Read Batak Simalungun 1 RAJA-RAJA 20 Bible Online

1 RAJA-RAJA 20 - Batak Simalungun bible

1 RAJA-RAJA 20

¹Tapi ipatumpu si Benhadad, Raja Aram ma ganup balani; tolu puluh dua raja do hasomanni, sonai homa huda pakon gareta porang; jadi tangkog ma ia, ihubu ma Samaria anjaha iporang. [421]

²Dob ai isuruh ma suruhanni marayak si Ahab raja ni Israel hu huta ai,

³anjaha nini ma hu bani, “Sonon do hata ni si Benhadad, ʻPerakmu pakon omasmu ahu do simadasi; parinangonmu sijengesan pakon dakdanakmu ahu do homa simadasi.ʼ ”

⁴Nini raja Israel ma mambalosisi, “Songon na hinatahonmu ai ma tongon tuannami anjaha rajanami, ham do simada ahu pakon ganup na adong bangku.”

⁵Dob ai iulaki suruhan ai ma roh use, nini sidea ma, “Sonon do hata ni si Benhadad, ʻDomma husuruh namin mangkatahon bamu, Bere ma hu bangku perakmu, omasmu, parinangonmu pakon dakdanakmuʼ

⁶tapi patar sonon suruhonku ma juakjuakku marayak ham, ase irungkapi sidea rumahmu pakon rumah ni juakjuakmu, anjaha sagala ugas, na hinarosuhkon ni sidea, buaton anjaha boanon ni sidea ma ai.”

⁷Dob ai idilo raja ni Israel ma ganup pangintuai ni nagori ai, ihatahon ma, “Botoh anjaha tonggor nasiam ma, habadoronta do hape, na pinindahan ni halak on; halani isuruh do suruhanni hu bangku mangindo parinangonku, dakdanakku, pirakku pakon omasku, anjaha seng hujua mamberehon ai bani.” [422]

⁸Dob ai nini ganup pangintuai ai pakon bangsa ai ma hu bani, “Ulang ma patangar-tangar ham ai, anjaha ulang ma hadearhon ham!”

⁹Jadi nini raja ai ma hu bani suruhan ni si Benhadad, “Hatahon nasiam ma hu bani tuannami, raja in, ʻHaganup na pinindomu na parlobei hun bani juakjuakmu, sai na bahenonku do in, tapi anggo pasal on, seng tarbalosi ahu in.ʼ ” Dob ai mulak ma suruhan ai padaskon balos ai.

¹⁰Iulaki si Benhadad ma use suruhanni mangkatahon hu bani, “Sai sonai ma ibahen Naibata bangku, lobih ope tene, anggo sungkup do orbuk ni huta Samaria on manggoki tangan ni ganup bangsa, na mangirikkon ahu.” [423]

¹¹Dob ai nini raja Israel ma mambalosi, “Hatahon ma bani, ʻHalak na mangkalhal podangni, ulang ma manganjang, songon na dob patibal podangni.ʼ ”

¹²Jadi dob ibogei Raja Benhadad hata ai, tudu sanggah minum anggur ia pakon raja-raja ai ibagas lampolamponi, nini ma hu bani juakjuakni, “Inggoti nasiam ma huta in!” Jadi mintor iinggoti sidea ma huta ai. [424]

¹³Dob ai tonggor ma, roh ma sada nabi marayak si Ahab, raja ni Israel, nini ma, “Sonon do hata ni Jahowa, ʻDomma iidah ho munsuhmu na buei on? Tonggor ma, ondoskonon-Ku ma in sadari on hubagas tanganmu, ase ibotoh ho, Ahu do Jahowa.ʼ ” [425]

¹⁴Dob ai nini si Ahab ma, “Marhitei ise?” Nini nabi ai ma, “Sonon do hata ni Jahowa, ʻMarhitei juakjuak ni raja-raja urung.ʼ ” Nini raja ai ma use, “Ise na parlobei bingkat?” Nini nabi ai ma, “Ham do.” [426]

¹⁵Dob ai ibilang raja ai ma juakjuak ni raja-raja urung ai, duaratus tolu puluh dua halak bueini, dob ai ibilang ma homa ganup bangsa Israel, pitu ribu halak. [427]

¹⁶Dob ai luar ma sidea tongah arian, sanggah na minum-minum si Benhadad i lampolamponi rap pakon raja-raja na tolu puluh dua halak ai, na hinarahni ai. [428]

¹⁷Dob ai luar ma parlobei juakjuak ni raja-raja urung ai. Isuruh si Benhadad ma suruhanni mangipa-ipa, jadi nini sidea ma hu bani, “Adong do halak na roh hun Samaria.”

¹⁸Nini raja ai ma, “Barang na sihol mardamei sidea ase luar, barang sihol marporang, tangkapi nasiam ma sidea manggoluh.”

¹⁹Jadi luar ma sidea hun huta ai, ai ma juakjuak ni raja-raja urung ai pakon bala ai hun pudi ni sidea.

²⁰Ibunuh sidea bei ma imbangni, gabe maporus ma halak Aram ai; ipardakdak halak Israel ma sidea, tapi maluah do si Benhadad na marhuda ai rap pakon deba halak siajak huda.

²¹Jadi luar ma homa raja ni Israel, anjaha iayob ma huda pakon gareta porang, anjaha buei tumang do halak Aram na rasei ibahen.

²²Dob ai roh ma nabi ai marayak raja ni Israel, nini ma hu bani, “Laita! Marjaga ma ham, pingkir ham ma barang aha sibahenonmu, halani tahun na roh on, roh do raja ni Aram mamorang ham.” [429]

²³Nini juakjuak ni Raja Aram do hu bani raja ai, “Naibata dolog-dolog do naibata ni sidea ai, ai do ase gogohan sidea ase hita; tapi porang hita ma sidea i tanoh hondot, tontu talu ma sidea ibahen hita. [430]

²⁴Halani ai sonon ma bahen ham, ʻPaturun ham ma raja-raja ai, ganup hun jabatanni hinan, anjaha bahen ham ma puanglima gantih ni sidea; [431]

²⁵tapi patumpu ham ma bamu bala songon balamu na dob rasei ai, sonai homa huda pakon gareta; jadi porang hita ma sidea i tanoh hondot, anjaha tongon, sai na monang do hita.ʼ ” Itangihon si Benhadad do hata ni sidea, anjaha ibahen ma sonai.

²⁶Dob salpu na satahun ai, iharah si Benhadad ma halak Aram, anjaha tangkog ma ia hu Afek, laho marporang dompak Israel. [432]

²⁷Anjaha halak Israel pe iharah ma anjaha iparbohali, jadi bingkat ma sidea manjumpahkon halak Aram; marsaran ma halak Israel patontang pakon sidea songon dua hulanan hambing na etek-etek, tapi igoki halak Aram do tanoh ai.

²⁸Jadi roh ma sada halak ni Naibata marayak raja ni Israel, nini ma dompaksi, “Sonon do hata ni Jahowa, ʻHalani ihatahon halak Aram, Naibata ni dolog-dolog do Jahowa, sedo Naibata ni tanoh hondot, halani ai ondoskonon-Ku ma hubagas tanganmu halak na mabuei on, ase itanda nasiam, Ahu do Jahowa.ʼ ” [433]

²⁹Jadi marsaran ma sidea patontang-tontang pitu ari dokahni. Papitu arihon marsiporangan ma sidea, gabe ibunuh halak Israel ma saratus ribu halak Aram, bala pardalan nahei ibagas sadari.

³⁰Maporus ma na tading ai hu huta Afek, tapi idabuhi tembok ni huta ai ma dua puluh ribu halak hun bani na tading ai. Si Benhadad pe maporus do, imasuki ma huta ai hun rumah na sada hu rumah na sada nari. [434]

³¹Marsahap ma juakjuakni hu bani, “Tonggor ma, ibogei hanami do barita ni raja ni Israel, raja paridop ni uhur do sidea; palopas ham ma hanami marbaju guni pakon margotongkon tali laho luar marayak raja ni Israel andohar ipalopas ham manggoluh.” [435]

³²Dob ai luar ma sidea marhiou guni, anjaha margotong-gotong tali, marayak raja ni Israel, anjaha nini sidea ma, “Nini juakjuakmu si Benhadad; mahua palopas ham ma ahu manggoluh.” Jadi nini raja ai ma, “Manggoluh ope ia? Saninangku do ia.”

³³Iahap sidea tugah-tugah na madear do ai, mintor itangkap sidea ma hatani ai, “Anggimu ma tongon si Benhadad!” Dob ai nini ma, “Laho ma nasiam, boan nasiam ma ia hujon.” Jadi luar ma si Benhadad marayak raja ai, lanjar ihatahon raja ai ma ia naik hu gareta.

³⁴Dob ai nini si Benhadad ma hu bani raja ai, “Hupaulak ma bamu huta, na nirampas ni bapa ondi hun bani bapanta; anjaha pajongjong ham ma bamu rumah partiga-tigaan i Damaskus, songon na binahen ni bapa i Samaria. Tapi anggo ahu, paluah ham ma ahu maronjolan bani padan on.” Jadi marpadan ma sidea, dob ai ilopas ma ia laho. [436]

³⁵Dob ai roh ma sada halak hun bani nabi-nabi ai, mangkatahon hu bani hasomanni marhitei hata ni Jahowa, “Mahua lonsingi ma ahu!” Tapi manjua do halak ai manlonsingisi. [437]

³⁶Dob ai nini nabi ai ma hu bani, “Halani na so tinangihonmai sora ni Jahowa, tonggor ma, anggo laho holi ho, hun lambungku, sorohon ni singa ma ho.” Jadi lahohonsi ia hun lambungni, pajumpah ma ia pakon singa, anjaha isoroh ma ia. [438]

³⁷Dob ai jumpahsi ma sada halak na legan, jadi nini ma hu bani, “Mahua lonsingi ma ahu!” Jadi ilonsingi halak ai ma ia, pala ugahan ia.

³⁸Dob ai laho ma nabi ai mangambat raja ai hu tongah dalan, anjaha ipalegan ma rupani marhitei na mambahen pambalut bani matani. [439]

³⁹Jadi sanggah mamontas raja ai, doruh-doruh ma ia hu bani raja ai, nini ma, “Bingkat do jabolonmu on hu parporangan; jadi tonggor ma, roh ma sada halak, iboan ma bangku sada halak na tartaban anjaha nini ma, ʻJaga halak on; anggo lintun ia, maningon hosahmu gantih ni hosahni, barang maningon galaronmu pirak sada talenta.ʼ [440]

⁴⁰Hape sanggah na porlu tumang horja ni jabolonmu on, sompong seng ijin be ia.” Dob ai nini raja ai ma hu bani, “Sonai ma uhum bam; songon putusanmai ma!”

⁴¹Dob ai mangolos ma ia mananggali pambalutni hun bani matani, gabe itanda raja ai ma ia, ai ma sada hun bani nabi-nabi ai.

⁴²Dob ai nini nabi ai ma hu bani, “Sonon do hata ni Jahowa, ʻHalani na pinaluahmu ai hun bani tanganmu halak ai, na sihol siapkonon-Kai, maningon hosahmu gantih ni hosahni, anjaha bangsamu gantih ni bangsani.ʼ ” [441]

⁴³Dob ai mulak ma raja ni Israel hu rumahni, hu Samaria, ibagas gila pakon pusok ni uhur. [442]