luar ma ia lanjar jongjong i babah ni liang ai. Dob ai tonggor ma, roh ma sada sora mangkatahon hu bani, “Aha do horjamu ijon, Elias?” [412]

¹⁴Nini ma, “Na manringis do ahu mangkopkop horja ni Jahowa, Naibata Zebaot; ai domma itadingkon halak Israel parpadanan-Mu, domma irumbakkon sidea anjapanjap-Mu, anjaha domma ibunuhi sidea nabi-Mu marhitei podang, sahalak ahu mando na tading; anjaha ipindahi sidea do hosahku sihol mambuat ai.” [413]

¹⁵Tapi nini Jahowa ma hu bani, “Mulak ma ho hun bani dalanmu hinan hu halimisan Damaskus. Daskonsi ho, minaki ma si Hasael gabe raja manggomgom Aram; [414]

¹⁶minaki ma pakon si Jehu, anak ni si Nimsi gabe raja manggomgom Israel; minaki ma homa si Elisa, anak ni si Safat, hun Abel-Mehola, gabe nabi manggantih ho. [415]

¹⁷Jadi barang ise na maluah hun bani podang ni si Hasael, bunuhon ni si Jehu ma ai, anjaha barang ise na maluah hun bani podang ni si Jehu, bunuhon ni si Elisa ma ai. [416]

¹⁸ Ambah ni ai tading ope Hubahen i Israel pitu ribu halak, na so manowod, marsombah hu baal anjaha na seng ongga manummahsi.” [417]

¹⁹Dob ai bingkat ma si Elias hunjai, gabe jumpahsi ma si Elisa, anak ni si Safat, tudu sanggah maninggala ia rap pakon sapuluh dua pasang lombu i lobei ni, ia do manjolom pasangan na pasapuluhduahon. Mamontas ma si Elias hun lambungni lanjar isabeihon ma mantelni ai hu bani. [418]

²⁰Mintor itadingkon si Elisa ma lombu ai, anjaha marlintun ma ia mangirikkon si Elias, anjaha nini ma, “Mahua lopas ham ma ahu lobei manummah bapa pakon inang, ase huirikkon ham!” Dob ai nini si Elias ma hu bani, “Laho ma, tapi mulak da; ingat na hubahen ai bam!” [419]

²¹Dob ai laho ma ia, ibuat ma lombu na sapasang ai anjaha isayat ma ai, lanjar pasangan ni lombu ai do ibahen malompah gulei ai; ibere ma gulei ai panganon ni halak na ijai ai. Dob ai bingkat ma ia mangirikkon si Elias gabe juakjuakni. [420]