Read Batak Simalungun 1 RAJA-RAJA 3 Bible Online

1 RAJA-RAJA 3 - Batak Simalungun bible

1 RAJA-RAJA 3

¹Dob ai martondong ma si Salomo hu bani Parao, raja ni Masir, ai ibuat do boru ni Parao bahen parinangonni, anjaha iboan hu huta ni si Daud, paima idobkon pajongjong rumahni, rumah ni Jahowa pakon tembok ni huta Jerusalem inggot. [66]

²Manggalang bani buntu-buntu ope halak na mabuei ai, halani seng dong ope ipajongjong rumah bani goran ni Jahowa das bani panorang ai. [67]

³Holong do uhur ni si Salomo mangidah Jahowa, anjaha marparlahou do ia bani aturan ni bapa ni si Daud; tapi i buntu-buntu ope ia manggalang pakon manutung dahupa. [68]

⁴Sahali laho ma raja ai hu Gibeon laho manggalang ijai, ai buntu-buntu bolon do ijai. Saribu galangan situtungon igalangkon si Salomo bani anjapanjap ai.

⁵I Gibeon ma talar Jahowa hu bani si Salomo ibagas nipi borngin-borngin. Nini Naibata ma, “Pangindo ma, barang aha do sihol bereon-Ku bam.” [69]

⁶Dob ai nini si Salomo ma, “Domma ipatidak Ham idop ni uhur banggal hu bani juakjuak-Mu, bapa, si Daud, halani marparlahou ia i lobei-Mu ibagas hasintongan, hapintoron pakon bonar ni paruhuran dompak Ham; anjaha domma ipatotap Ham bani idop ni uhur na banggal on, anjaha ibere Ham do bani sada anak na hundul bani paratasni sadari on. [70]

⁷On pe, Ham Jahowa, Naibatangku, domma ipabangkit Ham jabolon-Mu on gabe raja gantih ni bapa, Raja Daud, tapi danak ope ahu, seng hubotoh ope ruhut ni na i darat barang na ibagas huta pe. [71]

⁸I tongah-tongah ni bangsa-Mu do jabolon-Mu on, ai ma na pinilih-Mu, sada bangsa na bolon, na so tarhira barang tarbilangi halani bueini. [72]

⁹Halani ai, bere Ham ma hu bani jabolon-Mu on uhur na pantas laho manggomgom bangsa-Mu in, ase hubotoh manirang na madear hun bani na masambor; ai mintor ise ma mangasup manggomgom bangsa-Mu na banggal on?”

¹⁰Jadi rosuh ma uhur ni Jahowa, halani sonai pangindoan ni si Salomo.

¹¹Jadi nini Naibata ma hu bani, “Halani in do ipangindo ho, seng ipangindo ho ganjang ni umur, barang habayakon, barang hosah ni munsuhmu, tapi uhur do ipangindo ho laho mangarusi uhum,

¹²tonggor ma, bahenon-Ku ma romban hu bani hatamai. Bereon-Ku ma bam uhur na pentar anjaha na pantas, ase ulang adong na songon ho i lobeimu barang na sihol tubuh ope i pudimu. [73]

¹³Ambah ni ai, na so pinangindomai pe, bereon-Ku do bam, ai ma habayakon pakon hasangapon, ase ulang adong be na songon ho raja, sadokah ho manggoluh. [74]

¹⁴Anjaha anggo sai tong do ho marparlahou bani dalan-Ku, iramotkon ho titah-Ku pakon parentah-Ku, songon parlahou ni bapamu si Daud, jadi tumpakon-Ku ma ho sayur matua.” [75]

¹⁵Dob ai puho ma si Salamo, tonggor ma, nipi do hape. Jadi dob das ia hu Jerusalem, jongjong ma ia i lobei ni Poti Parpadanan ni Jahowa, igalangkon ma galangan situtungon pakon galangan pardameian, anjaha ibere mangan ganup juakjuakni. [76]

¹⁶Ijia roh ma dua halak boru jalang hu lobei ni raja ai, jongjong ma sidea i lobei ni.

¹⁷Nini sahalak hun bani naboru ai ma, “Santabi tuannami! Ia ahu pakon naboru on marianan do ibagas sada rumah; jadi tubuhan tuah ma ahu i lambung ni i rumah ai.

¹⁸Dob ai patoluarihon dob tubuhan tuah ahu, tubuhan tuah ma homa naboru on; hanami na dua hansa, seng dong halak na legan i rumah ai, sobali hanami na dua.

¹⁹Matei ma anak ni naboru on borngin, halani tardondonisi.

²⁰Jadi puho ma ia tongah borngin, iangkat ma anakku hun lambungku, sanggah modom jabolonmu naboru on, anjaha iabing ma ai, anakni na matei ai inahkon ma hu abinganku.

²¹Jadi sanggah puho ahu sogod-sogod laho painumkon anakkai, gabe tonggor ma, domma matei ia. Tapi dob hupapangkei sogod, tonggor ma, seng anakku na hutubuhkon ai hape ai.”

²²Tapi nini naboru na legan ai ma, “Lang, anakku do na manggoluh in, tapi anakmu do na matei in.” Nini na parlobei ai ma, “Lang, anakmu do na matei in, tapi anakku do na manggoluh in.” Sonai ma sidea marsurai i lobei ni raja ai.

²³Dob ai nini raja ai ma, “Na sada on mangkatahon, ʻOn do anakku na manggoluh on, anakmu do na matei in.ʼ Tapi na sada on mangkatahon, ʻLang, anakmu do na matei in, anakku do na manggoluh on.ʼ ”

²⁴Nini raja ai ma, “Buat nasiam bangku sada podang!” Jadi ibuat sidea ma sada podang bani raja ai.

²⁵Dob ai nini raja ai ma, “Ponggol dua nasiam ma dakdanak na manggoluh in, anjaha bere nasiam ma, samponggol hu bani na sada on, anjaha na samponggol nari hu bani na sada an.”

²⁶Jadi nini naboru paranak na manggoluh ai ma hu bani raja ai, ai holong tumang do uhurni ibagas mangidah anakni ai, “Sombahku bamu, tuannami, bere ma bani dakdanak na manggoluh in, sabonar ulang ma ibunuh ham ia.” Tapi nini naboru na sadanari ai ma, “Ulang bam, ulang bangku, iponggol ma in!” [77]

²⁷Dob ai nini raja ai ma mambalosi, “Bere nasiam ma dakdanak na manggoluh in bani naboru on, ulang bunuh nasiam ai, on do inangni.”

²⁸Sar ma panguhumion ni raja ai hu sab Israel, gabe mabiar ma sidea mangidah raja ai, ai iidah sidea hapentaran ni Naibata do ibagas panguhumion na dong bani ai. [78]