Read Batak Simalungun 1 RAJA-RAJA 21 Bible Online

1 RAJA-RAJA 21 - Batak Simalungun bible

1 RAJA-RAJA 21

¹Dobkonsi na masa ai, tarjadi ma sonon: Adong do pohon anggur bani si Nabot, halak Jesreel ai, i lambung rumah ni si Ahab, Raja Israel. [443]

²Dob ai nini si Ahab ma hu bani si Nabot, “Mahua bere ma bangku pohon anggurmai, ase adong panuan-nuanan ni lowohnami, halani dohorni ai hu rumahku; hubere pe bam pohon anggur sidearan gantihni ai, barang pirak nasa arga ni pohonmai, anggo ai do dearan nini uhurmu.”

³Tapi nini si Nabot ma hu bani si Ahab, “Ipandang Jahowa do bereonku bamu tading-tadingan ni bapa.” [444]

⁴Jadi mulak ma si Ahab hu rumahni, mandolei anjaha gok ringis, halani hata ni si Nabot, na hun Jesreel ai, hu bani, ai nini do, “Seng ra ahu mambere bamu tading-tadingan ni bapa.” Ipatibal raja ai ma bani i podoman, anjaha bohini dompak dingding, anjaha seng ra ia mangan. [445]

⁵Dob ai roh ma si Isebel, parinangonni ai hu bani, nini ma hu bani, “Mase ma sonin pusok ni uhurmu, anjaha seng ra ham mangan?”

⁶Jadi nini ma hu bani, “Marsahap do ahu pakon si Nabot halak Jesreel ai, ningku do hu bani, ʻMahua bere ma pohon anggurmin bolionku; barang, anggo rosuhan uhurmu, hubere pe pohon anggur na legan gantihniʼ jadi nini ma mambalosi, ʻSeng ra ahu mambere bamu pohon anggurhai.ʼ ”

⁷Dob ai nini si Isebel parinangonni ai ma hu bani, “Ai lang ham do nuan na manrajai Israel? Hundul ma ham, mangan ma ham, anjaha tenger ma uhurmu, hubere pe bamu pohon anggur ni si Nabot, halak Jesreel ai.”

⁸Dob ai ibahen ma surat ibagas goran ni si Ahab, anjaha itokan ma ai marhitei tokanni, anjaha itongoskon ma surat ai hu bani pangintuai-pangintuai pakon halak na sangap-sangap, hasoman ni si Nabot ai. [446]

⁹Anjaha sonon do hata ni suratni ai, “Tingtingkon nasiam ma sada ari puasa, anjaha hatahon nasiam ma si Nabot hundul i luluan ni tumpuan ai,

¹⁰anjaha pahundul nasiam ma homa dua halak paruhur jahat padompak-dompak pakonsi, ase sidea marsaksihon dompaksi, ʻDomma iapasi ho Naibata pakon raja in.ʼ Dob ai togu nasiam ma ia hudarat, anjaha pargijig nasiam ma ia bani batu, ase matei ia.” [447]

¹¹Jadi roh ma halak na i huta ai, ai ma partua-partua pakon halak na sangap-sangap ai, na marianan rapkonsi ibagas huta ai, mandalankon songon na hinatahon ni si Isebel ibagas surat, na tinongosni ai bani sidea.

¹²Itingtingkon sidea ma sada ari puasa, anjaha ihatahon ma si Nabot hundul i luluan ni tumpuan ai.

¹³Dob ai roh ma na dua halak paruhur na jahat ai, jadi hundul ma ia padompak-dompak pakonsi; dob ai marsaksihon ma halak paruhur na jahat ai dompak si Nabot i lobei ni bangsa ai, nini ma, “Domma iapasi si Nabot on Naibata pakon raja in.” Dob ai iarahkon sidea ma ia hu darat ni huta ai, anjaha ipargijig sidea ma ia bani batu lanjar matei. [448]

¹⁴Isuruh sidea ma na patugahkon hu bani si Isebel, “Domma matei si Nabot ipargijig.”

¹⁵Jadi dob ibogei si Isebel, na dob matei si Nabot hona pargijig bani batu, nini si Isebel ma hu bani si Ahab, “Jongjong ma ham, buat ma bamu pohon anggur ni si Nabot, halak Jesreel ai, na jinuani mamberehon bolionmu ai, ai lang manggoluh be si Nabot, domma matei ia.” [449]

¹⁶Jadi dob ibogei si Ahab, na dob matei si Nabot, jongjong ma ia, sihol laho hu pohon anggur ni si Nabot, halak Jesreel ai, laho mambangkuhon ai. [450]

¹⁷Tapi roh ma hata ni Jahowa hu bani si Elias, halak Tisbi ai, nini ma,

¹⁸“Jongjongkon ma anjaha tuad ma ho marayak si Ahab, raja Israel, na marianan i Samaria. Tonggor ma, ibagas pohon anggur ni si Nabot do ia nuan, ai domma tuad ia hujai laho mambangkuhon ai.

¹⁹Hatahon ma hu bani, ʻSonon do hata ni Jahowa: Ai lang domma mambunuh ho, anjaha manrampas homa?ʼ Ambahni ai hatahon ma hu bani, ʻIa ijin idilati baliang daroh ni si Nabot, maningon ijai do dilaton ni baliang darohmu.ʼ ” [451]

²⁰Nini si Ahab ma hu bani si Elias, “Domma tardapot ahu ibahen ham, o munsuhku!” Nini si Elias ma mambalosi, “Domma tardapot ahu tongon, ai domma ibahen ho dirimu, laho mangkorjahon sogam ni uhur ni Jahowa. [452]

²¹Tonggor ma, parohon-Ku ma bam hamagouan; siapkonon-Ku ma ginomparmu, siapkonon-Ku ma hun bani si Ahab sagala dalahi na poso barang na dob matua i Israel, [453]

²²anjaha bahenon-Ku ma ginomparmu songon ginompar ni si Jerobeam, anak ni si Nebat, pakon ginompar ni si Baesa, anak ni si Ahia, halani na pinapuhomai ringis-Ku, anjaha halani na niojurmai halak Israel mambahen dousa. [454]

²³Anjaha hu bani si Isebel sonon do hata ni Jahowa, ʻManingon bois holi panganon ni baliang si Isebel i lambung tembok ni Jesreel.ʼ [455]

²⁴Barang ise na matei hun bani si Ahab ibagas huta, maningon bois panganon ni baliang, anjaha barang ise na matei i ladang, maningon bois panganon ni manuk-manuk na i awang-awang. [456]

²⁵Ai seng dong jolma songon si Ahab, na mamberehon dirini laho mangkorjahon sogam ni uhur ni Jahowa, na pinaojur-ojur ni si Isebel, parinangonni ai. [457]

²⁶Ai jahat tumang do pambahenanni marhitei na niirikkonni ai naibata na legan, songon na binahen ni halak Amori hinan, ai ma na dob pinabali ni Jahowa hinan hun lobei ni halak Israel.” [458]

²⁷Tapi dob ibogei si Ahab hata ondi, irigati ma hiouni, anjaha isorungkon ma hiou guni, anjaha marunduk ni uhur ia mardalan. [459]

²⁸Dob ai roh ma hata ni Jahowa hu bani si Elias, halak Tisbi ai, nini ma,

²⁹“Domma iidah ho, na pinaunduk ni si Ahab ai dirini i lobei-Hu? Halani na pinaundukni ai dirini i lobei-Hu, seng be parohon-Ku hamagouan ai sanggah manggoluh ia, sanggah goluh ni anakni pe parohon-Ku hamagouan ai bani ginomparni.” [460]